‘Mubombele Shikulu Kristu’

UKUPULINKANA mu lyashi lya kale, amamilioni ya bantu balishipikisha icisendo ca busha. Ku ca kumwenako, amakana ya myaka ku numa, abena Israele baliculile sana mu busha kuli bakangalila ba cina Egupti. Nga fintu Baibolo isosa ukuti, “babikile pali bene bacilolo ba milasa, no kubacululusha ku fisendo ifyafina,” na kucilisha ukutama amatafwali.—Ukufuma 1:11.

Mu fyalo ifingi ilelo, abantu te kuti babe abasha cine cine, lelo abengi bafwile ukubomba amaawala ayengi mu mibele ikabila ukubombesha—inshita shimo mu mibele iishalinga. Baba ne cisendo cafina icingetwa ngo busha bwa fya ndalama.

Nangu cibe fyo, kwalibako ubusha bumo ubushafina. Umutumwa Paulo akonkomeshe abatetekela banankwe ukuti: ‘Mubombele Shikulu Kristu.’ (Abena Kolose 3:24) Abo basalapo ukubombela Kristu basanga ukutuusha ku fisendo fyabo ifyafina. Yesu umwine atile: “Iseni kuli ine, bonse mwe bacucutika kabili abafinwa, na ine nalamupeelo kutusha. Sendeni ikoli lyandi no kusambilila kuli ine, pa kuti ndi wafuuka kabili uwapetama umutima; e lyo mwalasango kutusha ku mitima yenu; pantu ikoli lyandi lyalyanguka, ne cisendo candi calipepuka.”—Mateo 11:28-30.

Ukusumina ikoli lya kwa Kristu takulubula umo ku cishingamo ca kupayanishisha ulupwa lwakwe ifya ku mubili. (1 Timote 5:8) Lelo, kulalubula ku kukaanaibimbamo sana mu kutemwa ifikwatwa. Mu cifulo ca kulenga ukutemwa ifikwatwa ukuba ubuyo bwabo bukalamba mu bumi, Abena Kristu balateka imitima ku fikabilwa fya bumi.—1 Timote 6:6-10; linganyeniko 1 Abena Korinti 7:31.

Abena Kristu na kabili balasanga ukutuusha mu kufikilisha icishingamo cabo ica kubile “mbila nsuma” iya Bufumu bwa kwa Lesa. (Mateo 24:14) Ici cilaleta ubuseko bwine bwine no kwikushiwa!

Tufwile ukutasha pa mulandu wa ‘kubombela Shikulu Kristu’!

[Abatusuminishe Ukubomfya Icikope pe bula 32]

Pictorial Archive (Near Eastern History) Est.