Bushe Lesa Alamumona?

BUSHE Yehova, Kabumba Mukalamba, kuti atumona? Ee alatumona! Baibolo ilalanda bwino ukuti: “Uwapangile amenso, bushe kuti afilwo kumona?” (Amalumbo 94:9) Ifyo Yehova amona fyalicila pa fyo fwe bantu tumona. Alamona ifyo twaba ku nse, ‘alalabule mitima,’ kabili ‘alalingulula no mutima.’ (Amapinda 17:3; 21:2) Kanshi ena alamona ne fyo tuletontonkanya, ico twacitila ifintu fimo ne fyo tulefwaya ukucita.

Yehova aleshiba amafya tupitamo kabili alomfwa no kulila kwesu. Kemba wa malumbo alembele ukuti: “Amenso ya kwa Yehova alosha pa balungama, na matwi yakwe alosha ku nkuuta yabo; Yehova aba mupepi na ku baputuke misana, kabili abafunshike mitima alabapususha.” (Amalumbo 34:15, 18) Ala tulomfwa bwino ukwishiba ukuti Yehova alamona amafya tulepitamo kabili alomfwa ukupaapaata kwesu uko tumupaapaata ne mitima yesu yonse!

Yehova Lesa aleshiba fyonse ifyo umuntu engacita na mu bumfisolo. Ca cine, “fyonse fyaba ubwamba kabili fyaba pa mbilibili ku menso ya uyo tukalubululako.” (AbaHebere 4:13) E ico Lesa alamona conse ico tulecita, nampo nga cisuma atemwa cibi. (Amapinda 15:3) Ku ca kumwenako, pa Ukutendeka 6:8, 9 patila ‘Noa asangile ukusenaminwa ku menso ya kwa Yehova’ na kabili patila “Noa aleenda na Lesa.” Ca cine, Noa alisenaminwe kuli Yehova kabili alipaalilwe pantu aleumfwila amafunde ya kwa Lesa ayalungama. (Ukutendeka 6:22) Lelo, abantu ba mu nshiku sha kwa Noa bali no lukaakala kabili bali ne misango yabipa. Lesa alemona ifyabipa ifyo balecita. ‘Yehova alimwene ukuti bwafulo bubi bwa bantu pano isonde, no kuti ukulinga konse kwa matontonkanyo ya mitima yabo kwabipa fye inshiku shonse.’ Pa kulekelesha, Yehova alyonawile ababipa lelo apuswishe Noa no lupwa lwakwe.—Ukutendeka 6:5; 7:23.

Bushe Yehova alomfwa bwino nga amona ifyo mulecita? Pantu amenso ya kwa Yehova yena “yalolo ku no ku yalabebeta mu calo conse ku kuilango kuti wa maka ku kwafwa ababa ne mitima ya mpomfu kuli wene.” (2 Imilandu 16:9) Nomba line ali no konaula ababipa bonse pano calo na kabili, lelo abalungama bena akabapususha.—Amalumbo 37:10, 11.