Ipepo

1 Mulandu Nshi Tulingile Ukupepela?

IPEPO. Muli Baibolo mwaliba amalyashi ayengi ayasuma kabili ayalenga ukuti tulefwaisha ukuyeshiba. Tontonkanyeni pa mepusho 7 ayo abantu bepusha pe pepo; kabili moneni ne fyo Baibolo yasuka aya yene mepusho. Ici cipande e lyo ne fikonkelepo, filembelwe ukuti fimwafwe ukutendeka ukupepa e lyo no kumwafwa ukwishiba ukupepa pa kuti amapepo yenu yaleumfwika.

MWI sonde fye lyonse, abantu ba mitundu yalekanalekana ne mipepele balapepa. Balapepa nga bali beka nelyo nga nabalongana. Balapepa nga bali mu macalici, mu matempele, mu masunagoge, mu fikuulwa fya kupepelamo ifya baShilamu, nelyo mu mfuba. Pa kupepa, nalimo bafukama pali tu mati, bamo babomfya kolona, ifipasho, ututabo balembamo amapepo, nelyo babelenga amapepo ayo balembela limo pa tupampa uto bakobeka pamo.

Ukupepa e kwalenga abantu bapusaneko ne fya mweo fimbi pano calo. Cishinka ukuti abantu ne nama balipalanako mu fintu fimo. Ku ca kumwenako, fwe bantu tulakabila ifya kulya, umwela, na menshi kabili ifi fine e fyo ne nama shikabila. Na kabili nga filya fine caba ku nama, tulafyalwa, tulaba no mweo, kabili tulafwa no kufwa. (Lukala Milandu 3:19) Lelo bantu fye e bapepa. Mulandu nshi?

Icasuko cayanguka ca kutila, tulakabila ukupepa. Na kuba, ipepo e nshila abantu balandilamo na Lesa nelyo fyonse ifyo bamona ukuti fya mushilo kabili fyabako umuyayaya. Baibolo ilanga ukutila Lesa atupangile ukuti tulepepa. (Lukala Milandu 3:11) Inshita imo, Yesu Kristu atile: “Balipaalwa abaishiba ukuti balakabila ifya kwa Lesa.”—Mateo 5:3.

Pa mulandu wa kuti “abantu balakabila ifya kwa Lesa,” e calenga ukuti balekuula ifikuulwa fya mapepo, balepanga no kulenga ifya kubomfya mu mapepo, kabili e co bapoosela ne nshita iikalamba mu kupepa. Lelo abantu bamo tabafwaya ukupepa, baicitila fye ifyo abene balefwaya nelyo bashintilila pa bantu banabo. Lelo bushe tamumona ukuti abantunse te kuti batwafwe muli fyonse ifyo tukabila? Fwe bantunse tuli bena kufwa, twikala fye inshiku ishinono pa calo, kabili tatwishiba ifya ku ntanshi. Uwingatwafwa mu fya kwa Lesa ifyo tukabila, ni uyo uwakwata amano ukucila fwe bantunse, uwakwatisha amaka kabili uushingafwa. Nomba finshi ifi fine ifya kwa Lesa ifyo tukabila ifilenga tulepepa kuli ena?

Tontonkanyeni pali ifi: Bushe tamwabala amufwayapo uwa kumutungulula, ukumupandako amano, nelyo uwa kwasuka amepusho ayo abantu bashingasuka? Nga mwalifwilwapo, bushe tamwabala amufwayapo uwa kumusansamusha, nelyo uwa kumupandako amano ukupingula ica kucita pa cintu icikosele, nangu uwa kumubelela uluse nga mwacita icilubo icamulenga ukumfwa sana ububi?

Baibolo ilanga ukutila, kuti twapepela pali ifi fyonse. Baibolo e citabo icingatusambilisha ifya kupepa kabili mwalilembwa amapepo ya baume na banakashi abengi abali ne citetekelo. Balipepele kuli Lesa pa kuti abasansamushe, abatungulule, ababelele uluse, no kwasuka amepusho ayakosesha ayo bakwete.—Amalumbo 23:3; 71:21; Daniele 9:4, 5, 19; Habakuki 1:3.

Nangu ca kutila aya mapepo yali ayapusanapusana, yonse yalipalene mu cintu cimo. Bonse abayapepele, balishibe icintu icacindama icilenga amapepo ukwasukwa, ico abantu abengi muno nshiku bashaishiba nelyo ico basuula. Ne ci ca kutila, bonse balishibe uo balingile ukupepako.