Ifyo Mwingalasambilila pa Mapepo ya Lupwa na pe Sambililo lya pa Lwenu

KU KUTENDEKA kwa mwaka wa 2009, ifilonganino fya Nte sha kwa Yehova fyalyalwile ukulongana. Batendeke ukukwata Isambililo lya Baibolo Ilya pa Cilonganino no Kulongana kwa Mulimo ne Sukulu capamo, pa kuti balekwata ubushiku bwa mapepo ya lupwa nelyo ubwa kuisambilisha. Bushe mulacita ifyo? Bushe mulanonkelamo sana mu kucita ifyo?

Bamo balafwaya ukwishiba ifyo bengalasambilila pa mapepo ya lupwa. Ibumba Litungulula talyalanda ukuti indupwa shonse shilesambilila ifyebo fimo fine. Apo indupwa shilapusanapusana, cila mutwe wa lupwa nelyo umuntu umwine, kuti amona ifya kusambililapo cila mulungu ifingafwa.

Pa mapepo ya lupwa, bamo bapekanya ukulongana. Lelo tamufwile ukulapekanya fye ukulongana pali iyi inshita. Bambi balabelenga Baibolo nelyo ifyebo fimo mu mpapulo shesu e lyo balanshanyapo. Bambi balacitako icangalo pa fyo babelenga mu Baibolo, maka maka nga balikwata abana abanono. Te lyonse cifwaikwa kabili te lyonse ciba bwino ukubomfya ifipusho ne fyasuko kwati ni filya ciba pa kulongana kwa cilonganino. Cilawama ukulalanshanya fye mu mutekatima no kuleka cila muntu alandapo ifili ku mutima. Amapepo ya lupwa nga yabe fyo yalafwa cila muntu ukutontonkanyapo sana pa filelandwapo, ne ci cilalenga bonse abasangilwepo ukuba ne nsansa.

Umutwe wa lupwa umo uwakwata abana batatu alembele ukuti: “Ifingi ifyo tucita fifuma mu fyo tubelenga mu Baibolo. Ilyo tatulatendeka amapepo ya lupwa, bonse tulabelengela libela ifipandwa fimo ifya mu Baibolo. Abana balasala ifyebo fimo pa fyo babelengele no kufwailishapo, e lyo baisalanda ifyo basangile pa mapepo ya lupwa. Michael uwa myaka 7 ilingi alalenga ifikope nelyo ukulemba ifyebo fimo mu mashiwi yakwe pa fyo abelenga. Davidi, uuli ne myaka 13, na Kaitlyn, uuli ne myaka 15, limo balalemba ifyo babelenga no kufilondolola kwati balemona ifilecitika. Ku ca kumwenako, ilyo twabelengele mwi buuku lya Ukutendeka icipandwa 40, pali filya Yosefe alondolwelele ababomfi ba kwa Farao umo ifiloto fyabo fyalolele, Kaitlyn alondolwele ifyalecitika ukulingana ne fyo umufungwa uwaletambako alemona.”

Ici ca kumwenako fye ica fyo indupwa shingacita pa mapepo ya lupwa. Apo fwe bantu twalipusanapusana, cila muntu nelyo cila lupwa kuti lwasala ifingabomba bwino. Akabokoshi kali muli cino cipande kaletulanga fimo fimo ifyo twingasambilila pa mapepo ya lupwa na lintu tuleisambilisha. Na imwe kuti mwatontonkanishishapo na fimbi.

[Akabokoshi ne Cikope pe bula 6, 7]

Indupwa umwaba abacaice:

• Mulebelenga no kulanshanya icitabo ca Ifipusho Abacaice Bepusha, ne Fyasuko Ifingabafwa.

• Mulebelenga Baibolo no kwelenganya ukuti e ko mwali ilyo ifyo mulebelenga fyalecitika. (Moneni Ulupungu lwa kwa Kalinda ulwa May 15, 1996, pe bula 14, amaparagrafu 17-18.)

• Landeni pa fya kwa Lesa ifyo mwingatendeka ukucita nomba line e lyo ne fyo mwingacita ku ntanshi.

• Muletambako amavidio libili libili e lyo no kulanshanyapo.

• Mulelanshanyako pa “Cipande ca Baice” iciba mu Ulupungu lwa kwa Kalinda.

Abaupana abashakwata abana:

• Kuti mwalanshanyako ifipandwa 1, 3, 11-16 ifya mu citabo ca Icaba Inkaama ku Nsansa sha Lupwa.

• Lanshanyeni pa fyo mwafwailishe pa fyebo mwabelengele mu Baibolo.

• Pekanyeni Isambililo lya Baibolo Ilya pa Cilonganino nelyo Isambililo lya Ulupungu lwa kwa Kalinda.

• Landeni pa fyo mwingacita pa kuti mulebomba sana umulimo wa kwa Yehova na bena mwenu.

Bamunyinefwe na bankashi abashimbe nelyo abo abena mwabo bashipepa nabo:

• Belengeni impapulo ishipya ishifuma pa kulongana kwa citungu.

• Belengeni ifitabo fya Yearbook ifipya ne fya kale.

• Fwailishenipo pa mepusho ayo abantu bepusha sana mu cifulo mubombela.

• Pekanyeni ifya kushimikila mwi bala.

Indupwa umwaba abana abanono:

• Citeni ifyangalo ukufuma mu malyashi ya mu Baibolo.

• Kuti mwacitako ifyangalo nga filya fiba pe bula 30 na 31 muli Loleni!

• Mulecitako ne fingafwa abana ukutontonkanya sana pa fintu. (Ku ca kumwenako, moneni icipande ca mutwe wa kuti “Mwaliba Ubusuma Ubwingi!” icaba mu Ulupungu lwa kwa Kalinda ulwa February 15, 2011, pe bula 11.)

• Mulelanshanyako na pa fipande fiba mu Ulupungu lwa kwa Kalinda ifitila: “Sambilisheni Abana Benu.”