Bushe Ifintu Fikawama Ku Ntanshi?

Abantu balitemwa ukulanda sana pa fya ku ntanshi. Bonse tulafwaya ukwishiba ifyo tukalacita umweshi uleisa, umwaka uleisa, nelyo fye imyaka 10 ku ntanshi. Bushe isonde likaba shani mu myaka 10, 20, nelyo imyaka 30 iileisa?

BUSHE mutontonkanya ukuti ku ntanshi ifintu fikawama? Abengi e fyo batontonkanya, kabili kuti twatila baba mu mabumba yabili: bamo ni balya abashininwa ukuti ifintu fikawaminako, e lyo bambi ni balya abatila ifintu fikawama pantu fye tabafwaya kutontonkanya ukuti tafyakawame.

Kwena, bamo bamona ukuti ifintu tafyakawame. Bamo abamone fyo ni balya abalanda ukuti ku ntanshi kukaba akayofi, kabili balatemwa ukubilisha ukuti isonde likonaulwa. Ukulingana ne fyo batontonkanya batila nga kukaba abakapusuka, ninshi banono fye.

Bushe imwe mutontonkanya ukuti finshi fikacitika ku ntanshi? Bushe mutontonkanya ukuti kukaba ubonaushi ubukalofya abantu bonse, nelyo bushe mutontonkanya ukuti kukaba umutende no mutelelwe? Ni pi isubilo lyenu lyashintilila? Bushe ni pa fya kwelenganya fye, nelyo bushe mwashimpa isubilo lyenu pa bushininkisho ubwa cine cine?

Ukupusana ne fyo abasobela ukonaulwa kwe sonde batontonkanya, abasabankanya uno Loleni! bena tabasumina ukuti abantunse bonse bakaloba. Baibolo itupeela ubushinkisho bwine bwine ubulenga tucetekele ukuti ku ntanshi ifintu fikawama.

[Abatusuminishe Ukubomfya Icikope pe bula 13]

U.S. Department of Energy photograph