Akanono Lelo Akakwatisha Amaka

ROBERT, umulumendo ukufuma ku Canada, alelulumba ukupulinkana Europe mu kusapika imifwaile ya bumi. Amwene ifintu ifingi ifyo fyamulengele ukuyumfwa uwapelelwa pa lwa nshita ya ku ntanshi.

Ilintu aali naikala pa cifulo ca kuliilapo utwa kulya twa kupembesula mu Seville, Spain, Robert alipeelwe trakiti uwasabankanishiwa ne Nte sha kwa Yehova. Pa kubalilapo, Robert aali uwa mintelengu. “Nangu ni fyo, nalibelengele wene,” e fyo asosele. “Te kuti ncilondolole, lelo naumfwile icintu cimo caumfwika bwino. Ilyo naleendauka, nalimwene imisango iingi iya kupopomenwa kwa buntunse no kubongoloka, kabili nalikalipe pa kubulwa amaka ya kwalula ifintu. Pa numa ya kubelenga trakiti, nalangulwike ukuti, ‘Bushe ici “calo cipya” cili no kubako?’ Lyene, natontonkenye ukuti, ‘Ee, pambi cikabako.’”

Mu kuba ne subilo lyabukululwa, Robert alembele iofesi lya Nte sha kwa Yehova mu Canada, ukulomba ukuti umuntu umo akamutandalile ilyo akabwelelamo no kumwaafwa ukumfwikisha Baibolo.

Ukwabulo kutwishika, amashiwi ya pa kanwa yalikwatisha amaka. Nangu cibe fyo, te kwesha ukucefya amaka ya bukombe bwapulintwa. Te mulandu no bunono, impapulo shashimpwa pali Baibolo shalikwata ukucebusha kwa maka. Shilambukila umuntontonkanya no mutima, ukupeela isubilo lyashininkishiwa ilya nshita ya ku ntanshi.—AbaHebere 4:12.