Bushe Uleibukisha?

Bushe walitesekesha ukubelenga ishafuma isha nomba line isha Ulupungu lwa kwa Kalinda? Cisuma, mona nga wingasuka ifipusho fyakonkapo:

▫ Kwaafwa nshi kubomba ukwingapeelwa ku balwala na bakoloci mu kati ka cilonganino ilelo?

Mu cilonganino ca Bwina Kristu ica mu kubangilila, umutande walisungilwe uwa bamukamfwilwa abali mu kukabila ukwaafwa kwa ku mubili. (1 Timote 5:9, 10) Mu nshila imo ine ilelo, baeluda kuti bapanga umutande wa balwala na bakoloci abalekabila ukusakamana kwaibela. Nangu cibe fyo, tacilingile ukushiwa kuli baeluda beka ukuitendekelako muli ulu lubali. Bonse mu cilonganino bafwile ukuba abaibukila ulwa kukabila kwa musango yo. (1 Timote 5:4-8)—8/15, amabula 28-9.

▫ Bushe ilyashi lya mu Baibolo ilya kwa Yona ukuminwa ku cinama ca mu menshi lyaba ilishingasuminwa?

Iyo, atemwa sperm whale, icisabi cikalamba white shark, nelyo whale shark kuti fyamina umuntu. Mu kulundapo, Yesu umwine ashininkishe ukuti icalembwa ca kwa Yona ca cine. (Mateo 12:39, 40)—8/15, ibula 32.

▫ Kucena nshi kufuma mu kubomfya kwa kutiine mipashi ukwa mpimpi ne fipuuta?

Ukubomfya kwa fiko mu cishinka kulafuupula abantu ku kulolenkana ne mpika shabo mu kulamuka kabili kubakoselesha ukulolesha kwi shuko ngo kundapa fye. Na kabili kupeela uulebomfya ukuyumfwa kwa cimbepa ukwa mutelelwe. Icacilapo kucindama, umuntu uwabika icitetekelo mu maka ya mpimpi sha maleele ne fipuuta fye shuko kuti pambi alekela ukulama kwa bumi bwakwe ku maka yashimoneka aya fibanda.—9/1, ibula 4.

▫ Fisolobelo nshi fine ifingalenga icupo ukube cibelelela?

Ifi fyaba kuitemenwa ukukutika, amaka ya kulombo kwelelwa, amaka ya kupayanya ukutungilila kwa mu nkuntu ukwa lyonse, no kufwaisha kwa kukumya mu cintemwa. (1 Abena Korinti 13:4-8; Abena Efese 5:33; Yakobo 1:19)—9/1, ibula 20.

▫ Ni nshila nshi imo intu Yehova apelelamo ukushipikisha kuli abo abakumanya ifya kwesha?

Yehova alacite ci ukupitila mu fya kumwenapo fya kushipikisha ifyalembwa mu Cebo cakwe, Baibolo. (Abena Roma 15:4) Lintu twalanguluka ifi, tulakoseleshiwa ukushipikisha, na kabili tulasambilila ifingi pa nshila sha kushipikishishamo.—9/15, amabula 11-12.

▫ Ukuipeelesha kwa bukapepa cinshi?

Ukuipeelesha kwa bukapepa kulosha ku kuipeelesha kuli Yehova uko kutusesha ukucita icili ica kutemuna kuli wene, nelyo fye mu kulolenkana ne fya kwesha fyayafya, pa mulandu wa kuti twalitemwa Lesa ukufuma ku mutima.—9/15, ibula 15.

▫ Ni shani fintu tulingile ukumona inkumbu sha kwa Lesa?

Tatulingile ukusenda mu kwanguka inkumbu shikalamba isha kwa Lesa. Tufwile ukuba nga Paulo no kulanga ukutesekesha kwesu pa kulwisha ukukanapwililika kwesu kwine. (1 Abena Korinti 9:27) Muli iyi nshila tukalanga, nelyo fye mu kulolenkana na mafya, ukuti twalikwata ukufwaisha kwa cine cine ukwa kucite calungama.—10/1, ibula 23.

▫ Mulandu nshi cabela icalinga ukuti Paulo atantike ukushishimisha ngo lubali lwa kubalilapo ulwa kutemwa?

Calisoswa ukuti te kuti kubeko icintu ca musango yo pamo nga ukubishanya kwa Bwina Kristu ukwabulo kushishimisha, nelyo ukwabula ukushipikishanya mu kutekanya. Ico cili ifyo pa mulandu wa kuti ifwe bonse tatwapwililika, kabili ukukanapwililika kwesu no kupelebela kwesu kwesha bambi. E ico, ukushishimisha kwaliba ukwakatama nga ukutemwa kuli no kubapo pa kati ka bamunyina.—10/15, ibula 21.

▫ Bushe Abena Kristu ba kubalilapo balebomfya ishina lya kwa Lesa?

Ubushininkisho butila ee. Yesu asambilishe abakonshi bakwe ukupepa kuli Lesa ati: “Ishina lyenu libelwe akatiina.” (Mateo 6:9) Kabili pa mpela ya butumikishi bwakwe, apepele ati: “Nalange shina lyenu ku bantu abo mwampeelepo aba pano isonde.” (Yohane 17:6) Pa mbali ya ico, amakope ya mu kubangilila aya Septuagint yakwetemo ishina lya kwa Lesa mu musango wa Tetragrammaton wa ciHebere.—11/1, ibula 30.

▫ Fya kumwenapo nshi ifya mu Baibolo ifilango kuti inshila tubombelamo ne filubo fyesu kuti yaambukila ubumi bwesu?

Imfumu Shauli muli bunkosamutwe acincintile ukufunda, kabili ifilubo fyakwe fyalifulile, mu kupelako ukufumamo imfwa yakwe mu kubulo kusenamina kwa kwa Lesa. (1 Samwele 15:17-29) Pa lubali lumbi, te mulandu ne filubo fyakwe ne membu, Imfumu Davidi mu kulapila apokelele ukulungikwa kabili atwalilile uwa busumino kuli Yehova. Ifi fya kumwenapo fya mu Baibolo filanga ukuti ukusumina ifilubo fyesu kulatwaafwa ukusungilila ukwampana kusuma na Lesa na muli fyo ukukwata icilolelo ca bumi bwa muyayaya. (Ilumbo 32:1-5)—11/15, amabula 29-30.

▫ Ni shani fintu Yehova esa mu kwaafwa abantu bakwe lintu bali mu kumanama pa mulandu wa tuyofi twa cifyalilwa nelyo ifilenga fimbi?

Yehova alaafwa, tacili ni mu cipesha amano ukucincintila amaka ya mu fintu Lesa apanga nelyo ku ncitilo imbi iyacilo buntunse, lelo ni ku maka yambi ayo abantu abengi mu cine cine tabomfwikisha—ukutemwa. Ee, Yehova mu cine cine alitemwa abantu bakwe, kabili alilundulula ukutemwa pa kati kabo mu kucilapo nga nshi ica kuti aliba na maka ya kubapwishishishako icimoneka ukuba icipesha mano. (1 Yohane 4:10-12, 21)—12/1, ibula 10.