Bushe Icitetekelo Kuti Caposha Abalwele?

ILYO twalwala, tufwaya ukuumfwa bwino no kupola. Mufwile mwalibelenga mu Baibolo ukuti imiku iingi Yesu Kristu aposeshe amalwele ya misango na misango, ne ci calengele abengi abalecula ukuuumfwa bwino. Bushe ukuposha kwa musango yo kwalecitika shani? Baibolo itila ni ku ‘maka ya kwa Lesa’ kwalecitikila. (Luka 9:42, 43; Imilimo 19:11, 12) E ico, umupashi wa mushilo ukufuma kuli Lesa e walelenga kube ukuposha, te citetekelo ca muntu epela. (Imilimo 28:7-9) E mulandu wine Yesu ashalefwaila abalwele ukulanga ukuti nabamutetekela ilyo ashilabaposha.

Nalimo kuti mwaipusha amuti: ‘Bushe ukuposha kwa cipesha amano kwalilaala kwapwa nelyo bushe ukuundapa ukupala kulya Yesu aleundapako kukacitika na kabili? Lisubilo nshi abalwala amalwele yabipisha nangu ayashingapola bengaba na lyo?’

Baibolo ilondololo kuti mu calo cipya ica kwa Lesa ica bulungami, amaka ya kwa Lesa na kabili yakalenga kube ukuposha kwa cipesha amano ukupala kulya Yesu acitile pano isonde. Inte sha kwa Yehova uko kwine mwikala kuti batemwa sana ukumulanga ifyo Lesa akacita ico ukupepelela kushingacita, e lyo na lintu ali no kucite fyo. Ukupepelela umuntu te kuti kufumyepo amalwele yonse, pamo pene ne mfwa. Lelo, Lesa wena “akamine mfwa ukumina kwa pe.”—Esaya 25:8.