Vidio ya Kufika Abacaice pa Mitima

ABACAICE abengi balyafwilishiwe ukutontonkanya sana pa myendele yabo ilyo batambile vidio ya Young People Ask—How Can I Make Real Friends?a Muli uyu vidio mwaba ukufunda kusuma ukwa mu malembo, ukuilandila kwa bacaice ba Bwina Kristu, ne cilangililo ca muno nshiku icashimpwa pa fyacitikile Dina ifyalembwa mu Baibolo. (Ukutendeka, icipandwa 34) Ifyakonkapo e fyo abacaice ba Bwina Kristu ba ku Mexico balandapo pali vidio.

Martha ashimika ati: “Uyu vidio amfikile pa mutima icine cine. Kwati fye nine bapangiile. Naletontonkanya ukuti nga bakafundisha wandi na bo nsambilila na bo pa sukulu baishiba fye ukuti ndi Nte ya kwa Yehova ninshi capwa. Nalefilwa ukubashinina ati ndi Nte ukupitila mu kubashimikila. Ndatasha pa fyebo fyonse ifyo Yehova atupekanishisha, ukucilisha pa fyebo fitufika pa mitima pamo nge fyo iyi vidio itukuma.”

Juan Carlos atila: “Uyu vidio alabalamuna amatontonkanyo. Apo ndi mulumendo, nalilufyanyapo kabili ifyacitikile bamo ababa mu cilangililo fyalincitikileko. Imyaka yapita, naleikala imikalile yabamo bumbimunda, lelo naishileiluka ukuti mu bumi bwa musango yo kuti mwatumbuka ifibi. Pa numa ya kutamba vidio, ndefwaisha ukuba uwa busumino kuli Yehova.”

Sulem ayebelele ati: “Ilyo natambile vidio, yalimfikile pa mutima. Ilyo nshilatamba iyi vidio, nalilekele ukubelenga Baibolo, kabili nshalepepa kuli Yehova sana. Ilyo nakutike ku fyalandile abacaice mu vidio, canengele ukutampa ukulaisambilisha Baibolo na kabili no kutendeka ukulapepa kuli Yehova.”

Abacaice abengi pali lelo balakwata amafya ayengi, kabili umusango wa fibusa basala e ulenga ukuba ifyo baba. (Amalumbo 26:4; Amapinda 13:20) Vidio wa Young People Ask—How Can I Make Real Friends? aleafwa abengi ukusala bwino aba kwangala na bo.

[Futunoti]