Yesu Ayasuka Umulumendo Umukankaala Uwali Intungulushi

Ilyo Yesu alepita mu Perea, pa lwendo lwa kuya ku Yerusalemu, umulumendo wa fyuma alimubutukiile kabili alimufukamiine. Uyu mwaume uwali “intungulushi,” nalimo aali umukalamba we sunagoge nelyo aali mu cilye ca Sanhedrini. Aipwishe Yesu ati: “Mwe Kasambilisha musuma, kuti nacita shani pa kuba no mweo wa muyayaya?”—Luka 8:41; 18:18; 24:20.

Yesu amwaswike ati: “Mulandu nshi wanjitila ati umusuma? Takwaba umusuma nangu umo, kano fye Lesa eka.” Nalimo ico uyu mulumendo aitile Yesu ati “umusuma,” ni co cali mwata ukwita bakasambilisha ukuti abasuma. Nangu ca kutila Yesu aali ni kasambilisha musuma, Yesu alefwaya ulya umwaume eshibe ukuti Lesa e wingetwa fye ukuti “Umusuma.”

Yesu amwebele ukuti: “Lelo nga ulefwaya ukupusuka, ulekonka amafunde.” Na o amwipwishe ati: “Mafunde nshi?” Yesu alandile pa mafunde yasano aya kubalilapo pa Mafunde Ikumi. Atile, wilaipaya, wilacita ubucende, wilaiba, wilaba inte ya bufi, ulecindika wiso na noko. Lyena alandile pe funde lyakulisha pali yonse ilitila: “Uletemwa umunobe nge fyo waitemwa we mwine.”—Mateo 19:17-19.

Umulumendo atile: “Ndakonka ifi fyonse. Bushe finshi fimbi mfwile ukucita?” (Mateo 19:20) Nalimo amwene kwati paali fimo ifisuma ifyaibela ifyo aalingile ukucita pa kuti engaba no mweo wa muyayaya. Yesu ‘alimutemenwe’ pantu aipwishe ici cipusho ukufuma pa nshi ya mutima. (Marko 10:21) Lelo kwali ifyalecilikila uyu mwaume.

Apo alibikile sana amano ku fyuma akwete, Yesu amwebele ati: “Kuli icintu cimo ico ufwile ukucita: Kabiye, kashitishe fyonse ifyo wakwata no kupeela abapiina indalama, kabili ukakwata icuma mu muulu, e lyo wise ube umusambi wandi.” Aalingile ukupeela abapiina indalama, abashali na kumubwesesha, e lyo aaba umusambi wa kwa Yesu. Lelo Yesu afwile alimumfwilile uluse ilyo amwene aima no kufumapo ninshi naumfwa ubulanda. Apo alibikile sana amano ku “fyuma ifingi” ifyo akwete, alifililwe ukubika amano ku cuma ca cine cine. (Marko 10:21, 22) Yesu atile: “Ifyo cikaba icayafya ku bakwata indalama ukwingila mu Bufumu bwa kwa Lesa!”—Luka 18:24.

Abasambi balipapile ilyo baumfwile aya mashiwi e lyo na mashiwi ayo Yesu akonkeshepo ukulanda aya kuti: “Cayangukapo ku ngamila ukupula mu linso lya nshindano ukucila uwa fyuma ukwingila mu Bufumu bwa kwa Lesa.” Aya mashiwi yalengele abasambi bepushe abati: “Nga kanshi nani engapusuka?” Bushe ukupusuka cintu icayafya sana ku bantu? Yesu alibaloleshe e lyo abaasuka ati: “Ifyo abantu bengafilwa ukucita, Lesa ena kuti aficita.”—Luka 18:25-27.

Petro atile bena balicitile ifyo uyu umulumendo umukankaala afililwe ukucita. E ico aipwishe Yesu ati: “Moneni! Twalisha fyonse no kumukonka; finshi ifwe tukakwata?” Yesu amwebele pa mapaalo bakakwata ku ntanshi ilyo atile: “Ilyo ifintu fikabumbwa cipya cipya, ilyo Umwana wa muntu akekala pa cipuna cakwe ica bufumu ica bukata, na imwe bene mwe bankonka mukekala pa fipuna fya bufumu ikumi na fibili, no kupingula imikowa ikumi na ibili iya kwa Israele.”—Mateo 19:27, 28.

Nga fintu twamona, Yesu alelanda pa nshita ya ku ntanshi ilyo ifintu fikabumbwa cipya cipya pa kuti pano calo pakabe nga filya mu Edeni mwali. Petro na basambi bambi bakapeelwa icilambu ca kuteka na Yesu cino calo icikaba Paradaise. Ici cilambu cikalamba sana, kanshi balingile ukubombesha pa kuti fye bakacikwate.

Lelo abasambi baali no kupokelela amapaalo yamo pali ilya ine inshita. Yesu abebele ukuti: “Takuli uwasha ing’anda nangu umukashi nangu bamunyina nangu abafyashi nangu abana pa mulandu wa Bufumu bwa kwa Lesa uushakapokelele ifingi nga nshi mu nshita ino, na ku ntanshi, umweo wa muyayaya.”—Luka 18:29, 30.

Ca cine, konse uko abasambi baleya, baali no kulasangako bamunyinabo, bakapepa banabo ababatemenwe sana ukucila fye ne fyo balupwa lwabo babatemenwe. Icabipileko ca kuti ulya mulumendo umukankaala, nalimo taali na kukwata aya amapalo e lyo ne paalo lya kuba mu Bufumu bwa kwa Lesa ubwa ku muulu.

Yesu atile: “Lelo abengi aba ntanshi bakaba aba kulekelesha, na ba kulekelesha bakaba aba ntanshi.” (Mateo 19:30) Bushe aloseshe mwi?

Ulya mulumendo umukankaala ali pa ba “ntanshi,” pantu na o aali ni ntungulushi ya baYuda. Apo alekonka amafunde ya kwa Lesa, nga kukonka aalingile ukuba pa bengengila mu Bufumu bwa kwa Lesa. Na lyo line, abikile sana amano ku fyuma fyakwe. Lelo abantu yaweyawe balimwene ukuti Yesu alebasambilisha icine ne fingalenga bakwata umweo wa muyayaya. Baali aba “kulekelesha,” lelo baishileba aba “ntanshi.” Balikwete isubilo lya kwikala pa fipuna fya Bufumu ku muulu, uko bakalateka na Yesu lino isonde ilikaba Paradaise.