Umwaka Waibela Kabili Uwawamisha Ukwananyamo Baibolo

ILELO abantu abengi balikwata Baibolo ukucila ifyo cali kale. Ifyo e fyo lipoti ukufuma kuli ba United Bible Societies ilangilila, pantu amaBaibolo ayapulilepo mu 1998 ukucila pa yaananishiwe mu 1997 yalicilile pali 500,000. Kanshi yonse pamo, ayakumanina atemwa ayakwata fye imbali shimo ayaananishiwe mwi sonde lyonse yalicilile pali 585,000,000. Uyu lipoti atile “Ici ca kukoselesha nga nshi. Ilelo Icebo ca kwa Lesa cilefika ku bantu abengi.”

Kwena, paliba ubupusano pa kukwata fye Baibolo no kuibelenga. Ku ca kumwenako, mu kufwailisha kumo casangilwe ukuti abena Amerika abakwatako fye nangu Baibolo umo, balicila pa mapesenti 90, kabili abafikile kuli aya yene mapesenti basumina ukuti muli Baibolo mwaliba ukufunda kusuma pa lwa mibele isuma. Nangu cibe fyo, bantu fye amapesenti 59 e batile balabomfya Baibolo ukuti ibafweko muli fimo. Bambi amapesenti 29 basumine ukuti ifyaba mu Baibolo bafishiba fye “panono” nelyo fye no kukanafishiba “umupwilapo.”

Inte sha kwa Yehova balapulinta no kwananya amaBaibolo ukubikapo no kutungulula amasambililo ya Baibolo aya pa fye ku bantu mu fyalo ukucila pali 230. Abantu amamilioni nomba balenonkelamo muli uyu programu wa kusambilisha uwa Baibolo. Balasambilishiwa ifyo bengacitapo pa mafya balekumanya nomba, kabili balasambilila ico Baibolo isosa pa lwa nshita ya ku ntanshi iisuma mu Bufumu bwa kwa Lesa.—Esaya 48:17, 18; Mateo 6:9, 10.

[Ifikope pe bula 32]

Amasambililo ya Baibolo yaletungululwa mu (ukutendekela pa muulu ku kuso ukulaalola ku kulyo) Bolivia, Ghana, Sri Lanka, na ku Bulaya