Ifya Kutungulula mu Nshila ya ku Mweo

NGA ca kuti mwaleenda mu nshila mushapitamo, bushe kuti mwamona ifishibilo fya kutungulula nge fya kumupumfyanya? Te sana! Cine cine kuti mwafimona nge fya kumwaafwa ukukanapumbuka.

Lelo ni shani pa lwa mikalile? Bushe kuti mwaikala bwino bwino ukwabula ifya kutungulula? Kasesema wa kale uwa kwa Lesa alikeene ukuti abantunse te kuti bende ukwabula ifya kutungulula. Atile: “MWE SHIKULU, ninjishiba ukuti te kuti umuntu aisalile inshila eka; kabili te kuti eshibe nshila ya kwendamo mu bumi.”—Yeremia 10:23, The New English Bible.

E co ni kwi kanshi kwingafuma ubutungulushi bukabilwa? Ukwingafuma ubutungulushi bwashintililwapo ni kuli Kabumba wa muntu, ne fyo twingapashanya ku fya kutungulula fisangwa muli Baibolo. Yehova asosa mu Cebo cakwe ukuti: “Kabili ilyo mwapaatukila ku kwa kulyo nangu ku kwa kuso, amatwi yenu yakomfwe cebo cafuma ku numa yenu, icileti, Iyi e nshila, e mo mwende.”—Esaya 30:21.

Cine cine, Icebo ca kwa Lesa cilatutungulula bwino bwino mu fintu fyonse mu mikalile. (Esaya 48:17; 2 Timote 3:16, 17) Lelo abantu abengi ku ca bulanda baikalila fye ukwabulo kutungululwa na Lesa. (Mateo 7:13) Nalyo line, ifya kutungulula fyalibe fyapampamikwa! Bushe kuti mwatemwa ukuti filemutungulula mu nshila ya ku mweo?