Fundeni Abana Benu

Timote—Aali Uwaipekanya Kabili Aliipeeleshe Ukubomba

“BUSHE nauipekanya?” Bushe balikwipushapo ilipusho lya musango yu?— Nga kwali uwakwipwishe, ninshi limbi alefwaya ukwishiba nga ca kuti naubuula kale amabuuku ya kusambililamo. Nelyo nga ca kuti walibelengapo apo uli no kusambilila. Nge fyo twalamona, Timote aliipekenye.

Timote kabili aliipeeleshe. Bushe nawishiba umo ico cilolele?— Ilyo Timote bamwitile ku kubombela Lesa, umutima wakwe wali ngo wa mubomfi wa kwa Lesa umbi uwatile: “Ndi pano! ntumeni.” (Esaya 6:8) Pa mulandu wa kuti Timote aali uwaipekanya kabili aliipeleshe ukubombela Lesa, ali ne nsansa mu bumi bwakwe. Bushe kuti watemwa ukumfwa ifyo ubumi bwakwe bwali?—

Timote afyalilwe ku Lustra, kabili paali intamfu iitali ukufuma muli ulya musumba ukufika ku Yerusalemu. Loisi nakulu, na nyina Yunike balibikile sana amano ku kusambilila Amalembo. Timote aali fye akanya ilyo batampile ukumusambilisha Icebo ca kwa Lesa.—2 Timote 1:5; 3:15.

Timote napamo aali umupungwe ilyo Paulo na Barnaba abali pa lwendo lwa kushimikila batandalile umusumba wa Lustra. Ulu e lwendo lwa kubalilapo pa nyendo ishitali isho baendele. Ifwile ni ilya iine nshita e lyo nyina na nakulu kwa Timote basangwike Abena Kristu. Bushe kuti watemwa ukwishiba amafya ayo Paulo na Barnaba bapitilemo?— Abantu abashali Abena Kristu bapolele Paulo amabwe ica kuti awa na pa nshi, bamukulila na ku nse ya musumba. Abamumine bena bamwene fye ukuti Paulo nafwa.

Abasumine ifyo Paulo alesambilisha baile apo bamushiile, kabili Paulo alipuputwike no kwima. Ubushiku bwakonkelepo, Paulo na Barnaba balifumine mu Lustra lelo balibweleleko inshita imbi. Ilyo babweleleko, Paulo alandile ilyashi no kweba abatumwa ukuti: “Tukengila mu bufumu bwa Lesa mu macushi ayengi.” (Imilimo 14:8-22) Bushe nawishiba umo Paulo aloseshe ilyo alandile aya mashiwi?— Aloseshe mu kuti abantu baali no kulacusha ababombela Lesa. Pa nshita imbi Paulo alembeele Timote ukuti: “Bonse abafwaisha ukwikala umwabela ukuipelesha kuli bukapepa bakapakaswa.”—2 Timote 3:12; Yohane 15:20.

Ilyo Paulo na Barnaba bafumine ku Lustra, babwelele ku mwabo. Cilya papite myeshi, Paulo ayambile ukwenda na Sila kabili bonse babwelele mu kukoselesha abasambi abapya mu fitungu umo Paulo ashimikile kale. Ilyo bafikile mu Lustra, Timote afwile alitemenwe nga nshi pa kumona Paulo na kabili! Kabili alicililepo ukutemwa ilyo Paulo na Sila bamwipwishe nga kuti atemwa ukulabomba na bo. Timote alisumiine. Aali uwaipekanya kabili aliipeleshe ukuya na bo.—Imilimo 15:40–16:5.

Aba batatu baendele intamfu iitali capamo, e lyo baishilenina mu bwato. Ilyo bayabukile kwi shilya, baile ku Tesalonika mu citungu ca Grisi. Abantu abengi balisangwike Abena Kristu uku. Lelo bambi balifulilwe ica kuti balonganike ibungwe pa kuti bemine abatumwa. Ilyo Paulo, Sila na Timote baishibe ukuti balefwaya ukubepaya, balifumine mu Tesalonika no kuya ku Berea.—Imilimo 17:1-10.

Paulo alisakamene sana ulwa Bena Kristu abapya mu Tesalonika, e calengele atumeko Timote. Bushe nawishiba ico Timote aali no kuyacita kulya?— Pa numa, Paulo alondolwelele Abena Kristu mu Tesalonika umulandu atumiineko Timote. Atile, ni pa kuti ‘amukoshe no kumusansamusha ukuti umuntu nangu umo etelentenshiwa.’ Bushe nawishiba ico Paulo atumiine Timote umwaice kuli ilya ncende uko balefwaya ukubepaya?— Ni co Timote tabamwishibe sana balya balwani, e lyo no mwine aaliyipeleshe ukuyako. Timote alishipile sana pa kuti aye ku Tesalonika! Bushe ukutandala kwakwe kwali shani? Ilyo abwelulwike, Timote ashimikile Paulo ukuti, abena Tesalonika baali ne citetekelo nga nshi. Paulo na o e pakulembela abena Tesalonika ukutila: “Natusansamushiwa pali imwe.”—1 Tesalonika 3:2-7.

Timote abombele na Paulo pa myaka 10 iyakonkelepo. Pa numa, Paulo balimukakile mu cifungo mu Roma, lelo iyi nshita Timote ena ninshi alifuma mu cifungo. E ico aliile kuli Paulo. Ilyo aali mulya mwine mu cifungo, Paulo alembeele abena Filipi kalata, nalimo Timote e wamulembeeleko. Muli ilya kalata Paulo alembele ukuti: ‘Ndesubila ukumutumina Timote pantu nshikwete umuntu umbi uwa cishinka uwingamupyungila bwino ukucila ena.’—Abena Filipi 2:19-22; AbaHebere 13:23.

Aya mashiwi ya kwa Paulo yafwile yalengele Timote ukuba ne nsansa sana! Paulo alitemenwe sana Timote pantu aali uwaipekanya kabili aliipeeleshe ukubomba. Tulesubila ukuti na iwe wine e fyo ukaba.

Amepusho:

○ Timote akuliile kwi, kabili cinshi cacitike ilyo Paulo atandaliile ilya ncende umuku wa kubalilapo?

○ Timote acitile shani ilyo bamulombele ukuti alebombela pamo na Paulo na Sila?

○ Timote alangile shani ukuti alishipile kabili cinshi calengele Paulo amutemwe sana?

[Icikope pe bula 24]

Cinshi cicitike apa?