Mulandu Nshi Cawamina Ukukanacelwa?

TACAYANGUKA ukufika bwangu, nelyo ukukanacelwa. Pa filenga ukuti abantu balecelwa paba ukwenda intamfu iikalamba, imyotoka ukufula pa musebo, no kukwata ifya kucita ifingi. Nangu cibe fyo, ukufika bwangu kwalicindama. Ku ca kumwenako, umuntu uushicelwa ku ncito, alacetekelwa kabili bamumona ukuti alibikako amano. Lelo, uucelwa, alabwesesha pa nshi imilimo ya bambi kabili ne fyo balebombelapo tafiba bwino sana. Umwana we sukulu nga alecelwa ku sukulu kuti alapuswako ku masambililo yamo no kupaasa te kuti apaase bwino. Umuntu nga acelwa ukufika ku cipatala kuti calenga bafilwa ukumundapa bwino.

Na lyo line, ku ncende shimo abantu tabamona ukuti ukufika bwangu kwalicindama. Kanshi nga twikala ku ncende sha musango yo, na ifwe kuti twatendeka ukulacelwa. Nga tulacelwa, tufwile ukutontonkanya pa fingalenga twapata ukucelwa. Nga twaishiba ubusuma bwaba mu kusunga inshita tatwakulacelwa. Finshi fimo ififwile ukulenga twilacelwa? Kuti twacita shani pa kutila twilacelwa? Busuma nshi bwaba mu kukanalacelwa?

Yehova Lesa Alasunga Inshita

Icikalamba sana icingalenga twilacelwa kufwaya ukupashanya Lesa uo tupepa. (Efes. 5:1) Yehova alitulanga bwino sana ukuti alasunga inshita muli fyonse. Taabala acelwapo. Afikilisha ubufwayo bwake pali iyo ine nshita bufwile ukufikilishiwapo. Ku ca kumwenako, ilyo Yehova apangile ukonaula icalo cabipa ku lyeshi, aebele Noa ukuti: “Upange icibwato ca miti iyakosa.” Ilyo inshita yakonaula icalo cabipa yapaleme, Yehova aebele Noa ukwingila mu cibwato no kumweba ukuti: “Mu nshiku fye 7 ishashalako nkaloshe mfula pe sonde inshiku 40 akasuba no bushiku; kabili nkalofya conse ico napanga pe sonde.” Yehova alisungile inshita pantu “ilyo papitile inshiku 7 ilyeshi lyabunshishe isonde.” (Ukute. 6:14; 7:4, 10) Elenganyeni ifyo cali no kuba Noa no lupwa lwakwe abacelwa ukwingila mu cibwato. Nga filya fine Lesa balepepa asungile inshita, nabo bene e fyo bacitile.

Ilyo papitile imyaka nalimo 450, pa numa ya Lyeshi, Yehova aebele Abrahamu ukuti ali no kukwata umwana umwali no kufyalilwa Umwana wa bulayo. (Ukute. 17:15-17) Lesa alandile ukuti Isaki akafyalwa “pa nshita nga ino, uyu mwaka uleisa.” Bushe calicitike? Amalembo yatweba ukuti: “Sara alimiite no kufyalila Abrahamu umwana mwaume mu bukote bwakwe pa nshita ilya ine Lesa amwebele.”—Ukute. 17:21; 21:2.

Muli Baibolo mwaliba ifya kumwenako ifingi sana ifilanga ifyo Lesa acita ifintu pa nshita ilya ine aimika. (Yer. 25:11-13; Dan. 4:20-25; 9:25) Baibolo itweba ukuti tufwile ukutwalilila ukulolela ubushiku bwa bupingushi ubwa kwa Yehova. Nangu cingamoneka kwati ‘buleshingashinga,’ twalicetekela ukuti ‘tabwakacelwe.’—Haba. 2:3.

Tatufwile Ukucelwa mu Kulongana

Pa ‘nshita sha mitebeto isho Yehova abebele ukulasefya’ abaume bonse abena Israele balekabila ukulalongana ku cifulo cimo icasalilwe kabili tabalingile ukulacelwa. (Lebi 23:2, 4) Lesa kabili alebeba ne nshita balingile ukulapeelelapo amalambo yamo. (Ukufu. 29:38, 39; Lebi 23:37, 38) Bushe ifi fyonse tafilelanga fye ukuti Lesa tafwaya ababomfi bakwe ukucelwa mu kupepa?

Mu nshita ya batumwa ilyo umutumwa Paulo afundile Abena Korinti pa fyo ukulongana kwa Bena Kristu kulingile ukuba, abebele ukuti: “Fyonse filecitika bwino bwino kabili ukwabula icimfulunganya.” (1 Kor. 14:40) Kanshi, ukulongana kwa Bwina Kristu kwalingile ukulatendeka pa nshita iyaimikwe. Na pali ino ine nshita, Yehova tafwaya abantu bakwe ukucelwa ku mapepo. (Mal. 3:6) E ico, finshi tulingile ukucita pa kuti twilacelwa ku kulongana?

Ifingatwafwa Ukanalacelwa

Bamo balimona ukuti ukupekanishisha limo kulafwa nga nshi. (Amapi. 21:5) Ku ca kumwenako, nga ca kuti tulefwaya ukuya ku cifulo cimo no kuyafika pa nshita iimikwe, bushe kuti cawama ukwima lilya kwashala inshita ilya ine fye twendapo pali iyo ntamfu? Bushe te kuti cibe bwino sana nga twaima ilyo kucili inshita iikalamba pa kuti tatucelelwe nangu kwacitika “ifintu fyabula ukwenekela” ilyo tuleya? (Luk. Mil. 9:11) José,a umulumendo uushicelwa alanda ukuti: “Icingafwa umuntu ukukanacelwa kwishiba inshita iingafwaikwa pa kuya ku cifulo cimo.”

Bamo nalimo icingalenga belacelwa ku kulongana kwa Bwina Kristu kulainuka bwangu pa ncito. E fyo Nte umo mu Ethiopia acitile ilyo amwene ukuti nga ca kuti uwa kumukombola aleisa pa nshita iyo akampani kaimika, ninshi kuti alecelwa mu kulongana pa maminiti 45. Aumfwene no walemukombola ukuti aleisa bwangu pa nshiku sha kulongana pa kuti ena aleinukako bwangu. E lyo Nte alisumine ukulabombelako umunankwe uwalemukombola bwangu iciputulwa cimo ica ma-awala 7.

Nga twalikwata abana abanono, ninshi tulingile no kubombesha sana pa kuti twilacelwa mu kulongana. Ilingi line ababomba umulimo wa kupekanya abana ni banyinabo, lelo na bambi mu lupwa bafwile ukubafwako. Nkanshi uwa ku Mexico uwe shina lya Esperanza akwata abana 8 abo asakamana eka fye. Umunono nomba ali ne myaka 5 no mukalambapo ali ne myaka 23. Ba Esperanza balondolola icalenga ulupwa lwabo ukulafika bwangu ku kulongana. Batila: “Abana bakashana abakulilepo balangafwa ukupekanya abana abanono. Ici cilenga nakwata inshita ya kupwisha imilimo ya pa ng’anda bwangu no kuipekanya ukuya ku kulongana pa nshita twaimika.” Ulu lupwa lwalimika inshita ya kwima pa ng’anda, kabili bonse balabombela pamo pa kuti baleima iyo ine inshita.

Ubusuma Bwaba mu Kukanacelwa mu Kulongana

Nga twatontonkanya pa busuma bwa kufika bwangu pa kulongana kwa Bwina Kristu kuti tule-esha na maka ukukanalacelwa. Umukashana we shina lya Sandra, uwatemwa ukufika bwangu pa kulongana atila: “Ico mfikila bwangu ni pa kuti mposhanyeko na bamunyinane na bankashi, no kushimika nabo ilyashi, e lyo no kubeshiba bwino.” Nga tulefika bwangu pa Ng’anda ya Bufumu, tukalaipakisha ukumfwa ifyo bamunyinefwe bashipikisha ne fyo babombela Lesa muli bucishinka. Ilyo tuli nabo kabili tulelanda pa fintu ifisuma, na ifwe kuti twakoselesha bamunyinefwe na bankashi ku “kutemwa kabili ku kubomba imilimo iisuma.”—Heb. 10:24, 25.

Ulwimbo lwa kwiswila ne pepo pa kulongana kwa Bwina Kristu fyalicindama sana mu kupepa kwesu. (Amalu. 149:1) Inyimbo shesu shilalumbanya Yehova, shilatwibukisha na pa mibele iyo tufwile ukukwata, kabili shilatucincisha ukubomba ne nsansa mu mulimo wa kushimikila. Inga ipepo lya kwiswila? Ku kale, Yehova aleita itempele lyakwe ukuti “ing’anda ya kupepelamo.” (Esa. 56:7) Muno nshiku, tulalongana pamo ku kupepa kuli Lesa. Pe pepo lya kwiswila tatulomba fye ukuti Yehova atutungulule no kutupeela umupashi wa mushilo lelo ipepo lilalenga no kuti tupekanye amatontonkanyo ne mitima yesu ku kupokelela ifyebo pali uko kulongana. Tufwile ukupampamina pa kulafika bwangu ku kulongana pa kuti tulesangwa ku lwimbo na kwi pepo lya kwiswila.

Ilyo Helen uuli ne myaka 23 alelanda pa calenga ukuti alefika bwangu pa kulongana, atile: “Ntontonkanya ukuti e fyo mfwile ukucita pa kulanga ukuti nalitemwa Yehova, pantu alatupekanishisha ifyebo tusambilila, ukusanshako fye ne nyimbo ne pepo lya kwiswila.” Bushe na ifwe e fyo tumona? Na ifwe bene e fyo tufwile ukutontonkanyapo. E ico, lekeni na ifwe tule-esha na maka pa kuti twilacelwa muli fyonse, maka maka ilyo tuleya mu kupepa Lesa wa cine.

[Futunoti]

[Icikope pe bula 26]

Pekanishisheni kabela

[Icikope pe bula 26]

Muleshako inshita iikalamba pantu limo kulacitika “ifyabula ukwenekela”

[Ifikope pe bula 26]

Ipakisheni ubusuma bwaba mu kufika bwangu pa kulongana