KALATA YA KUBALILAPO IYA KWA YOHANE

1 Twamulembela pa waliko ukufuma fye ku kutendeka, uo twaumfwile, uo twaimwenene na menso, uo twalolekeshe, kabili uo twaikete ne minwe yesu, uwaletele amashiwi ayapeela umweo,+ 2 (cine cine, umweo walimoneke, twaliumwene kabili tuli nte.+ Tulemushimikila pa mweo wa muyayaya+ uwafumine kuli Shifwe kabili uo twamwene), 3 uo twamwene kabili uo twaumfwile e o tulemwebapo,+ pa kuti imwe na ifwe tube abaikatana nga filya fine twaikatana na Shifwe no Mwana wakwe Yesu Kristu.+ 4 E ico tulemulembela ifi fintu pa kuti tulesekelela sana.

5 Aya e mashiwi twaumfwile kuli ena kabili ayo tulebila kuli imwe aya kuti: Lesa lubuuto,+ kabili muli ena tamwaba imfifi nangu panono. 6 Nga twalanda atuti, “Twalikatana nankwe,” lelo twatwalilila ukwenda mu mfifi, ninshi tulebepa kabili ninshi tatulelanda icishinka.+ 7 Lelo nga tule-enda mu lubuuto nga filya na o aba mu lubuuto, ninshi ifwe bonse twalikatana, kabili ninshi umulopa wa kwa Yesu Umwana wakwe ulatusangulula ku membu shonse.+

8 Nga twalanda atuti, “Tatuli babembu,” ninshi tuleibepa fye,+ kabili ninshi ne cine tamwaba muli ifwe. 9 Nga twayebelela imembu shesu, kuti atwelela imembu no kutusangulula ku fyabipa fyonse+ ifyo tucita pantu ena wa cishinka kabili alilungama. 10 Nga twalanda atuti, “Tatwatala atubembukapo,” ninshi tuleti wa bufi, kabili ninshi muli ifwe tamwaba amashiwi yakwe.

2 Mwe bana bandi abanono, ndemulembela ifi fintu pa kuti mwibembuka. Lelo nga ca kuti umuntu abembuka, twalikwata kaafwa,* uwaba na Shifwe kabili uyu kaafwa ni Yesu Kristu+ uwalungama.+ 2 Kabili ena e lambo+ lya pa membu shesu+ ililenga tulebwelela kuli Lesa.* Nomba te membu shesu fye sheka, lelo ne sha ba pano calo bonse.+ 3 Nga twatwalilila ukukonka amafunde yakwe tukeshiba ukuti twalimwishiba. 4 Uulanda ukuti, “Nalimwishiba,” lelo takonka amafunde yakwe, ninshi wa bufi, kabili ninshi muli ena tamwaba ne cine. 5 Lelo onse uukonka amashiwi yakwe, ninshi cine cine alitemwa Lesa.+ Ici cilenga twaishiba ukuti twaba muli ena.+ 6 Uulanda ukuti alikalilila muli ena afwile ukulacita ifyo Yesu alecita.*+

7 Mwe batemwikwa, ifunde ilyo ndemulembela te lipya, ni lilya line ilya kale ilyo mwakwata ukufuma fye na ku kutendeka.+ Ili ifunde lya kale, e mashiwi ayo mwaumfwile. 8 Nomba namulembela ifunde ilipya, ilyo Yesu alekonka kabili ilyo na imwe mukonka, pantu imfifi ileya ilepwa, no lubuuto lwine lwine lulesanika.+

9 Uutila aaba mu lubuuto lelo alipata+ munyina, ninshi acili mu mfifi.+ 10 Uwatemwa munyina ekalilila mu lubuuto,+ kabili muli ena tamwaba icingalenga aipununa. 11 Lelo uwapata munyina aaba mu mfifi kabili enda mu mfifi,+ teshiba uko aleya,+ pantu imfifi yalipofwisha amenso yakwe.

12 Nalembela imwe mwe bana abanono, pantu imembu shenu nashelelwa pa mulandu we shina lyakwe.+ 13 Nalembela imwe mwe bashifwe, pantu mwalimwishiba uwabako ukufuma ku kutendeka. Nalembela imwe mwe balumendo, pantu mwalicimfya umubifi.+ Nalembela imwe mwe bana abanono, pantu nomba mwalishiba Shifwe.+ 14 Nalembela mwe bashifwe, pantu mwalimwishiba uwabako ukufuma ku kutendeka. Nalembela imwe mwe balumendo, pantu mwalikosa,+ kabili icebo ca kwa Lesa caikalilila muli imwe+ kabili mwalicimfya umubifi.+

15 Mwitemwa ici calo nelyo ifintu fya muli ici calo.+ Umuntu nga atemwa ici calo, ninshi tatemwa Shifwe;+ 16 pantu fyonse ifya muli ici calo—ulunkumbwa lwa mubili+ no lunkumbwa lwa menso,+ no kuitakishisha pa fyo umuntu akwata*—tafyafuma kuli Shifwe, lelo fyafuma muli ici calo. 17 Na kuba, ici cine calo cileya pamo no lunkumbwa lwa ciko,+ lelo uucita ifyo Lesa afwaya akekalilila umuyayaya.+

18 Mwe bana abanono, ino ni nshita ya kulekelesha, kabili nga filya fine mwaumfwile ukuti mukaanya Kristu akabako,+ na pali ino ine nshita bamukaanya Kristu abengi e ko bali.+ Ici cine e calenga twishibe ukuti ino ni nshita ya kulekelesha. 19 Bafumine muli ifwe, lelo tabaali nga ifwe;*+ pantu ababa nga ifwe nga balitwalilile ukuba pamo na ifwe. Lelo balifumine pa kuti cimoneke apabuuta tuutu ukuti te bonse ababa nga ifwe.+ 20 Imwe uwamusuba wa mushilo,+ kabili imwe bonse mwalishiba icine. 21 Nshilemulembela pa mulandu wa kuti tamwaishiba icine,+ lelo ni pa mulandu wa kuti mwalicishiba, na pa mulandu wa kuti takwaba ubufi ubufuma mu cine.+

22 Bushe uwa bufi te ulya uukaana ukuti Yesu e Kristu?+ Uyu e mukaanya Kristu,+ uukaana Wishi no Mwana. 23 Onse uukaana Umwana ninshi te mubomfi wa kwa Wishi.+ Lelo uutetekela Umwana+ e mubomfi wa kwa Wishi.+ 24 Lelo imwe mufwile ukuleka ifyo mwaumfwile ukufuma ku kutendeka fyaikalilila muli imwe.+ Ifyo mwaumfwile ukufuma ku kutendeka nga fyaikalilila muli imwe, na imwe bene mukekalilila mu Mwana na muli Wishi. 25 Na kabili, ubu e bulayo ubo umwine atulaile—umweo wa muyayaya.+

26 Namulembela aya mashiwi pa mulandu wa kuti bamo balefwaya ukumulufya. 27 Lelo imwe Lesa+ alimusubile no mupashi wakwe uwatwalilila muli imwe, kabili tamukabila uwa kulamusambilisha; lelo ukusuba uko Lesa amusubile kwa cine, te kwa bufi, kabili kulemusambilisha ifintu fyonse.+ Nga filya fine kwamusambilisha, e fyo mutwalilile ukuba muli ena.+ 28 E ico nomba mwe bana abanono, ikalilileni muli ena, pa kuti ilyo akamoneka tukalelanda ukwabula umwenso+ kabili twikomfwa insoni no kufuma pali ena ilyo inshita ya kubapo kwakwe ikafika. 29 Nga mwalishiba ukuti alilungama, ninshi mwalishiba no kuti onse uucita ifyalungama mwana wa kwa Lesa.+

3 Moneni ifyo Shifwe atutemwa nga nshi,+ ica kuti alilenga twalaitwa ukuti abana ba kwa Lesa!+ Kabili ifi fine e fyo twaba. E mulandu wine aba pano calo bashatwishibila,+ pantu na o wine tabamwishiba.+ 2 Mwe batemwikwa, pali ino nshita tuli bana ba kwa Lesa,+ lelo tucili tatulaishiba ifyo tukaba.+ Ico twaishiba fye ca kuti ilyo akamoneka tukaba nga ena, pantu tukamumona ifyo aba. 3 Kabili onse uusubila muli ena alaisangulula,+ nga filya fine ena aba uwasanguluka.

4 Onse uubembuka ninshi alapula na mu mafunde, pantu ulubembu kupula mu mafunde. 5 Mwalishiba no kuti ico Yesu aishiile* kusenda imembu shesu,+ kabili muli ena tamwaba ulubembu. 6 Onse uwaikalilila muli ena tacita ulubembu;+ onse uucita ulubembu ninshi tamumonapo nelyo ukumwishiba. 7 Mwe bana abanono, mwileka umuntu nangu umo amulufye; uucita ifyalungama ninshi alilungama, nga filya fine Yesu na o aba uwalungama. 8 Uucita ulubembu wa kwa Satana Kaseebanya, pantu ukufuma fye ku kutendeka,*+ Satana Kaseebanya alabembuka. Ici e calengele Umwana wa kwa Lesa amoneke, pa kuti onaule imilimo ya kwa Satana Kaseebanya.+

9 Umwana wa kwa Lesa onse tacita ulubembu,+ pantu ulubuto* lwa mweo ulwa kwa Lesa lwikalilila mu waba ifi, kabili te kuti acite ulubembu, pantu mwana wa kwa Lesa.+ 10 Abana ba kwa Lesa na bana ba kwa Satana Kaseebanya beshibikilwa kuli ici icishinka ca kuti: Onse uushicita ifyalungama nangu umuntu uushatemwa munyina,+ ninshi tatungululwa na Lesa. 11 Pantu ili e funde ilyo mwaumfwile ukufuma ku kutendeka, ilya kuti tufwile ukutemwana;+ 12 twiba nga Kaini, uwaletungululwa no mubifi kabili uwaipeye munyina.+ Nomba cinshi amwipaile? Ni co imilimo yakwe yali iyabipa,+ lelo iya kwa munyina yali iyalungama.+

13 Bamunyinane, mwipapa pali ifi aba muli ici calo bamupata.+ 14 Twalishiba ukuti twalifwile, lelo pali ino nshita tuli aba mweo,+ pantu twalitemwa bamunyinefwe.+ Uushatemwa munyina ninshi acili alifwa.+ 15 Onse uwapata munyina ninshi ni kepaya,+ kabili mwalishiba ukuti kepaya takakwate umweo wa muyayaya.+ 16 Filya Kristu apeele umweo wakwe pa mulandu wesu+ fyalilenga twaishiba ukutemwa, na ifwe tufwile ukupeela imyeo yesu pa mulandu wa bamunyinefwe.+ 17 Nomba onse uwakwata ifikabilwa mu mikalile ya pano calo kabili amona munyina nabulisha lelo akaana ukumulangulukilako, ninshi kuti twalanda shani ukuti alitemwa Lesa?+ 18 Mwe bana abanono, twilatemwa fye ku mashiwi nangu ku lulimi,+ lelo tuletemwana mu fyo tucita+ na mu cine.+

19 Ici e cikalenga tukeshibe ukuti twaba mu cine, kabili tukalenga imitima yesu ikashininkishe ukuti Lesa alitutemwa 20 nangu ca kuti imitima yesu kuti yatuseka mu fintu fimo, pantu Lesa alicila imitima yesu kabili alishiba fyonse.+ 21 Mwe batemwikwa, imitima yesu nga taituseka, kuti twalanda na Lesa ukwabula umwenso;+ 22 kabili conse ico twamulomba tulapokelela,+ pantu tulakonka amafunde yakwe kabili tulacita ifyo atemwa. 23 Ca cine, ifunde lyakwe lya kuti: tutetekele ishina lya Mwana wakwe Yesu Kristu+ no kuti tutemwane+ nga filya fine atupeele ifunde. 24 Kabili uukonka amafunde yakwe ekalilila muli ena, na o ekala mu waba ifi.+ Kabili ico twishibilako ukuti aikalilila muli ifwe+ ni co alitupeela umupashi wakwe.

4 Mwe batemwikwa, mwilasumina amashiwi yonse*+ ayamoneka kwati yafuma kuli Lesa. Lelo mulebala mwaesha ayo mashiwi* pa kuti mumone nga yafuma kuli Lesa,+ pantu muli ici calo+ muli bakasesema ba bufi abengi.

2 Ifi e fyo mwingesha amashiwi ayafuma kuli Lesa: Amashiwi yonse ayatila Yesu Kristu alishile pano calo no kuba umuntunse, yafuma kuli Lesa.+ 3 Lelo amashiwi yonse ayatila Yesu taishile pano calo no kuba umuntunse tayafuma kuli Lesa.+ Kabili aya e mashiwi ayo mwaumfwile ukuti mukaanya Kristu ali no kulanda,+ kabili eyalelandwa pali ino nshita mu calo.+

4 Mwe bana abanono, imwe muli ba kwa Lesa, kabili mwalicimfya bakasesema ba bufi,+ pantu uuli ku lubali lwenu+ mukalamba ukucila uuli ku lubali lwa ba muli ici calo.+ 5 Bena ba muli ici calo;+ e co balandila ne fifuma ku ba muli ici calo kabili aba muli ici calo balabomfwa.+ 6 Ifwe tuli ba kwa Lesa. Onse uwaishiba Lesa alomfwa ifyo tulanda;+ onse uushili wa kwa Lesa tomfwa ifyo tulanda.+ Ifi e fyo twishibilako amashiwi ya cine ayafuma kuli Lesa, na mashiwi ya bufi ayashafuma kuli Lesa.+

7 Mwe batemwikwa, natutwalilile ukutemwana,+ pantu ukutemwa kwafuma kuli Lesa. Onse uwakwata ukutemwa ninshi mwana wa kwa Lesa kabili ninshi alishiba Lesa.+ 8 Onse uushakwata ukutemwa taishiba Lesa, pantu Lesa kutemwa.+ 9 Icalenga twishibe ukuti Lesa alitutemwa, ni co Lesa alitumine Umwana wakwe+ uwafyalwa eka ukwisa muli ici calo pa kuti twingakwatila umweo muli ena.+ 10 Ifyo uku ukutemwa kwaba ni ifi, ico Lesa atutemenwa, te pa mulandu wa kuti nifwe twabalilepo ukumutemwa, lelo ni co e wabalilepo ukututemwa kabili atumine Umwana wakwe pa kuti ese abe ilambo+ lya pa membu shesu+ ililenga tulebwelela kuli Lesa.*

11 Mwe batemwikwa, nga ca kuti ifi e fyo Lesa atutemenwe, ninshi na ifwe tufwile ukutemwana.+ 12 Takwaba umuntu nangu umo uwamonapo Lesa.+ Nga tuletemwana, Lesa akekalilila muli ifwe kabili akatutemwa sana.+ 13 Icalenga twishibe ukuti twalitwalilila ukuba muli ena, na o aba muli ifwe, ni co alitupeela umupashi wakwe. 14 Na kabili, na ifwe bene twalimona kabili tulalanda ukuti Wishi alitumine Umwana wakwe pa kuti ese abe umupusushi wa ba muli ici calo.+ 15 Onse uusumina ukuti Yesu Mwana wa kwa Lesa,+ Lesa alekalilila muli uyu muntu, na o ekalilila muli Lesa.+ 16 Na ifwe bene twalishiba kabili twalisumina ukuti Lesa alitutemwa.+

Lesa kutemwa,+ kabili onse uutwalilila ukulanga ukutemwa ekalilila muli Lesa na Lesa ekalilila muli ena.+ 17 Ici calilenga atutemwe icine cine, pa kuti tukalelanda ukwabula umwenso+ mu bushiku bwa bupingushi, pantu filya fine aba, e fyo na ifwe twaba pano calo. 18 Mu kutemwa tamwaba umwenso,+ lelo ukutemwa ukwapwililika kulalenga twapoosa umwenso, pantu umwenso ulatucilikila. Cine cine, uwa mwenso takwata ukutemwa ukwapwililika.+ 19 Icalenga tube no kutemwa ni co Lesa e wabalilepo ukututemwa.+

20 Nga ca kuti umuntu atila: “Nalitemwa Lesa,” lelo alipata munyina, ninshi wa bufi.+ Pantu uushatemwa munyina+ uo amona, te kuti atemwe Lesa uo ashamonapo.+ 21 Kabili ili e funde twakwata ilyo atupeela, ilya kuti uwatemwa Lesa alingile ukutemwa na munyina.+

5 Onse uwasumina ukuti Yesu e Kristu ninshi mwana wa kwa Lesa,+ kabili onse uwatemwa wishi ninshi alitemwa no mwana. 2 Nga twatemwa Lesa no kulakonka amafunde yakwe,+ tuleshiba ukuti twalitemwa abana ba kwa Lesa. 3 Pantu ukutemwa Lesa kwalola mu kuti, tufwile ukulakonka amafunde yakwe;+ kabili amafunde yakwe tayakosa,+ 4 pantu umwana wa kwa Lesa onse alacimfya icalo.+ Kabili icitetekelo cesu+ calilenga twacimfya icalo.

5 Nani uwingacimfya icalo?+ Bushe te muntu uwatetekela ukuti Yesu Mwana wa kwa Lesa?+ 6 Uyu Yesu Kristu e waishiile mu menshi na mu mulopa; te mu menshi fye yeka,+ lelo mu menshi na mu mulopa.+ Kabili umupashi ulabila ubunte pali ifi,+ pantu umupashi e cine. 7 Pantu kwaba ifintu fitatu ifishimika ubunte: 8 umupashi,+ amenshi+ no mulopa;+ kabili ifi fyonse fitatu filanda fye pa cintu cimo cine.

9 Nga tulasumina ubunte bwa bantu, ninshi tufwile no kusumina ubunte bwa kwa Lesa pantu bwena bwalicilapo. Na kuba ubu e bunte bwa kwa Lesa, ubo apeela pa Mwana wakwe. 10 Umuntu uutetekela Umwana wa kwa Lesa alikwata ubunte mu mutima wakwe. Umuntu uushitetekela Lesa ninshi aleti Lesa wa bufi,+ pantu tatetekela ubunte ubo Lesa apeela pa Mwana wakwe. 11 Kabili ubu e bunte bwa kuti Lesa alitupeele umweo wa muyayaya,+ no yu mweo atupeela ukupitila mu Mwana wakwe.+ 12 Nga ca kuti umuntu musambi wa Mwana ninshi alikwata umweo; nga ca kuti umuntu te musambi wa Mwana wa kwa Lesa ninshi takwata umweo.+

13 Namulembela ifi fintu pa kuti mwishibe ukuti mwalikwata isubilo lya kuba no mweo wa muyayaya,+ imwe mwe batetekela ishina lya Mwana wa kwa Lesa.+ 14 Kabili twalicetekela+ ukuti conse ico twalomba, cikulu fye nacilingana ne fyo Lesa afwaya, alatumfwa.+ 15 Kabili nga ca kuti twalishiba ukuti alatumfwa pali conse ico twalomba, tuleshiba no kuti twalakwata ifyo twalomba pantu e o tulombako.+

16 Nga ca kuti umuntu amona munyina alecita ulubembu ulushileta imfwa, akamupepeleko, na Lesa akapeela uyo muntu umweo,+ e kutila, uulecita ulubembu ulushileta imfwa. Kwaliba ulubembu ululeta imfwa.+ Pali ulu lwena nshilemweba ukuti amupepeleko. 17 Ukucita icabipa conse lubembu,+ lelo kwaliba ulubembu ulushileta imfwa.

18 Twalishiba ukuti umwana wa kwa Lesa onse tacita ulubembu, lelo Umwana wa kwa Lesa* alamulinda, kabili umubifi te kuti amwikate.+ 19 Twalishiba ukuti tuli ba kwa Lesa, lelo icalo conse caba mu maka ya mubifi.+ 20 Lelo twalishiba ukuti Umwana wa kwa Lesa alisa,+ kabili alitupeela amano* pa kuti twishibe uwa cine. Twalikatana no wa cine,+ ukupitila mu Mwana wakwe Yesu Kristu. Uyu e Lesa wa cine kabili e ntulo ya mweo wa muyayaya.+ 21 Mwe bana abanono, muletaluka ku tulubi.+