Badokota, Bakapingula, ne Nte sha kwa Yehova

KU NUMA mu 1995, Inte sha kwa Yehova shateyenye ukukumana imiku ibili mu Brazil. Ku mifwaile nshi? Balefwaya ukuti kulebako ukubombela pamo ukwa babomfi ba mu fipatala na babomfi ba mu filye lintu umulwele wa mu cipatala ni umo uwa Nte sha kwa Yehova kabili akaana ukubikwamo umulopa.—Imilimo 15:29.

Ku ca bulanda, inshita shimo shimo badokota baalesuula ifyo abalwele baNte balefwaya kabili balepoka ne fipoope fya ku filye ku kubapatikisha ukubikwamo umulopa. Pa kuicingilila ku mafya ya musango yo, baNte balebomfya inshila ishili shonse isha mwi funde. Nangu ni fyo, balesalapo ukubombela pamo mu cifulo ca kukangana. Muli fyo, ukukumana kwakomaile ukuti kwalibako inshila ishingi isha kundapilamo ishingabomfiwa mu cifulo ca kubikamo umulopa no kuti Inte sha kwa Yehova balasumina inshila sha musango yo.a

Ukukumana kwa kabungwe ka Regional Council of Medicine aka mu São Paulo kwalitungilile ifyo baNte balefwaya. Mu January 1995 kapingwile ukuti ngo mulwele talefwaya ukundapwa mu nshila dokota aletubulula, umulwele alikwata insambu sha kukaana no kusala dokota umbi.

Nomba naciwama, pantu kuliko imyanda ya badokota mu fipatala fya mu Brazil abo mu kuitemenwa bengondapa abalwele abalefwaya ukundapwa ukwabula ukubikwamo umulopa. Ukutula fye pa kukumana kwa mu March 1995, ukubombela pamo pa kati ka badokota, bakapingula, ne Nte sha kwa Yehova mu Brazil kwaliwaminako apakalamba. Mu 1997 magazini uwa fya cipatala uwa mu Brazil uwitwa Âmbito Hospitalar asabankenye icipande icapampamine pa kusoso kuti insambu sha Nte sha kwa Yehova pa lwa mulopa shilingile ukucindikwa. Nomba calishibikwa ku bengi, nga fintu utubungwe twa Regional Councils of Medicine mu Rio de Janeiro na mu São Paulo twasosele, ukuti, “umulimo wa kwa dokota uwa kucingilila ubumi bwa mulwele taulingile ukusumbulwa ukucila pa mulimo wakwe uwa kucingilile nsambu sha mulwele mu kusala ifyo alefwaya.”

[Futunoti]