Baali na “Katiina Kuli Lesa”

ILYO abena Israele bali abasha mu Egupti, Farao apeele banacimbusa abaHebere, Shifra na Pua, umulimo wakosesha. Apantu impuka ya batulatula fye yalekulilako, Farao akambishe aba banacimbusa ukuti: “Pa kufyasha abanakashi abaHebere, . . . nga mwana mwaume, mumulenge ukufwa.”—Ukufuma 1:15, 16.

Shifra na Pua baali na “katiina kuli Lesa,” e co balishipile kabili “tabacitile ifyasosele imfumu ya Egupti kuli bene.” Basalilepo ukupususha abana baume, nelyo cingati ukucite co kwababikile mu busanso. Lelo Yehova ‘acitiile banacimbusa icisuma,’ kabili alibalambwile pa kupususha ubumi.—Ukufuma 1:17-21.

Ili lyashi lyalangilila ifyo Yehova alalambula abamubombela. Afwaya nga amwene fyo Shifra na Pua bacitile, ngo mulimo fye wa kwaafwa bambi. Na kuba, takwingaba nacifyashi wine wine uwingatemwa ukwipaya utunya! Lelo Yehova alishibe ukuti abantu bamo pa mulandu wa kusongwa na bambi balicitile fintu fya makankamike nga nshi. Alishibe ukuti aba banacimbusa balicitile icisuma te pa mulandu fye wa kufwaya ukwaafwa bambi lelo ni pa mulandu wa katiina kabo aka bukapepa no kuipeelesha.

Mwandi tulatasha pa kuba na Lesa uusakamana imibombele yesu iya citetekelo! Nakalimo ubwesho Shifra na Pua bapitilemo pa lwa citetekelo cabo, ifwe tatwapitamo. Lelo, nga twatwalilila ukucite calungama—kube ni ku sukulu, ku ncito, nangu konse uko tuli—Yehova talaba imibele yesu iya cumfwila. Lelo “aba kalambula wa bamufwayafwaya.” (AbaHebere 11:6) “Lesa tali uushalungama; takalabe umulimo wenu, no kutemwa uko mwalangile kwi shina lyakwe, apo mwalepyungila aba mushilo, kabili mucili mulebapyungila.”—AbaHebere 6:10.