Ukupeela Ukwawamisha mu Menso ya kwa Yehova

Amaofeshi yanono aya Watch Tower, mu Mozambique yapokelele kalata wakonkapo:

“Ndi kalume wa myaka 7. Ndaya ku sukulu lya ku praimari. Natuma iyi ndalama nasangile ilyo natekele akana ka nkoko. Nakashitishe pali baMetical 12,000 [mupepi na K2,700]. Ndetasha Yehova pa kulenga akana ka nkoko nabalile ntekapo ukukula ukufika kuli mukolwe. Kuti natemwa ica bupe candi ukwafwa ukulundulula umulimo wa Bufumu bwa kwa Yehova.

“Ifyalundwako. Batata e bangafwileko ukulemba uyu kalata.”

Abengi batontonkanya ukuti pa kuba kapekape kano ukwete ifyuma ifingi sana. Lelo, nga twabelenga ubulondoloshi bwa mu Baibolo pa lwa kwa mukamfwilwa uwapoosele mu cipao “utunyampuku tubili utwa ndalama,” kuti twatesekesha ukuti, bukapekape tacipilibula ukupeela ifingi, lelo ukufwaisha kwa mutima e kulangilila fyo.—Luka 21:1-4.

Yehova alapokelela ica bupe conse te mulandu no bunono kulila fye capeelwa ukufuma ku mutima wa kutemwa. Kabili alapaala nga nshi abapashanya bukapekape bwakwe pa kubomfya inshita yabo, amaka, nelyo ifikwatwa ku kulundulula Ubufumu bwakwe.—Mateo 6:33; AbaHebere 6:10.