Mulandu Nshi Shino Nshita Shibelele Ishabipisha?

LINTU mwaikala ati mubelengeko inyunshipepala nelyo ukutambako ilyashi pa TV nelyo ukukutikako ku wailesi, mulenekela ilyashi lya bulanda, bushe te fyo? Nalimo tamupapushiwa ukwishiba ukuti inkondo ya mutatakuya icili ilelwikwa, ukuti imisoka ya lukaakala icili mpanga yonse, nelyo ukuti icipowe cicili cilepwisha amaka ya calo cipiina.

Nga ca kuti mwikala ukutali na kuntu ifi ficitikila, napamo te lyonse muyumfwa abacishamo ukushikitika ku malyashi ya musango yu. Na kabushe, nani engakumamo ukulangulukilako icinabwingi ici conse ica bantu balecululuka? Nangu cibe fyo, calyafya ukukanakuntukilwa lintu twalolenkana na fintu ukucululuka kucita ku bantu. Mu mashiwi yambi, ilintu calyanguka ukubelenga pa lwa nkondo no kulanguluka pa fipendo fya ndase, cilaleta ubulanda ukubelenga pa lwa kwa Adnan munono, kalume wa ku Bosnia uwa myaka ya bukulu 9 uo nyina aipaiwe lintu ibomba lyaonawile iŋanda yabo. Pa numa ya myeshi inono, wishi kwa Adnan alibelaminwe no kupikwa imfuti ilyo baleenda mu musebo na Adnan. Alimweneko na menso yakwe uko nkashi yakwe uwacenenwe ne bomba lyaponene pa sukulu asuumine umulopa ukufikila imfwa. Badokota baleundapa Adnan ku bulwele bwa kucilimuka basangile fyo kalume aali uwapukuta, uushakwata ubuntu ubuli bonse—takwata ne tontonkanyo lya kufwaisha ukwishiba. Lyonse nga alelola aletulumuka no kwibukisha ifyo amonapo; utulo twakwe twalefufiwa ku fya kukumanya fya kutiinya. Adnan te wa kulunda fye ku cipendo. Mwana ulecululuka; tulakuntwa ukumulangulukilako.

E fyo caba na ku ntenda shimbi isha mu calo. Calyanguka ukubelenga pa lwa cipowe; lelo cilaleta ubulanda ukumona icikope ca mukashana wa myaka ya bukulu isano na kafumo kabotoka e lyo amolu na maboko kwati kamuti ka macisa ku konda, uwapamwa ku nsala ica kuti icashalamo fye bumi. Cintu cayanguka ukubelenga pa lwa fipendo fya misoka; lelo cilaleta ubulanda ukumfwa uko mukamfwilwa umukoloci apumwa mu bukatu, ukwibilwa, no kucendwa. Cintu cayanguka ukubelenga pa lwa kubongoloka kwa lupwa; lelo cilaleta ubulanda ukwishiba pa lwa kwa nyina uyo ku mufulo uwaletana umwana wakwe uwa kuifyalila ifya kulya no kumusunga buluku buluku.

Cilakalifya ukubelenga ifintu fya musango yu. Lelo fintu cicilanapo ukubipa lintu cimo ica ifi finkunka fya mu calo fyatwishila mu kulungatika! Lintu mwacula ku bubi pa lwenu, e lyo imibele ili mu calo iilangishiwa mu lyashi lya mu calo icilapo ukumonekesha. Cilatiinya ukutontonkanya pa cishinka ca kuti ukucululuka ukufuma ku misoka, inkondo, ifipowe, na malwele filefulilako pa cipimo cishatala acimonwapo ukutula apo umuntunse abelako. Ififuma mu kwikala ne ficitika muli uno mwanda wa myaka uwalenga 20 fikalamba icine cine—ukupelenganishiwa, umwenso, no kupopomenwa fyaliseeka.

Abantu ba mu mipepele yalekanalekana balefwaya ifyasuko ku fipusho fya kucusha pamo nga, Mulandu nshi ifintu fibelele ifyabipisha? Ni kwi umuntunse akapela?

Ku ca bulanda, imipepele ya lelo te lingi ipeela ifyasuko fya kwikusha. Lintu mwacimona icipusho cili pa nkupo ya uno magazini, napamo mwacitwishika—uko kwankulako kwingomfwika. Imipepele iyasumina muli bumunshalulwa ilingi line yesha ukulondolola icishabamo muli Baibolo—e kuti ubushiku bwa kulungatika ne nshita ya kupwa kwa calo. (Moneni Mateo 24:36.) Bakasabankanya ba uno magazini bafwaya Baibolo ukuilondolwela iine. Kuti mwapapa ukwishiba ukuti ifyo Baibolo ilanda pa lwa nshiku sha kulekelesha fya cine kabili fyalibamo amano. Kabili Baibolo ilalanda ne fyacila pa mulandu ifintu fibipishe nga nshi. Ilapeela ne subilo lya ku ntanshi, ilya kusansamusha icine cine. Twamulomba ukulanguluka ifipande fyakonkapo no kumona ifyo icite ci.

[Abatusuminishe Ukubomfya Icikope pe bula 3]

Jobard/Sipa Press