Uwasoma Atemwa Baibolo wa New World Translation

UKULINGANA no wasoma iciGreek ca kutendekelako Dr. Rijkel ten Kate, amabupilibulo ya Baibolo ayaciDutch yalifilwa ukupilibula amashiwi yamo mu kulungika. Ku ca kumwenako, muli Luka icipandwa 2, tusangamo amashiwi ya ciGreek ayapusanapusana yatatu (breʹphos, pai·diʹon, na pais) ayabomfiwa ku kulangilila ifiputulwa fyakonkana ifya kukula kwa kwa Yesu. Ishiwi limo na limo pali aya yatatu lyalikwata ubupilibulo ubwapusanako. Nangu cibe fyo, mu maBaibolo ayengi, amashiwi yabili nelyo yonse yatatu pali aya yalumbwilwe yapilibulwa bubi bubi nga “umwana.” Bupilibulo nshi bwalungika?

Dr. ten Kate alondolola ukuti mu Lu 2 cikomo 12 ishiwi lya ciGreek breʹphos lipilibula “akacece, nelyo akanya.” Pai·diʹon, ilyabomfiwa mu cikomo 27, lipilibula “kalume munono nelyo umwana,” na pais, ilisangwa mu Lu 2 cikomo 43, lilingile ukupilibulwa nga “kalume.” “Ukulingana ne fyo naishiba,” e fyalembele Dr. ten Kate muli Bijbel en Wetenschap (Baibolo na Sayansi) iya mu March 1993, “takwabako ubupilibulo bwa ciDutch nangu bumo ubwapilibule ci mu kulungika, uko e kuti, mu kumfwana kwakumanina na malembo ya kutendekelako.”

Pa numa, Dr. ten Kate alangilwe New World Translation of the Holy Scriptures, iyo yapilibulwa mu ndimi 12, ukusanshako iciDutch. Cinshi cali ukwankulako kwakwe? “Nasunguke cibi,” e fyo asosele, “ukuti kanshi kwalibako Baibolo umo uwa ciDutch umo imibomfeshe yapusanapusana iya mashiwi yatatu aya ciGreek aya breʹphos, pai·diʹon, na pais yapeelweko ukusakamana.” Bushe New World Translation yalipilibula ifi fikomo mu kumfwana na malembo ya kutendekelako aya ciGreek? “Yalipilibula mu kumfwana nga nshi,” e fyayasuka Dr. ten Kate.