“Te Kwesha Ukubatamfya!”

“NGA ca kuti umo uwa Nte sha kwa Yehova, nangu babili, balisha indibu ku ciibi cenu, te kwesha ukubatamfya!” e fyapanda amano Corriere della Sera. Iyi inyunshipepala yalelosha ku cacitike mu Treviso, ku kapinda ka ku kuso aka Italy, umo shimakwebo apene alufye ba lire (indalama sha ku Italy) ukucila pali milioni umo (ukucila badola ba ku United States 600) pa mulandu wa kutamfya Inte shibili ishamutandalile.

Ukulingana ne nyunshipepala, Inte shibili shailondolwele ishine ku mwaume mu mashiwi ya kuti: “Lelo namushuka sana. Tuli Nte sha kwa Yehova, kabili twamuletela icintu cimo icaumo mutengo.” Ilyo line fye, shimakwebo wakalifiwa alipunkile ciibi, ukukanaleka bapwishe.

Nga ca kuti uyu mwaume alikutike, nga alishibe ukuti Inte shaile ku mwakwe ku kumutwalila icikwama cakwe, ico basangile pa cipuna ca mu parka. E co Inte tabakwete ica kucita kano fye ukutwala cilya cikwama ne fyalimo fyonse kuli bakapokola. Ubushiku bwakonkelepo, bakapokola balitwele cene ku mwine.

“Nga ca kuti muntu fye umbi e watolele napamo nga . . . alisendele ndalama shonse shilya. Lelo te fyacitile Inte sha kwa Yehova, abo bafwile ukuba abafumacumi umupwilapo,” e fyasosa Il Gazzettino di Treviso.

Cinshi cilenga Inte sha kwa Yehova ukuba “abafumacumi umupwilapo”? Pantu balitemwa Lesa na banabo, mu kumfwana ne fisambilisho fya kwa Yesu Kristu. (Mateo 22:37-39) Uyo e mulandu wine kabili Inte sha kwa Yehova bela ku ŋanda ne ŋanda ku kubilisha imbila nsuma pa lwa “calo cipya” ica kusungusha ico Yehova Lesa alaya. Ubukombe bwe subilo ubwa musango yo bwalicilapo kuwama pa cikwatwa ca ku mubili icili conse!—2 Petro 3:13.