Palameni Kuli Lesa

Bushe Umuntu Uuli no ‘Bulanda Kabili Uusakamikwe’ Kuti Abelelwa Uluse?

2 SAMWELE 12:1-14

BONSE tulabembuka imiku iingi. Te mulandu ne fyo twingomfwa ububi pa fyo tucitile, limo tulaipusha ukuti: ‘Bushe Lesa alakutika nga namulomba ukufuma pa nshi ya mutima ukuti anjelele? Bushe akambelela uluse?’ Baibolo ilatusansamusha ilyo itusambilisha ukuti: Nangu ca kutila Yehova tatekelesha ulubembu, alabelela umuntu uluse nga alapila. Icilanga ukuti alabelela umuntu uluse cintu cacitikile Imfumu Davidi iya mu Israele, icalembwa muli 2 Samwele icipandwa 12.

Tontonkanyeni pa fyo cali. Davidi alicitile imembu ishikalamba. Alicitile ubucende na Bati-sheba. Lyena aeseshe ukufishilisha ulubembu acitile nomba alifililwe, e co aipaishe umulume wa kwa Bati-sheba. Davidi atwalilile fye ukufisa imembu acitile pa myeshi iingi. Lelo Yehova alishibe fyonse ifyalecitika. Alishibe imembu Davidi acitile, kabili alishibe no kuti Davidi kuti alapila. (Amapinda 17:3) Cinshi Yehova acitile?

Yehova atumine kasesema Natani kuli Davidi. (Icikomo 1) Umupashi wa mushilo watungulwile Natani, kabili aile ku mfumu Davidi. Natani alishibe ukuti alingile ukubomfya umucenjelo pa kulanda nankwe. Bushe ali no kucita shani pa kuti alenge Davidi eshibe ukuti aleibepa fye pa kulafishilisha ulubembu lwakwe, no kumwafwa ukwishiba ifyo ulubembu lwakwe lwakulile?

Pa kuti Davidi eipokolola ku lubembu acitile, Natani alandile icilangililo icali no kufika Davidi pa mutima, uwali kale kacema wa mpaanga. Ici cilangililo calelanda pa bantu babili, uwa fyuma no mupiina. Uwa fyuma alikwete “impaanga ishingi ne ng’ombe,” lelo umupiina “akwete fye akana ka mpaanga akakota kamo.” Uwa fyuma alipokelele umweni kabili alefwaya ukumupekanishisha ifya kulya. Nomba tabuulile pa mpaanga isho akwete, lelo abuulile akana ka mpaanga aka mupiina ako akwete fye. Davidi alemona kwati ili lyashi lya cine, kabili alifulilwe icine cine no kusosa ukuti: “Umuntu uwacita ico afwile ukufwa!” Mulandu nshi afulilwe? Davidi atile pantu uyu muntu “tali na luse.”a—Ifikomo 2-6.

Icilangililo Natani abomfeshe califikile Davidi pa mutima. Ifyo Davidi ayaswike fyalangile ukuti ali no mulandu. E lyo nomba Natani amwebele ukwabula ukupita na mu mbali ukuti: “Uyo muntu ni mwe!” (Icikomo 7) Apo Natani atuminwe na Lesa, calimoneke ukuti Yehova alikalipe pa fyo Davidi acitile. Ifi Davidi apulile mu mafunde ya kwa Lesa, alangile ukuti tacindike Lesa uwabikileko amafunde. Lesa amwebele ukuti: “Walinsuulile.” (Icikomo 10) Balimukalipile ica kuti ifyo bamwebele fyalimufikile pa mutima kabili alisumine ukuti: “Nimembukila Yehova.” Natani aebele Davidi ukuti Yehova namubelela uluse, lelo kwena ali no kulobolola mu fyo acitile.—Ifikomo 13, 14.

Ilyo ulubembu lwakwe lwasokolweke, e lyo Davidi alembele amashiwi ayo tusanga mwi buuku lya Amalumbo 51. Muli ici cipandwa, alembele ifyo aumfwile ububi pa fyo acitile, ukulangilila ukuti alilapile nga nshi. Ilyo Davidi abembwike alisuulile Yehova. Lelo ilyo alapile no kwishiba ukuti Yehova alimubelele uluse, alandile kuli Yehova ukuti: “Umutima uwa bulanda kabili uwasakamikwa, tamwakausuule, mwe Lesa.” (Amalumbo 51:17) Aya mashiwi kuti yasansamusha nga nshi umuntu uwalapila uulefwaya ukuti Yehova amubelele uluse.

[Futunoti]