Icitetekelo E Camusongele Ukuyabomba

LINTU Yehova atumine Mose ukuti atungulule uluko lwa Israele ukufuma mu busha mu Egupti, Mose atalile akwinda, ukusoso kuti: “Mwe Shikulu, ine nshili muntu wa kulondolole fyebo, nangu ni ku kale, nangu apo mulelandila ku mubomfi wenu; pantu ndi wafina akanwa kabili uwafino lulimi.” (Ukufuma 4:10) Ee, Mose tayumfwile ukuti alifikilepo ku kupeelwa umulimo uwafine fyo.

Mu kupalako ilelo, abengi mu babomfi ba kwa Yehova pa nshita shimo bayumfwa abashafikapo ku kubomba imilimo bapeelwa. Ku ca kumwenako, kangalila umo uwa Bwina Kristu uwe shina lya Theodore ashimiko kuti: “Pa fintu fyonse ifyo Yehova afwayo kuti ncite, ubutumikishi bwa mwi bala e cintu cakosesha. Ilyo nali umwaice, naleya bwangu bwangu ku mwinshi, ukubepekesha kwati ndelisha indibu ya pa ciibi kabili mu mutalalila ukufumapo, ukufwayo kuti peba uuleŋumfwa nelyo uulemona. Ilyo nakulileko, nalilekele ukucite fyo, lelo ukutontonkanya ukuya ku ŋanda ne ŋanda kwalenenga ukulwala lwa ku mubili. Nangu fye ni lelo line, nshumfwa bwino pa kuya mu butumikishi, lelo nangu ni fyo ndaya.”

Cinshi calengele Mose ne Nte sha muno nshiku ukupala Theodore ukubomba mu kutunguluka no mwenso wa musango yo? Baibolo ilasuka itila: “Ni ku citetekelo e ko [Mose] ashilile Egupti, . . . pantu akoselele ngo umone Mfumu iishimoneka.”—AbaHebere 11:27.

Mu cine cine, ukupitila mu kubeleshe citetekelo muli Yehova, Mose aali na maka ya kucimfya ukuyumfwa kwakwe ukwa kukanalinga kabili alibombele imilimo yakwe iyo apeelwe pamo nga kapingula, kasesema, intungulushi ya luko, kawikishanya wa icipingo ce Funde, mushika wa mulalo, kalemba wa lyashi lya kale, na kalemba wa Baibolo.

Mu musango umo wine, lintu twaba ne citetekelo ukupala ica kwa Mose, tukalaenda nga ‘abalemona uushimoneka.’ Icitetekelo ca musango yo cilasonga ubukose, ukutulenga ukusunsa ifishingamo fyesu ifya Bwina Kristu—nangu fye ni lintu tuleyumfwa abashafikapo.