Abanensu Bafwile Ukutemwa Lesa

ABANENSU bantu twatemwa ukulanda na bo kabili abo twatemwa ukuba na bo. Lelo calicindama ukukwata abanensu basuma. Bushe uletontonkanya ukuti cibusa wawamisha twingakwata nani?— Ee, ni Yehova Lesa.

Bushe cine cine kuti twaba ifibusa na Lesa?— Baibolo itila Abrahamu, umuntu uwaliko kale sana, ali “Cibusa wa kwa Lesa.” (Yakobo 2:23) Bushe walishiba umulandu abelele cibusa wakwe?— Baibolo yasuka ukuti Abrahamu aleumfwila Lesa. Aleumfwila nangu ifyo bamweba ukucita fyakosa. E co pa kuba cibusa wa kwa Yehova, tufwile ukucita ifimusekesha, filya fine Abrahamu alecita kabili na filya fine Kasambilisha Mukalamba acita lyonse.—Ukutendeka 22:1-14; Yohane 8:28, 29; AbaHebere 11:8, 17-19.

Yesu aebele abatumwa bakwe ukuti: “Ni mwe banandi, nga mwacite fyo imweba.” (Yohane 15:14) Apo fyonse ifyo Yesu aleeba abantu fyalefuma kuli Yehova, Yesu alelanda ukuti abanankwe bali bantu abalecita ifyo Lesa alanda ukuti bacite. Cine cine, abanankwe bonse batemenwe Lesa.

Bamo abanankwe sana Kasambilisha Mukalamba bali batumwa bakwe, abo wingamona pa fikope pe bula 75 ilya cino citabo. Baleenda nankwe no kumwafwa ukubomba umulimo wa kushimikila. Inshita iikalamba Yesu aleba na ba baume. Baleliila capamo. Balelanshanya pali Lesa capamo. Kabili balecitila ifintu fimbi capamo. Lelo Yesu alikwete na banankwe bambi abengi. Aleikala na bo inshita shimo, kabili baleipakisha inshita baleba pamo.

Ulupwa lumo Yesu atemenwe ukwikala nalo lwaleikala mwi tauni linono ilya Betani, ku nse fye ya musumba ukalamba uwa Yerusalemu. Bushe abali muli ulu lupwa ulebebukisha?— Bali ni Maria, Marita na ndume yabo, Lasaro. Yesu aitile Lasaro ati cibusa. (Yohane 11:1, 5, 11) Umulandu Yesu atemenwe ulu lupwa no kuipakisha ukuba pamo na bene wa kuti batemenwe Yehova kabili Balemubombela.

Ici tacilepilibula ukuti Yesu tali bwino ku bantu abashalebombela Lesa. Ali bwino na kuli bene. Aleya na ku mayanda yabo no kuliila capamo na bene. Ici calengele bamo ukulanda ati Yesu ali “munabo wa bakasangula na babembu.” (Mateo 11:19) Icishinka ca kuti Yesu taleya ku mayanda yabo pa mulandu wa kuti atemenwe imikalile yabo. Alebatandalila pa kuti alande na bo pali Yehova. Aleesha ukubafwa ukuleka ukucita ifintu fyabipa no kutendeka ukubombela Lesa.

Ici cacitike bushiku bumo mu musumba wa Yeriko. Yesu alepita muli ulya musumba ukuya ku Yerusalemu. Kwali ibumba lya bantu, kabili mwi bumba mwali no muntu waleitwa ati Sakeo. Alefwaya ukumona Yesu. Lelo Sakeo ali umwipi, kabili afililwe ukumona Yesu pa mulandu we bumba lya bantu. E co abutukile ku ntanshi no kuyanina icimuti pa kuti amone bwino Yesu ilyo alepita.

Ilyo Yesu afikile pali co cimuti, aloleshe mu muulu no kutila: “Ika bwangu; pantu lelo ndi no kwikala ku mobe.” Lelo Sakeo ali muntu umukankaala uwalecita ifintu ifyabipa. Mulandu nshi Yesu alefwaila ukuila ku ng’anda ya muntu wa musango yu?—

Te pa mulandu wa kuti Yesu atemenwe imikalile ya ulya muntu. Aile ku ng’anda ya kwa Sakeo ku kulanda nankwe pali Lesa. Alimwene ifyo ulya muntu aeseshe na maka ukuti amumone. E co alishibe ukuti napamo Sakeo kuti aumfwa. Iyi yali ni nshita isuma iya kulanda nankwe pa mikalile Lesa alanda ukuti abantu bakwe bafwile ukwikala.

E co, cinshi twamona cilecitika nomba?—Sakeo atemwa ifyo Yesu alemusambilisha. Aumfwa ububi pa kubepa abantu, kabili alelaya ukuti akababwesesha indalama isho takwete insambu sha kusenda. Lyene aba umukonshi wa kwa Yesu. Pa numa ya ico, e lyo Yesu na Sakeo baba ifibusa.—Luka 19:1-10.

Nga twasambilila kuli Kasambilisha Mukalamba, bushe tukalatandalila abantu abashili abanensu?—Ee. Lelo tatwaleya ku mayanda yabo pantu twatemwa imikalile yabo. Kabili tatwalecita nabo ifintu fyabipa. Twakulabatandalila pa kuti tulande nabo pali Lesa.

Lelo abanensu sana ni balya twatemwa ukuba na bo. Pa kuti babe ifibusa fisuma, bafwile ukuba ni balya Lesa atemwa. Bambi napamo tabaishiba na Yehova. Lelo nga balefwaya ukusambilila pali wene, kuti twabaafwa. Kabili nga baisatemwa Yehova filya twamutemwa, lyene kuti twaba ifibusa sana.

Kwaliba inshila na imbi iya kwishibilamo nga ca kuti umuntu kuti aba cibusa musuma. Mona ifintu acita. Bushe alacita ifintu fyabipa ku bantu bambi e lyo alabaseka? Ico te cisuma, bushe te ifyo?— Bushe lyonse alailetelela? Tatwingafwaya atuletelela, bushe te ifyo?— Nelyo bushe alacita ifintu fyabipa ku mufulo no kutontonkanya ukuti alicenjela pantu tabamwikete? Nangu ca kuti ulya muntu tabamwikete, Lesa acimona ifyo acicita, bushe te ifyo?— Bushe uletontonkanya ukuti abantu abacita ifya musango yu kuti baba fibusa fisuma ukukwata?—

Buula Baibolo yobe. Natumone ifyo ilanda pa fyo abanensu bengalenga twalakonka imikalile yabo. Ili lembo ni 1 Abena Korinti icipandwa 15, icikomo 33. Bushe wapasanga?— Paleti: “Mwilufiwa: ukubishanya kubi konaule mibele isuma.” Ici cilepilibula ukuti nga tuleba na bantu ababipa, kuti twaba ababipa na ifwe. Kabili ca cine no kuti ifibusa fisuma fitwafwa ukukwata imibele isuma.

Twilalaba ukuti Umuntu wacindamisha mu bumi bwesu ni Yehova. Tatulefwaya ukonaula bucibusa bwesu na wene, bushe te ifyo?— E co tufwile ukushininkisha ukuti abo twapanga ukuba abanensu ni balya abatemwa Lesa.