Finshi Basuminamo? — Watchtower LAIBRARE YA PA INTANETI

Finshi Basuminamo?

INTE sha kwa Yehova basumina muli Lesa Wa maka yonse, Yehova, Kalenga wa myulu ne sonde. Ukubako kwine ukwa fipesha mano mu bubumbo ifyapikana mu mipangilwe kulangilila ukuti Kalenga wakwatisha amano na maka e walengele ifi fyonse. Kwati fye fintu imilimo ya bantunse ilangilila imibele yabo, e fyaba ne milimo ya kwa Yehova Lesa. Baibolo itweba ukuti “ukufuma ku kulengwa kwa pano isonde ifishimoneka fyakwe—amaka yakwe ya pe na buLesa bwakwe pamo—fyamonekesha, bafiilukila ku fibumbwa.” Ukulundapo, ukwabula ishiwi nelyo ifyebo, “imyulu ilelondololo bukata bwa kwa Lesa.”—Abena Roma 1:20; Amalumbo 19:1-4.

Abantu tababumba inongo nelyo ukupanga ama TV na bakompyuta ukwabula imifwaile. Isonde ne fibumbwa fya liko pamo nge fimuti ne nama fyaba fipapwa icine cine. Umubili wa muntu uwakwata imintapendwa ya nsandensande caba cipesha mano—nangu fye bongobongo uyo tutontonkanishishako aba cipesha mano icine cine! Nga ca kuti abantu balikwata imifwaile ya kupangila ifya kupangapanga ifishingalingana ne fyapanga Lesa, ukwabula no kutwishika Yehova Lesa na o alikwete imifwaile ya kubumbila ububumbo bwakwe ubwa kusungusha! Amapinda 16:4 yasosa ukuti alikwate mifwaile. Yatila: “Yehova alengeele icintu conse ku [mifwaile yakwe, NW].”

Yehova alengele isonde ku mifwaile imo, ukulingana na fintu aebele abantunse ba kubalilapo babili ukuti: “Fyaleni, fuleni, kumaneni pe sonde . . . , mube na bukateka kwi sabi lya muli bemba, na ku fyuni fya mu lwelele, na ku fya mweo fyonse ifyenda pe sonde.” (Ukutendeka 1:28) Pa mulandu wa kubulwa icumfwila, aba babili bafililwe ukwisusha pe sonde indupwa shalungama ishali no kulasakamana bwino isonde ne fimenwa fya liko e lyo ne nama. Lelo ukufilwa kwabo takwalenga imifwaile ya kwa Yehova ukufilwa. Pa numa ya makana ya myaka, calembelwe aciti: “Lesa uwabumbile icalo . . . , tacilengele [ukwabula imifwaile, NW], acibumbile ku kwikalwamo.” Tacakonaulwe, lelo “icalo cikatwalilila umuyayaya.” (Esaya 45:18; Lukala Milandu 1:4, The New English Bible) Ico Yehova apangile isonde cikafikilishiwa: “Ukupanda amano kwandi kukeminina, conse ico mpanga ndacita.”—Esaya 46:10.

E mulandu wine Inte sha kwa Yehova shasuminina ukuti isonde likekalilila umuyayaya no kuti abantu bonse, aba mweo na bafwa, abakalingamo mu kufwaya kwa kwa Yehova ukwa kulenga isonde ukuyemfiwa no kwikalwamo, bakekalamo ku ciyayaya. Abantu bonse balipyana ukukanapwililika ukufuma kuli Adamu na Efa, e mulandu wine babela ababembu. (Abena Roma 5:12) Baibolo itweba ukuti: “Icilambu ca lubembu ni mfwa.” “Aba mweo bantu abaishibo kuti bakafwa, lelo abafwa bantu abashaishiba kantu nangu kamo.” “Umuntu uubembuka e ukafwa.” (Abena Roma 6:23; Lukala Milandu 9:5; Esekiele 18:4, 20) Nomba kuti baisaikalamo shani mwi sonde no kuipakisha amapaalo? Kupitila fye mwi lambo lya cilubula ilya kwa Kristu Yesu, pantu atile: “Ni ne kubuuka kabili umweo: uuntetekela, nangu afwa, akaba no mweo.” “Bonse ababa mu nshishi bakomfwamo ishiwi lyakwe, no kufumamo.”—Yohane 5:28, 29; 11:25; Mateo 20:28.

Cikacitika shani ci? Calilondololwa mu “mbila nsuma ya bufumu,” iyo Yesu atendeke ukubilisha ilyo ali pano isonde. (Mateo 4:17-23) Pali lelo Inte sha kwa Yehova shileshimikila imbila nsuma mu musango uwaibela nga nshi.

[Charti pe bula 13]

IFYO INTE SHA KWA YEHOVA BASUMINAMO

Icisumino Apo Cashimpwa mu Baibolo

Baibolo Cebo ca kwa 2 Tim. 3:16, 17;

Lesa kabili cine 2 Pet. 1:20, 21; Yoh. 17:17

Baibolo yalishintililwapo Mat. 15:3; Kol. 2:8

sana ukucila ifishilano

Ishina lya kwa Lesa ni Yehova Amalu. 83:18; Esa. 26:4; 42:8;

Ukufu. 6:3

Kristu Mwana wa kwa Lesa Mat. 3:17; Yoh. 8:42; 14:28;

kabili alicepako pali Wene Yoh 20:17; 1 Kor. 11:3; 15:28

Kristu e untu Lesa abalilepo Kol. 1:15; Ukus. 3:14