“Mwiba Aba Kwi Koli Limo”
BACILUME wa ŋombe abali pali cino cikope baliba na maka nga nshi, ayabalenga ukutinta ifisendo ifyafina mu kwanguka. Lelo tutile nga umo pali aba bacilume wa ŋombe apyanikwapo ne mpunda. Apantu impunda yalicepako kabili yalinakako pali cilume wa ŋombe, mu kumonekesha kuti yasakaatuka pa kuipantawila mwi kusu ilisungilile yene mwi koli. Kwali umulandu uusuma kanshi, uo ifunde lya kwa Lesa kuli Israele lyasosele ukuti: “Wikalimina ku ŋombe ne mpunda kumo.”—Amalango 22:10.
Umutumwa Paulo alembele icintu cimo icapalako ukukuma ku bantunse. Atile: “Mwiba aba kwi koli limo na ’bashatetekela.” (2 Abena Korinti 6:14) Ici cilingile ukulaibukishiwa maka maka pa kusala uwa kuupana nankwe. Icupo ciba ni bucibusa bubelelela, pantu Yesu Kristu atile: “Ico Lesa alundenye, umuntu elundulula.” (Mateo 19:6) Ukukalipwo kwingi e cifumamo lintu abaupana babili bashilesuminishanya mu fisumino, ifishinte, na mabuyo. Caliba fye kanshi ica kupelulula ukukonka ukukonkomesha kwa mu Baibolo ukwa kupila “muli Shikulu epela.” (1 Abena Korinti 7:39) Ukwingila mu cupo no muntu uo mushisuminishanya nankwe mu fisumino fya mipepele kuti kwaleta impika shakulilako ukucila pa kukakila cilume wa ŋombe ne mpunda.
Ukupusana mu fisumino fya mipepele caba fye ca kusangwilako cimo icingalenga abaupana babili ukukakililwa mwi koli limo mu kukanalinga. Abalefwaya ukuupana—nangu fye ba cisumino cimo cine—kuti cawama nga baipwishe abene ukuti, ‘Bushe twakwata amabuyo yamo yene? Ni kwi tukekala? Nani akalasakamana imipoosele ya ndalama? Bushe bonse tukalabomba? Ni shani pa lwa bana? Bushe icikuuku no kulangulukilako e fikalatungulula ukwampana kwesu ukwa mu cupo?’
Ku cipimo cimo, inshila intu imilandu ya musango yo ilanshanishiwilwamo kuti yalangilila nampo nga ikoli likaba ilyalingana nelyo ilishalingana. Kwena, takwaba abantu babili abo mu kukumanina baba abalingana. Mu cinkumbawile fye, nangu cibe fyo, nga ca kuti abaleishishanya kuti balolenkana ne mpika no kushipikulula capamo kabili nga bengasunga inshila sha kumfwaninamo ishaisuka, cili icapalishako ukuti tabakabe kwi koli ilishalingana.