Ukusekelela “pa Kucimfisha Pamo no Mwana wa Mpaanga”

MUNYINEFWE Carey W. Barber, alilembele kalata mu 1971, ilyo abombele imyaka 50 mu mulimo wa kwa Lesa wa cine, alembele ukuti: “Imyaka yonse iyo nabombela Yehova, naliba ne nsansa icine cine. Ukulaba pamo na bantu bakwe; ukucingililwa ku bacita ifyabipa ababa muli ici calo ca kwa Satana; isubilo lya kucimfisha pamo no Mwana wa Mpaanga, Yesu Kristu; no bushininkisho bwa kuti Yehova alintemwa e filenga ukuti imbe no mutende no kulaumfwa bwino no kunenga ukushininkisha ukuti bushiku bumo, ndi no kucimfya.”

Ilyo papitile imyaka 6, Munyinefwe Barber, Umwina Kristu wasubwa no mupashi, aishileba mwi Bumba Litungulula ilya Nte sha kwa Yehova. Inshita yonse iyo ali mwi Bumba Litungulula pa myaka 30, atwalilile fye ukulafwaisha “ukucimfisha pamo no Mwana wa Mpaanga.” Alicimfishe pamo no Mwana wa Mpaanga pantu ali uwa cishinka mpaka fye na lintu afwile ne myaka 101 pa Mulungu, April 8, 2007.—1 Abena Korinti 15:57.

Ba Carey Barber bafyalilwe mu England mu 1905, kabili babatishiwe mu 1921 ku Winnipeg mu Canada. Ilyo papitile imyaka ibili, bena pamo na ba Norman ba mpundu munabo, bakuukiile ku Brooklyn, ku citungu ca New York, uko babetile ku kuya mu kubomba umulimo pa maofeshi yakalamba aya Nte sha kwa Yehova. Pali iyi nshita, e lyo abantu ba kwa Yehova bali fye mupepi no kutendeka ukulaipangila abene ifitabo fya kubomfya mu kubila imbila nsuma ya Bufumu “pano isonde ponse.” (Mateo 24:14) Umulimo uo Munyinefwe Barber alebomba ilyo afikile fye wali wa kupulinta pali kamashini akanono. Impapulo shimo isho alepulinta pali iyi mashini ni shilya baleya mu kubomfya pa kulubulula imilandu mu cilye cikalamba ica mu calo ca United States. Mu kuya kwa nshita, Munyinefwe Barber alibombele mu Dipartimenti yangalila ifilonganino no mulimo wa kushimikila mu United States.

Iyi milimo yalengele ukuti Munyinefwe Barber abe uwalinga sana ilyo bamusontele ukuba kangalila wenda mu 1948, ali no kulatandalila bamunyinefwe pa kulongana kukalamba e lyo ne filonganino fyonse ifyaba ku masamba ya United States. Alandile ukuti ico atemenwe sana, kulabomba umulimo wa kushimikila pa kuti alepupwako akamwela. Uyu mulimo e walengele ukuti bamunyinefwe na bankashi abengi beshibane na Munyinefwe Barber. Pa mulandu wa kuti aali uwacenjela sana kabili ali uwacincila mu mulimo, calengele ukuti abombe bwino ilyo aile ku sukulu lya bamishonari ilyalenga 26. Ku sukulu kwine uku, e ko aishibanine no mwana we sukulu munankwe uwafumine ku Canada, ishina lyakwe ni Sydney Lee Brewer. Ilyo bapwishishe fye isukulu balyupene, kabili pa numa fye ya bwinga baile mu kubombela ifilonganino fyali mupepi mu citungu ca Illinois, mu musumba wa Chicago. Nkashi Barber alebomba bwino sana na balume bakwe, alebakoselesha lyonse pa myaka 20 iyo babombele pamo umulimo wa kwenda.

Abaishibe Munyinefwe Barber pa myaka iingi iyo abombele nga kangalila wa citungu nangu uwa muputule nangu ilyo abombele pa myaka 30 umulimo wa kutandalila ifyalo fyalekanalekana ilyo ali mwi Bumba Litungulula, bakalaibukisha fye pe amalyashi ayo alelanda ne fyo alebakoselesha. Kanshi na ifwe tufwile ukulasekelela pa fyo ‘acimfisha pamo no Mwana wa Mpaanga.’