Bakabilisha ba Bufumu Bacita Lipoti

Ukupokelela Imbila Nsuma mu Belgium

“NI NANI uwamonapo ifintu ukupale fi?” e fyasosa iofesi lya musambo ilya Nte sha kwa Yehova mu Belgium. (Linganyeniko Esaya 66:8.) Ici calo cayemba cacita lipoti icipimo ca pa mulu ica bakasabankanya 24,464 ica mwaka wa mulimo uwa 1989. Kwaliko na kabili ukwingilishiwako kwa avareji wa 4 peresenti uwa mpendwa uwa abo abaleakana mu mibombele ya kushimikila cila mweshi.

◻ Imbila nsuma iibilishiwa ne Nte sha kwa Yehova yalipokelelwe kuli shimapepo wa ciKatolika uo pa Minsa ya pa Mulungu asosele ku baya ku calici bakwe ukuti: “Nga ca kuti Inte sha kwa Yehova baisa pa mwinshi obe, beswile ciibi. Balikwate cine!” Ici mu kulungika e cintu umwanakashi umo acitile. Ilintu Inte baishile, alibeswilile iciibi no kupokelela icitabo Life—How Did It Get Here? By Evolution or by Creation? Pa numa afwaile icitabo Kuti Waikala Kuli Pe na pe muli Paradise Pe Sonde. Isambililo lya Baibolo lyalitedekwe na wene, lelo umulume wakwe tailundilemo. E co munyina alimutumine lamya no kumwipusha nga ca kuti kuti afwaya ukwikala no mukashi wakwe mu calo cawaminako? Nge ca kufumamo, ailudile kwi sambililo. Abaupana baleikala pamo ukwabulo ukuupana kwa mwi funde, lelo balembeshe mwi funde ukulundana kwabo kabili mu kwangufyanya balibatishiwe.

◻ Icine caalwile ubumi bwa mukashana. Ilyo ashilaba ne myaka 14 iya bukulu, ashele eka. Akumenye umulumendo kabili aikele nankwe mu calo ca cimfulumfulu, ukunwa imiti ikola no kulangisha umupashi wa lukakala. Lyene umulumendo alifwile mu busanso bwa pa musebo. Ici cashile umukashana mu kuba no kubongoloka kukalamba ukwa nkuntu, kabili alangulwike ukuipaya. ‘Ni kwi ningasanga ukupikulula kwa mpika yandi?’ e fintu apapile. Akumenye umuntu uwalebelesha ukupupe mipashi uwamulengele ukusumina ukuti kuti akumanya umunankwe wafwa. Baeseshe ukulalikisha no kwiluka ukufuma ku maka ya ku nse. Pa kukanasanga ukusansamushiwa kwaenekelwe ukufuma muli ici, atendeke ukuponena mu kupopomenwa kwashika na kabili. Pa myeshi yafulilako aikele eka umupwilapo. Lyene umo uwa Nte sha kwa Yehova alimukumenye no kwesha ukumwaafwa lwa ku mupashi. Pa kashita ici cacitilwe ukupitila muli kalata, kabili mu nshita ifintu fyaliwamineko pa numa ya kubombesha kukalamba no kukoselesha pa lubali lwakwe. Nomba alilubwilwe ukufuma ku kusonga kwa fibanda, ukufuma ku cibelesho ca kupeepa fwaka, no kufuma mu kuyumfwa uwa mulandu ukwashika. Ilintu inshita yalelunduluka, ukwishiba kwafulilako ukwa Baibolo no mupashi wa kwa Yehova fyalimwaafwile apakalamba. Na Kabili, ukulongana kwalimukoseleshe, ilintu mu mukoosha alepekanishisha kwene. Nomba alibatishiwa kabili alikwata umupashi wa bupainiya. Kale kale aletungulula amasambililo ya Baibolo ayafulilako, limo ilya yene na nyina, uyo nomba uusangwa ku kulongana. Mu cine cine, Yehova alimwaafwa!

◻ Abo abashukila ishuko lya mu nshita mu sukulu baipakisha ukutunguluka kusuma mu kwananya imbila nsuma. Umukashana umo mu sukulu mu Belgium apeelwe ulubali lwa kulandapo pa lyashi lya kusalapo kwakwe. Apingwilepo ukulanda pa lwa Nte sha kwa Yehova ne fisumino fyabo, ukushimpa ifyebo fyakwe pali broshuwa ya Inte sha kwa Yehova mu Mwanda wa Myaka Uwalenga Amakumi Yabili. Profesa wakwe alyebekeshiwe. Pa numa ya kupeele lyashi lyakwe kwi kalasi, abasambi balisuminishiwe ukwipusha ifipusho. Abanankwe abengi aba mwi kalasi pa numa abaipwishe ico bali no kucita pa kuti bengekala muli Paradise ya kwa Lesa iyalumbwilwe mu lyashi lyakwe. Abengi, ukusanshako profesa, bafwaile amakope yapusanapusana ayo nkashi akwete. Amakalasi yambi yaipwishe ku lwa mabroshuwa ne fyebo fyafulilako, kabili profesa wa butotelo abebetele amabroshuwa no kuyatasha kwi kalasi lyakwe.

Incitilo yashipa iya kwa nkashi yesu wacaice yalipaalilwe. Amabroshuwa amakumi yabili na yatatu yalyananishiwe kuli baprofesa babili na ku basambi abengi; umusambi umo, pa numa abe naumfwa pa lwa lyashi, aipwishe ku fyebo fya kulondolola umulimo wa Nte sha kwa Yehova mwi kalasi lyakwe.

Abengi balepokelela imbila nsuma mu Belgium. Balapokelela Icebo ca kwa Lesa, te pamo nge “cebo ca bantu, lelo ifyo cili cine cine, icebo ca kwa Lesa. Kabili cibombela muli imwe mwe batetekela.”—1 Abena Tesalonika 2:13.