Ifipusho Ukufuma ku Babelenga

Mulandu nshi Ulupungu lwa kwa Kalinda ulwa April 1, 2002, lwasosele pe bula 11, paragrafu 7, ukuti ulubatisho lwa mu menshi ulwa baYuda basumine pa Pentekoste wa mu 33 C.E. lwali cishibilo ca ‘kuipeela kwabo umo umo kuli Lesa ukupitila muli Kristu,’ ilyo kale twasumine ukuti ukubatishiwa kwa baYuda mu 33 C.E. ukufika mu 36 C.E. takwalekabila ukuipeela kwabo umo umo?

Mu 1513 B.C.E., Yehova Lesa apeele abena Israele ishuko lya kuba uluko lwakwe ulwa mushilo kulila fye ‘baleumfwe shiwi lyakwe, no kubake cipope cakwe.’ Bayaswike ati: “Conse ico Yehova asosele, twakulacita.”—Ukufuma. 19:3-8; 24:1-8.

Pa kusumina ukukonka icipingo ce Funde lya kwa Mose, abena Israele baipeele kuli Lesa. Inkulo sha baYuda ishalekonkapo shalefyalilwa muli ulu luko lwaipeela. Lelo, ulubatisho lwa baYuda basangwike abakonshi ba kwa Yesu Kristu pa Pentekoste wa mu 33 C.E. no kuya ku ntanshi, talwali fye kuipeela kuli Lesa ukwa bantu ba mu luko lwaipeela. Lwaleimininako ukuipeela kwabo kuli Yehova Lesa mu cumfwano cipya muli Yesu Kristu. Mu nshila nshi?

Pa numa ya kupongolwela umupashi wa mushilo pa basambi 120 abalongene mu muputule wa pa muulu mu Yerusalemu pa Pentekoste wa mu 33 C.E., umutumwa Petro alimine no kutendeka ukushimikila cinkupiti wa baYuda ne nsangu abalongene ku kumona icacitike. Pa numa ya kushimikisha, aebele abaYuda abo kampingu ashinine ati: “Lapileni, lekeni umo na umo abatishiwe mwi shina lya kwa Yesu Kristu pa kuti mulekelelwe imembu shenu.” Pa kwankula ku kukonkomesha kwa kwa Petro na kumbi, “bonse abapokelele icebo cakwe no mutima onse balibatishiwe, na pali bulya bushiku kwalundilweko imyeo nalimo amakana yatatu (3,000).”—Imilimo 2:1-41.

Bushe balya baYuda babatishiwe ilyo Petro abacincishe tabali kale mu luko lwaipeela? Bushe tabaipeele kuli Lesa? Iyo. Umutumwa Paulo alembele ati ‘Lesa alifumyapo Ifunde pa kulipampamina ku cimuti.’ (Abena Kolose 2:14) Ukupitila mu mfwa ya kwa Kristu mu 33 C.E., Yehova Lesa afumishepo Ifunde lya cipingo ilyalengele abena Israele ukuba uluko lwakwe ulwaipeela. Uluko ulwakeene Umwana wa kwa Lesa, na o Lesa alilukeene. Uwali “Israele wa ku mubili” te kuti na kabili atile ali luko lwaipeela kuli Lesa.—1 Abena Korinti 10:18; Mateo 21:43.

Ifunde lya cipingo lyalifuminepo mu 33 C.E., lelo, inshita ya kwa Lesa iya kusenamina kwaibela no kusakamana abaYuda tayapwile pali ilya nshita.a Ilya nshita yalitwalilile ukufika mu 36 C.E., ilyo Petro ashimikile kuli Korneli, umwina Italia uwaletiina Lesa na ku lupwa lwakwe pamo na Bena fyalo bambi. (Imilimo 10:1-48) Cinshi calengele ukuti alefyeko inshita ya kusenamina kwakwe?

Pali Daniele 9:27 patila, ‘[Mesia] akakoshe cipingo ku bengi pa mulungu umo.’ Icipingo icakoshiwe pa myaka 7, nelyo “umulungu umo,” ukufuma apo Yesu abatishiwilwe no kutendeka ubutumikishi bwakwe ubwa ku cintubwingi mu 29 C.E. cali cipingo ca kwa Abrahamu. Icalekabilwa fye pa kuba muli ico cipingo, kufyalilwa mu lupwa lwa kwa Abrahamu, e kuti, ukuba umuHebere. Cilya cipingo ca lubali lumo tacalengele umuntu ukuipeela kuli Yehova. E ico, abaYuda basumine ababatishiwe pa numa ya lyashi lya kwa Petro pa Pentekoste wa mu 33 C.E., nangu line balisenaminwe nga baYuda ba cifyalilwa, ukuba mu luko lwaipeela kuli Lesa kwalipwile pantu icipingo ce Funde califuminepo. Cila muntu alekabila ukuipeela kuli Lesa.

Ukuipeela no kubatishiwa kwa baYuda ne nsangu pa Pentekoste wa mu 33 C.E. kwalicindeme pa mulandu na umbi. Umutumwa Petro acincishe abalemukutika ukulapila no kubatishiwa mwi shina lya kwa Yesu. Ukucite fyo kwakabile ukuti bataluke inshila sha ku calo no kusumina ukuti Yesu ni Shikulu kabili Mesia, Shimapepo Mukalamba, no kuti e waikala ku kuboko kwa kulyo ukwa kwa Lesa mu muulu. Balekabila ukwita pe shina lya kwa Yehova Lesa ku kupusushiwa mwi shina lya kwa Kristu Yesu, no kuba ne citetekelo muli Kristu no kwishiba ukuti e Ntungulushi yabo. Ishinte lya bucibusa na Lesa kabili ilya kwelelwapo imembu nomba lyalyalwike. Cila muYuda uwasumine alekabila ukupokelela uku kuteyanya kupya. Mu nshila nshi? Pa kuipeela kuli Lesa no kuilanga ku cintubwingi ukuti nacite co pa kwibishiwa mu menshi mwi shina lya kwa Yesu Kristu. Ulubatisho lwa mu menshi lwali cishibilo ca kuipeela kwabo kuli Lesa, ukubalenga ukuba na bucibusa bupya na wene muli Yesu Kristu.—Imilimo 2:21, 33-36; 3:19-23.

[Futunoti]