“Ininga ya Fipondo” iya Muno Nshiku
MULI magazini ya Natural History, profesa waishibishe fya ntulo sha bantu Colin Turnbull ashimike icakukumanya cakwe ngo mutandashi mu Yerusalemu. Asosele ukuti “umupashi wa Krisimasi” uo atendeke ukulundulula “mu kwangufyanya walinashiwe” ilintu amwene amatuuka ya mu musumba “yaiswilemo ifya buwelewele ifyaleshitishiwa pa mutengo wasumbana kuli bakashita ba Krisimasi (abatandashi) abamoneke ukucincishiwa no mupatikisha wa kushita.”
Turnbull asosele pa lwa “mupashi wakwe uwa Krisimasi” ukuti: “Na kabili [walifuminemo] mu cifulo cimo ico natontonkenye ukuti pambi kuti capupuutula [wene]—inshishi ya Holy Sepulcher.” (Ukumoneka kwa mu kati kulemonwa pa mulu.) Kulya, imibele ya batandashi banankwe “abamoneke ukulangisha ukubulwo mucinshi kwamonekesha ku fyashila” yalimufuupwile ilintu “balesunka no kusunkana mu nshila ishili ya Bwina Kristu nga nshi, ukubomfya ifipeya ne nkonkoni ku kwingila ukupula pa bwingililo bunono ubwa sepulcher (inshishi) ine. Mu tushita mu tushita ukulwa kunono kwalimineko, ukwakonkelwepo no kutukana no kulangisha kwa maboko ifyo ifyali ifyapusanako no kushila.”
Mu cifulo ca “kubwesha cipya cipya umupashi wa kushisha,” Turnbull asosele ukuti, bashibutotelo baletungulula “bafumishepo ukwelenganya ukuli konse ukwa bumushilo pa kwimika abene icipasho ca mibele yakaluka.” Ashimike ulwa “umuntu umo uwafwala tambatamba yafiitulukila, mu kuba ne cifimbo uwapala Rasputin,” uyo “mu cilumba watamfishe abatandashi yaweyawe ukufuma pa bwingililo bwa sepulcher cila nshita ilyo ibumba lya batandashi ba malipilo yasumbuka, abasenda amakandulo (abetwa aba nyendo sha butotelo) lyaishile, ilyatungulwilwe na umbi Rasputin.” Ica kufumamo, e fyasosele kasambilisha, caali “bulwani pa kati ka bashisenda makandulo na basenda amakandulo, capamo na pa kati ka bashibutotelo balekanalekana, nge fyo camoneke ukukanabako impela ya kukonkana kwa fyakaniko filwishanya ukucimfyanya ku nshita ne cifulo.”
Umunankwe wa kwa Profesa Turnbull aali “amamita yanono ukutalukako pa mpela ya mfuba, nafukama, nabelama citika mu cipunda ca cibumba.” Turnbull ashimike ukuti: “Ilintu naletamba, ukuboko kwakwe ukwa kulyo kwalifumine no kupampanta indalama mwi tumba lyakwe, lelo ukuboko kwakwe kumo kwashele mu kati, ukwatambululwa kwati naikatwa. Ilyo akuushishe indalama mu kati ka cipunda, nangu cibe fyo, ukuboko kwakwe ukwa ku kuso kwalikakwilwe kabili cibusa wandi aliminine . . . Ku kuboko kwakwe ukwa kuso aikete umusalaba wa cimuti uwapala maikroskopo, uwabomba apo wasanshilwe na yatunganishiwa ukuba amenshi ya mushilo ku mushimbe wa butotelo uwakwete uko kulumbulula kabili uwabeleme mu kati ka lucengo lunono, ukulolela icinakabupalu.”
Yesu Kristu amwene imibele yapalako ku bantu baali abasonga mwi tempele, kabili abebele ukuti balelyalwila ku kube “ninga ya fipondo.” (Luka 19:45, 46) Kwena, mu kasuba kesu ‘ininga sha fipondo’ isha musango yo tashapeleshiwa fye ku Yerusalemu.
[Abatusuminishe Ukubomfya Icikope pe bula 25]
Pictorial Archive (Near Eastern History) Est.