Bushe Icuma ca Mfumu Solomone ca Kukukumya Fye?

“Ukufina kwa golde uwaleisa kuli Solomone mu mwaka umo kwali bakikari ba golde imyanda mutanda na makumi mutanda na mutanda.”—1 Ishamfumu 10:14.

UKULINGANA ne co cikomo ca mu Baibolo, Imfumu Solomone anonkele amatani ya golde ukucila pali 25 mu mwaka fye umo! Ilelo ici kuti cafika ku madola 240,000,000. Ni cikanga golde aimbilwe icalo conse mu mwaka wa 1800 engilemo imiku ibili. Bushe ici kuti cacitikako? Cinshi cintu ukusambilila ifya cishawasha kulangilila? Kutubulula ukuti ubulondoloshi bwa Baibolo ubwa cuma ca kwa Solomone mu kushininkisha bwa cine. Biblical Archaeology Review yatila:

◻ Imfumu Thutmose 3 iya ku Egupti (2000 B.C.E.) apeele amatani ya fipe fya golde mupepi na 13.5 kwi tempele lya kwa Amon-Ra pa Karnak—kabili ici cali fye ni cimo ica fya bupe.

◻ Ifyalembwa fya mu Egupti fyalembwamo ifya bupe ifyafikile ku matani ya golde na silfere mupepi na 383 ifyo Imfumu Osorkon I (uwa mu ciputulwa ca kubangilila kwa 1000 B.C.E.) yapeele ku milungu.

Ukulundapo, icitabo Classical Greece mu kukonkana kwa fitabo fya mutwe wa Great Ages of Man cashimika ukuti:

◻ Imikoti ya ku Pangaeum mu Thrace yaleimbwamo amatani ya golde ukucila pali 37 cila mwaka ku kupeela Imfumu Philip 2 (359-336 B.C.E.).

◻ Lintu umwana wa kwa Philip Alexander Mukalamba (336-323 B.C.E.) acandile Susa, icifulo ca bwangalishi mu buteko bwa ku Persia, kwasangilwe ifipe fyaumo mutengo amatani ya golde ayengacila na pali 1,000.—The New Encyclopædia Britannica.

E co ubulondoloshi bwa Baibolo pa lwa cuma ca Mfumu Solomone te bwa kubulunga fye. Ibukisheni, na kabili, ukuti Solomone ‘alikulile ukucile shamfumu shonse isha pano isonde ku bucindami na ku mano’ pali ilya nshita.—1 Ishamfumu 10:23.

Ni shani fintu Solomone abomfeshe icuma cakwe? Icipuna cakwe capaminweko “golde uwalopolwa,” ifipe fyakwe ifya kunwenamo fyali “fya golde,” kabili akwete ifishangu 200 ne nkwela 300 isha “golde uwatampwa.” (1 Ishamfumu 10:16-21) Pali fyonse, golde wa kwa Solomone alibomfiwe na kwi tempele lya kwa Yehova mu Yerusalemu. Ifya kutekapo inyali fya mwi tempele ne fipe fyashila, pamo nga imitunkulo, imisambilo, bamulongwe, na bamafukula, fyapangilwe golde na silfere. Bakerubi abalepele amamita 4.5 abaali Umwashilisha, ica kufutumwinapo ifye fungo, na mu kati monse fye umwa ŋanda mwapaminweko na golde.—1 Ishamfumu 6:20-22; 7:48-50; 1 Imilandu 28:17.

Ni shani pa lwe tempele lyapaminweko na golde? Ica kulengo buseko ca kuti, ukubomfya golde muli ilya nshila tacali cintu iceni ku nshita ya ku kale. Biblical Archaeology Review yasoso kuti Amenophis 3 uwa ku Egupti “acindike lesa mukulu Amun pa kumukuulila itempele mu Thebes ‘ilyapaminweko na golde konse fye, pa nshi pena payemfiwe na silfere, [e lyo] ifiibi fya liko fyonse fyakwete golde uwatampwa’”—ukutumbinkanya kwa golde na silfere. Mu kulundapo, Esar-haddon uwa Ashuri (mu mwanda wa myaka uwalenga 7 B.C.E.) apaminine ifiibi no kupampamina ifibumba fya lufuba lwa kwa Ashur ukubomfya golde. Ukukuma kwi tempele lya kwa Sin ku Harran, Nabonidus uwa ku Babele (uwa mu mwanda wa myaka uwalenga 6 B.C.E.) alembele ukuti: “Ku fibumba fya liko napaminako golde na silfere, no kufilenga ukubengeshima nga kasuba.”

Muli fyo, ifyalembwa fya kale fitubulula ukuti ubulondoloshi bwalembwa mu Baibolo pa lwa cuma ca Mfumu Solomone te bwa kukukumya fye iyo.