Ilyashi Lya Bakabilisha ba Bufumu

Kalata Ukufuma Kuli Alejandra

UKULEMBA BAKALATA ni nshila isuma iyabomfiwa pa nshita ntali iya kushimikililamo. Nangu ca kuti inshita shimo cimoneka kwati iyi nshila taibomba bwino, abatwalilila ukubomfya iyi nshila balipaalwa apakalamba. Balebukisha ukufunda kwa mano ukwa mu Baibolo ukutila: “Ku lucelo tande mbuto shobe, ukufika na ku cungulo wileka kuboko kobe kutushe; pantu tawishibe ico cikashuka, ici napamo ici, nangu nga fyonse fibili pamo fikabe fisuma.”—Lukala Milandu 11:6.

Alejandra, Nte wacaice uwabombeele pa maofesi ya Nte sha kwa Yehova aya mu Mexico pa myaka 10, aleundapwa ku bulwele bwa kansa. Ubu bulwele bwalicililemo ica kuti afililwe no kutwalilila ne milimo yakwe iya cila bushiku. Umulandu wa kuti talefwaya ukulekelesha umulimo wakwe uwa kushimikila, Alejandra apingwilepo ukulemba bakalata. Alembele ulwe sambililo lya Baibolo ilya pa ng’anda ilya pa fye kabili abikilemo ne nambala ya lamya ya banyina. Lyena apeele banyina bakalata ukuti bakatwale pa mayanda apashalesangwa abantu ilyo baleshimikila ku ng’anda ne ng’anda.

Pali iyi nshita, kwali umukashana uwafumine ku Guatemala, uwe shina lya Diojany uwaile mu kubomba pa ng’anda ya muntu mu Cancún, ku Mexico. Ilyo ali kulya, akumene ne Nte sha kwa Yehova kabili alitemenwe ukulanshanya na bo ifya mu Baibolo. Lyene pa numa, abamwingishe incito bapingwilepo ukukuukila ku Mexico City kabili balefwaya ukumusenda. Lelo Diojany talefwaya ukukuuka pantu talefwaya ukuleka ukulanshanya na baNte.

Lelo abamwingisha incito bamwebele ati, “Wisakamana, uko tuleya na ko kwaliba baNte abengi. Tukabafwaya nga twafika fye.” Ukucetekela ukuti ici cikacitika, Diojany alisumine ukukonka. Ilyo bafikile ku Mexico City, abaingishe Diojany incito batendeke ukufwaya baNte. Lelo, nangu ca kuti muli ulya musumba mwali baNte ukucila pali 41,000 e lyo ne filonganino 730, balifililwe ukubasanga.

Diojany atendeke ukufuupulwa pantu tasangile Inte pa kuti atwalilile ukulanshanya ifya mu Baibolo. Bushiku bumo, umukashi wa bamwingisha incito aishile kuli wena no kumweba ati: “Diojany! Lesa obe na-asuka amapepo yobe.” Amupeele kalata, no kutila “BaNte bacikuletela kalata uyu.” Iyo kalata yafumine kuli Alejandra.

Diojany aishilemonana na banyina ba kwa Alejandra e lyo no mwaice wakwe Blanca kabili alisumine isambililo lya Baibolo. Pa numa ya milungu inono, Diojany na Alejandra balimonene kabili bali ne nsansa nga nshi ilyo bamonene. Alejandra akoseleshe Diojany ukutwalilila ukusambilila Baibolo pa kuti alunduluke lwa ku mupashi.

Alejandra afwile mu July 2003, ilyo papitile fye imyeshi inono, kabili ashilile bakapepa banankwe ica kumwenako cisuma ica citetekelo e lyo no kushipa. Abengi balyumfwile ubulanda ilyo bamwene Diojany pa cililo, na lintu alandile ati: “Alejandra no lupwa lwakwe baba fya kumwenako fisuma kuli ine. Kabili ndefwaisha ukubombela Yehova e lyo no kubatishiwa nomba line fye. Ndefuluka ukumona Alejandra na kabili muli Paradaise ileisa ku ntanshi!”

Cine cine, kalata kantu akanono sana. Lelo kuti yaletako ifisuma ifingatwalilila pa nshita ntali!