Lintu Imfwa Yasenda Umutemwikwa

“MU 1981 mayo afwile kuli kansa. Aali mayo wa kulela. Imfwa yakwe yalinkosele nga nshi na ndume yandi wa kulelwa. Nali ne myaka 17, kabili ndume yandi aali ne myaka 11. Nafulwike mayo apakalamba nga nshi. Nakushiwe Katolika, kabili pa kusambilishiwa ukuti aali mu mulu, kwena, nafwaile ukuipaya pa kuba nankwe. Aali cibusa wandi wawamisha.”—Roberta, uwa myaka ya bukulu 25.

Bushe walikwatapo icakukumanya capalako? Nga ni fyo, waliishibila we mwine ukukalipwa ukwendela pamo no kulufya kwa mutemwikwa. Cimoneka ukuba ulufyengo nga nshi ukuti imfwa ilingile ukukwata amaka ya kusenda umuntu umo uo watemwa. Kabili lintu cacitika, itontonkanyo lya kukanakwata amaka na kabili aya kulanda, ukuseka, nelyo ukwikata umutemwikwa obe kuti lyaba ilyacilishapo kwafya ukushipikisha. Kabili nga fintu amashiwi ya kwa Roberta yalangilila, uko kukalipwa takufuutwa ku kwebwa ukuti umutemwikwa obe ali mu mulu.

Ni shani, nangu ni fyo, fintu wingayumfwa nga ca kuti walishibe fyo kuti cacitika ukwikatana cipya cipya no mutemwikwa obe uwafwa mu nshita ya ku ntanshi ipaleme, iyo, te mu mulu lelo pano pene pe sonde pe samba lya mibele ya mutende, iyalungama? Kabili ni shani nga ca kuti waishibe na kabili ukuti pali ilya nshita abantunse bakakwata icilolelo ca kuipakisha ubutuntulu bwa bumi bwapwililika kabili ukuti tabakabale abafwa? ‘Mu kushininkisha kutontonkanya kwa kuikopeka fye!’ e fintu pambi wingasosa.

Nalyo line, ku numa mu mwanda wa myaka wa kubalilapo C.E., Yesu Kristu mu kushipa alondolwele ukuti: “Ni ʼne kubuuka kabili [ubumi, NW]: uuntetekela, nangu afwa, akaba no [bumi, NW].” (Yohane 11:25) Ico cali cilayo ica kuti abafwa bakaba abomi na kabili—icilolelo ca kucincimusha mu cine cine!

Nakalimo, nangu ni fyo, ulepapa ukuti: ‘Bushe kuliko icishinte cituntulu ku kusumina mu cilayo ca musango uyo? Ni shani fintu ningashininkisha ukuti tacili kutontonkanya kwa kuikopeka fye? Kabili nga ca kuti kuliko icishinte ku kusumina cene, cinshi cintu pambi ukufikilishiwa kwa ici cilayo kwingapilibula kuli ine na batemwikwa bandi?’ Icipande cakonkapo cikalanda pali ifi ne fipusho fimbi.