Bakabilisha ba Bufumu Bacita Lipoti

Ukushimikila Imbila Nsuma “Ukufika ku Mpela ya Pano Nse”

“Ne mbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.” Ifyo e fyalandile Yesu ku basambi bakwe mu kwipipa pa ntanshi ya mfwa yakwe. Mu kwangufyanya pa numa ya kubuushiwa kwakwe, mu kukonkapo atile: “Mukabe nte shandi mu Yerusalemu, na monse mu Yudea na Samaria, no kufika ku mpela ya pano nse.” (Mateo 24:14; Imilimo 1:8) Ilelo, aya masesemo yaleisushiwa ukucila mu fyalo 200, ukusanshako icalo ca mu South America ica Peru.

Ukucila pa Nte 32,000 baleshimikila imbila nsuma muli cilya calo cayemba, kabili icifulo cabo mu kushininkisha cisanshamo impela ya pano nse: Andes wasansama, ukufika ku butali bwa pa kati ka mamita 4,000 na 4,500, pamo pene ne teshi lyakaba ilya Amazon, uko abantu bengafikwapo fye na mato. Umusambo wa ku Peru wacita lipoti ukuti:

◻ “Mu ncende ya mateshi, twakwata bapainiya baibela cinekonsekonse abapeelwa amato yanono ayetwa lanchas. Aya mato yanono kuti yaenda pa menshi amamililita 0.3 aya menshi, e co kuti cacitikako ukutanununa ukushimikila kwa mbila nsuma mu ncende ishingi ishipya pa mimana inono. Ukufika pali nomba, bamunyina ababomfya aya mato balishalika imyanda ya makana ya bamagazini, ifitabo, na maBaibolo konse konse mu Mupokapoka wa Amazon uwa ku Peru. Nge ca kufumamo ca mu kulungatika, ifilonganino fine ifipya fyalimikwa, capamo na mabumba yasano ayaba yeka ayo ayacita lipoti imibombele no kulongana. Cilesubilwa ukuti aya mabumba mu kwangufyanya yakaba filonganino.”

◻ Itauni limo ilyabela mwi teshi lyalikulile ukushinguluka icitesheni ca mupaipi upompa amafuta ica Trans-Andes, icitwala amafuta ukufuma mwi teshi ukuninika Andes yasansama ukufika ukwalepa nga ku lulamba lwa ku masamba. Pa mulandu wa kubapo kwa babomfi ba mupaipi wa mafuta, ili tauni lyakwete ifikuulwa fya bwalwa 20 kabili lyaishibikwe nge cifulo ca kukolelwamo no kukwate nshita isuma. Nangu cibe fyo, pa numa bapainiya baibela bapeele ubunte bwakumanina, abengi balyankwileko ku bukombe bwa Bufumu, kabili nomba kwashala fye ifikuulwa fine ifya bwalwa mwi tauni! Mu kati ka kutandala kwa nomba line ukwa kwa kangalila wa muputule, abantu 189 baishile ku lyashi lya cintubwingi. Nomba kwaliba ibumba lya bakasabankanya 7 mwi tauni, kabili ukucila pa bantu 45 balasangwa ku kulongana konse. Mu kwangufyanya, mu kuba ne paalo lya kwa Yehova, cilingile ukuba icilonganino.

◻ Muli cimo ica filonganino 221 mu musumba ukalamba uwa Peru, Lima, umwaume uwa myaka ya bukulu 29 atweba ifyo apokelele icine. Pa kuba naleka isukulu pa mushinku wa 13, ailundile kwi bumba lya bacintomfwa no kutendeka umulimo wa kulwa, ukunwe miti ikola, no kubelesha bucisenene. Pa numa ya myaka ibili iya mulimo wa bushilika uwa kupatikisha, atendeke ukukwata impika ya muntontonkanya. Lyene, mu 1983, nkashi waicefya, uwaishininkisha aile kuli wene mu kati ka butumikishi bwakwe ubwa ku ŋanda ne ŋanda. Pa muku wa kubalilapo, aumfwile pa lwa calo cipya icakwatamo ukutemwa no mutende. Isambililo lya Baibolo lyalitendekwe, kabili mu kuba no kwaafwa kwabamo ukutemwa ukufuma ku cilonganino kabili na mu maka ya kwa Yehova, aali na maka ya kucimfya ububi bwakwe. Mu 1986 alibatishiwe kabili nomba abomba ngo mubomfi utumikila mu cilonganino.

Mu cine cine, amashiwi ya kwa Yesu aya kuti Ubufumu bukashimikilwa “ukufika ku mpela ya pano nse” yaleisushiwa mu Peru mu kuba ne fya kufumamo fyawamisha, ku kumwenamo kwa bengi muli cilya calo abali ne nsala ne cilaka ca cine.