Bushe Muleibukisha?

Bushe mwalyumfwikishe bamagazini ba Ulupungu lwa kwa Kalinda aba nomba line abo mwabelengele? Cisuma, moneni nga kuti mwayasuka ifi fipusho:

• Mulandu nshi twingabela abashininkisha ukuti ukufikilishiwa kwa mu kusesema ukwa “imyulu ipya ne calo cipya” ukwa pali Esaya 65:17-19 kwasanshishemo ifingi ukucila na pa kubweluluka kwa baYuda ukufuma muli bunkole?

Pantu ilyo abatumwa Petro na Yohane balelemba mu mwanda wa myaka uwa kubalilapo C.E., balelanda pa lwa kufikilishiwa ukwa ku nshita ya ku ntanshi, ukufikilishiwa kwa kuko kuli no kusanshamo amapaalo ayashilati yese. (2 Petro 3:13; Ukusokolola 21:1-4)—4/15, amabula 10-12.

• Ni pi nakalimo pashimpilwe inshimi sha kale isha ciGriki isha bantu ba lukaakala abapala tulesa?

Napamo inshimi shabo shali kuwaminisha kwa malyashi ukwa cishinka ca kuti ilyo Ilyeshi lishilabako bamalaika bamo balifwele imibili ya buntunse kabili baikele imikalile ya lukaakala kabili iya bucisenene pano isonde. (Ukutendeka 6:1, 2)—4/15, ibula 27.

• Mafya nshi yamo ayo Abena Kristu bakosoka balingile ukupempwilako pa menga?

Calibe cacindama ukusengauka iciwowo, icibako nga pali ukunwa ubwalwa icinwenwenwe kabili nga kwabako kucinda ukwabulo kuilama e lyo ne nyimbo sha congo. Kano nga calondololwa bwino mu kumfwika ukutila uuli onse kuti asangwako ku mutebeto, lelo abashilaalikwe tabalingile ukusangwako. Shibwinga alingile ukushininkisha ukuti Abena Kristu abengalama bwino ifintu e po bali ukufikila umutebeto wapwa mu nshita isuma.—5/1, amabula 19-22.

• Cinshi catubululwa pa Amalumbo 128:3 mu kushimbulwa kwa bana “nga banimbo ba miolife” ukushinguluke tebulo lya muntu?

Ilingi line banimbo bamena pe shinte lya citimbatimba ca muolife. Nga umuolife waleka ukutwalisha, utumisambo tupya napamo tulesa mu kube cimuti cakosa mu kushinga cinyina. Ukupalako, abafyashi kuti basekelela pa kukwata abana abatwale fisabo mu kubombela Yehova pamo na bo.—5/15, ibula 27.

• Fintu nshi fimo ifyo abana bamwenamo mu lupwa ulwaikatana bwino?

Ulupwa lwaikatana lulapange citendekelo cisuma ica kunakila abaletungulula, kulaba ukutesekesha ifyacindama icine cine, e lyo na bucibusa bwa nsansa na bambi. Ukwikatana kwa musango yo kuti kabili kwabafwilisha ukulundulula bucibusa bwabo na Lesa.—6/1, ibula 18.

• Mu calo cimo ica ku Kabanga ka Asia, cinshi cacitilwe pa kukoselesha itontonkanyo lya kuti Abena Kristu bonse ni bamunyina?

Ifilonganino fyonse fyalikoseleshiwe ukukanalabomfya amashiwi ya bashimucindikwa pa kulaita bamo. Lelo ukuti bafwile ukulaita bonse cimo cine ukuti ni bamunyina.—6/15, amabula 21, 22.

• Bushe Inte sha kwa Yehova balapokelela imiti iipangwa ukubomfya umulopa?

Twasumina ukuti ifunde lya mu Baibolo ilya kuti ‘talukeniko ku kulyo mulopa’ lisanshamo ukubikwamo umulopa onse ne fintu fimo ifikalamba ifyaba mu mulopa (pamo nga plasma wa mulopa, insandesande shakashika, insandesande shabuuta, ne nsandesande sha kucilikila ukusuuma kwa mulopa). (Imilimo 15:28, 29) Kumfwa pa lwa kubikwamo imbali shinono ishifuma mu fintu fikalamba ifyaba mu mulopa, Umwina Kristu umo na umo alingile ukuipingwilapo, ukwibukisha ifyo Baibolo isosa na bucibusa bwakwe na Lesa.—6/15, amabula 29-31.

• Bushe cine cine kuti mwasanga umutende wa lwa nkati pali lelo?

Icine cine kuti mwausanga. Ukupitila muli Baibolo, Yesu Kristu aletungulula abantu ku nshila ya kupepa kwasanguluka na ku mutende uwalondololwa pali Esaya 32:18. Ukulundapo, abo abasango mutende wa musango yu balikwate cilolelo ca kuipakisha umutende ubelelela pe sonde mu kufikilishiwa kwa Amalumbo 37:11, 29.—7/1, ibula 7.

• Mulimo nshi baGeorge Young babombele mu lyashi lya nomba line ilya teokrasi?

Ukutendeka mu 1917, baGeorge Young bashininkishe ukuba bakasenda wa lubuuto ulwa mbila nsuma iya Bufumu mu fyalo ifingi. Babombele ubutumikishi bwabo mu Canada onse, mu fishi fya Caribbean, mu Brazil na mu fyalo ifyabela mu South America, ukuya ku Central America, ku Spain, ku Portugal, e lyo na mu calo icaishibikwe nga Soviet Union, ukusanshako na ku United States.—7/1, amabula 22-7.

• Bushe Ilyo 1 Abena Korinti 15:29 ilanda pa lwa bantu bamo ukuti “balabatishiwa pa mulandu wa bafwa,” ipilibula cinshi?

Icishinka cili ca kuti ilyo Abena Kristu basubwa no mupashi wa mushilo, balakonka imikalile iibatungulula ku mfwa kabili mu kukonkapo balesa mu kubuushiwa ku bumi bwa mu muulu.—7/15, ibula 17.

• Cinshi cintu umutumwa Paulo alecita mu nshita iyalondololwa nge myaka yakwe iyo ashalandwapo?

Napamo aleyafwilisha ukutendeka nangu ukukoshe filonganino ifya mu Suria na Kilikia. Amafya ayengi ayalumbulwa pali 2 Abena Korinti 11:23-27 yafwile yacitike muli iyi nshita, ukulangilila ukuti ali uwabilingana mu butumikishi.—7/15, amabula 26, 27.

• Cinshi cingatwafwilisha ukuba abashikatala mu kwenekela kwesu?

Ibukisheni ukuti Yehova alomfwikisha. Ukupepa kuli wene kuti kwatwafwilisha ukushikatalika amatontonkanyo yesu, kabili kulango kuti twaliicefya. Ukwafwa kumbi kwaba kumfwila ifyo cibusa wakosoka atweba.—8/1, amabula 29, 30.