Ubusuma Bwaba mu Kunakila Ubutungulushi bwa kwa Lesa

UKUNAKILA Lesa uwalinga ukuteka ku muulu na pano isonde kwalicindama pa kuti tuteyanishiwe bwino ku kubomba umulimo wa kwa Yehova. Tulingile no kulanakila Umwana wakwe, uwaba e mutwe wa cilonganino ca Bena Kristu. Calicindama ukulanakila bumutwe ubo Lesa ateyanya na mu nshila shimbi. Mwaliba ubusuma mu kunakila ubutungulushi bwa kwa Lesa.

² Lesa abikileko ubutungulushi bwakwe mwi bala lya Edeni. Ubu butungulushi bwamonekele mu mafunde ayo apeele Adamu na Efa ayalembwa pa Ukutendeka 1:28 na 2:16, 17. Inama shali no kulatekwa na bantu, e lyo Adamu na Efa nabo bali no kulanakila Lesa no kulacita ukufwaya kwakwe. Ukunakila ubutungulushi bwa kwa Lesa kwali no kulenga kwaba umutende, kabili ifintu fyali no kulaenda bwino. Mu kuya kwa nshita, ifunde ililanda pali bumutwe lyalilembelwe pali 1 Abena Korinti 11:3. Umutumwa Paulo alembele ukuti: “Ndefwaya mwishibe ukuti umutwe wa mwaume onse ni Kristu; no mutwe wa mwanakashi mwaume; no mutwe wa kwa Kristu ni Lesa.” Ili ilembo lilanga ukuti ifibumbwa fyonse fye, ukufumyako fye Yehova, fyalikwata uo filingile ukulanakila.

³ Abantu abengi muno nshiku, tabacindika bumutwe ubo Lesa abikako, nelyo tabafwaya fye ukukonka ifyo atantika. Cinshi calenga? Ubwafya bwatendekele mu Edeni ilyo abafyashi besu aba kubalilapo bakeene ukulatungululwa na Lesa ku mufulo fye. (Ukute. 3:4, 5) Nangu bakeene ukulatungululwa na Lesa, tabakwete ubuntungwa ubo balefwaya, lelo batendeke ukutungululwa no mubifi, Satana Kaseebanya. Filya bapondweke fyalilenga abantu bataluka kuli Lesa. (Kol. 1:21) Ne ci calenga ukuti abantu abengi baletungululwa no mubifi.—1 Yoh. 5:19.

⁴ Pa mulandu wa kuti tulasambilila Icebo ca kwa Lesa kabili tulakonka ne fyo tusambilila, tatutungululwa na Satana. Apo twali-ipeela kuli Lesa kabili twalibatishiwa, twalisumina ukutila Yehova uwalinga ukuteka e o aletutungulula. Twalisumina ukuti filya Imfumu Davidi yalandile ati Yehova ‘alikulisha ukucila bonse,’ fya cine. (1 Imila. 29:11) Twalishininkisha no kuti, “Yehova e Lesa. E watupangile, tatwaipangile fye iyo kabili tuli bantu bakwe kabili tuli mpaanga isho aliisha umulemfwe.” (Amalu. 100:3) Twalishiba ati Yehova alikwatisha amaka kabili tufwile ukulamunakila, pantu e wabumbile ifintu fyonse. (Ukus. 4:11) Fwe babomfi ba kwa Lesa wa cine, tupashanya Yesu Kristu uwalenakila sana Lesa.

⁵ Finshi Yesu asambilile ku fyo aculileko ilyo ali pano isonde? Ilembo lya AbaHebere 5:8 litila: “Nangu ali mwana, asambilile icumfwila ku fintu aculileko.” Na lintu Yesu alecula, alitwalilile ukunakila Wishi wa ku muulu. Na kabili Yesu tacitilepo akantu umwine eka. Talelanda ifyakwe nelyo ukufwaya ukuti abantu balemucindikisha. (Yoh. 5:19, 30; 6:38; 7:16-18) Ilyo ali pano isonde alecita fye ukufwaya kwa kwa Wishi, nangu ca kuti abantu balemulwisha no kumucusha. (Yoh. 15:20) Yesu atwalilile fye ukunakila Lesa, kabili “ali-iceefeshe” ukufika na “ku mfwa pa cimuti.” Filya Yesu atwalilile ukunakila Yehova, e calenga ukuti abantunse bakabe no mweo wa muyayaya, calenga no kuti Wishi amusansabike, e lyo no kulenga Wishi acindikwa.—Fil. 2:5-11; Heb. 5:9.

⁶ Nga tulenakila Lesa, tatukwata amasakamika na mafya ayo abakaana ukunakila Yehova bakwata. Umulwani wesu Satana Kaseebanya, lyonse fye afwaya ukutulya. Lelo tukacingililwa kuli uyu mubifi nga ca kuti twamukaanya no kuitemenwa ukulanakila Yehova.—Mat. 6:10, 13; 1 Pet. 5:6-9.

⁷ Mu cilonganino ca Bwina Kristu, tulanakila Kristu umutwe wa cilonganino, e lyo no “musha wa cishinka kabili uwashilimuka” uo asonta ukulatutungulula. Ukunakila Yesu no musha wa cishinka kulakuma ifyo tumona ifintu, kabili kulalenga tuleumfwana na ba bwananyina. Nga tulekonka ubutungulushi bwa kwa Lesa mu cilonganino, cikatwangukila ukulakonka fyonse ifyo Icebo ca kwa Lesa citweba ifyakuma ukupepa. Pali ifi paba no kulabombako umulimo wa kubila imbila nsuma, ukulaya lyonse mu kulongana no kula-asukapo, ukulabombela pamo na baeluda, e lyo no kulabombela pamo ne cilonganino ca kwa Lesa.—Mat. 24:45-47; 28:19, 20; Heb. 10:24, 25; 13:7, 17.

⁸ Ukunakila Lesa kulalenga twaba no mutende, twacingililwa, kabili kulalenga ifintu ukulaenda bwino mu cilonganino ca Bwina Kristu. Imibele ya kwa Yehova ilamonekela mu fyo ababomfi bakwe abamunakila bacita. (1 Kor. 14:33, 40) Ukumona ifyo icilonganino ca kwa Yehova citungululwa, kwalenga tulelanda nga filya Imfumu Davidi yalandile ilyo yamwene ubupusano bwali pa balebombela Yehova na babifi. Yatile: “Abapaalwa bantu abo Yehova e Lesa wabo!”—Amalu. 144:15.

⁹ Mu cupo e lyo na mu lupwa, “umutwe wa mwanakashi mwaume.” Abaume nabo bafwile ukulanakila Kristu, e lyo Kristu na o anakila Lesa. (1 Kor. 11:3) Abakashi bafwile ukulanakila abalume babo, abana nabo bafwile ukulanakila abafyashi babo. (Efes. 5:22-24; 6:1) Mu lupwa mulaba umutende nga ca kuti aba mu lupwa balenakila umutwe.

¹⁰ Umulume afwile ukuba no kutemwa ilyo aletungulula ulupwa lwakwe. Nga alecita ifi, ninshi alepashanya Kristu. (Efes. 5:25-29) Umulume nga aletungulula bwino ulupwa lwakwe, nelyo nga talekeleshe umulimo akwata uwa kutungulula ulupwa lwakwe, umukashi wakwe e lyo na bana kuti balemunakila. Umulimo umwanakashi uwaupwa akwata, wa kwafwa umulume, pantu munankwe. (Ukute. 2:18) Nga ca kuti umukashi aletungilila umulume wakwe, alemucindika no ku mucindika, umulume kuti amutemwa sana kabili kuti alenga na Lesa acindikwa. (1 Pet. 3:1-4) Abaupana nga balekonka ifyo Baibolo yalanda pa kunakila bumutwe, ninshi balesambilisha na bana babo ukulanakila Lesa.

¹¹ Ukunakila Lesa kulatwafwa no ‘kulanakila ubuteko,’ pantu ‘ni Lesa e wasuminisha ukuti bubeko.’ (Rom. 13:1-7) Apo Abena Kristu balakonka amafunde ya calo bekalamo, balalipila imisonko, e kutila ukupeela “ifya kwa Kaisare kuli Kaisare, ne fya kwa Lesa kuli Lesa.” (Mat. 22:21) Na kabili ilyo balebomba umulimo wa kubila imbila nsuma, balakonka amafunde yalanda pa fya kubomfya no kusunga ifyebo pa bantu. Ukunakila ubuteko no kukonka amafunde ya calo ayashilwishanya na mafunde ya kwa Lesa, kulalenga tulebomba bwino umulimo wa kubila imbila nsuma.—Marko 13:10; Imil. 5:29.

¹² Muli fyonse ifyo tucita tulingile ukulalanga ukuti tulanakila Lesa. Apo twaliba ne citetekelo, tulafwaisha ukumona ilyo abantu bonse bakalanakila Yehova Lesa. (1 Kor. 15:27, 28) Bonse fye abaishiba ukuti Yehova e walinga ukuteka pano isonde na mu muulu kabili abakatwalilila ukumunakila, bakapaalwa nga nshi!