Baibolo Ilaalula Abantu

CINSHI calengele ukuti umukashana uwalekele ukupepa atampe ukupepa na kabili? Yumfwileni ifyo umwine alondolola.

“Ino Nshita Naliba ne Nsansa.”—LISA ANDRÉ

UMWAKA BAFYELWE: 1986

ICALO: LUXEMBOURG

IFYO BALI: UMWANA WALUBILE

INKULILO YANDI: Nakulile mwi tauni ilinono ilya Bertrange, ilyaba mupepi no musumba wa Luxembourg. Ili tauni lilamoneka ilya busaka, tamwaba bumpulamafunde, kabili abantu abekalamo ba cuma. Twafyalwa basano, kabili e ine mwaice pali bonse. Abafyashi bandi ni Nte sha kwa Yehova, kabili balibombeshe ukutusambilisha imibele iisuma iyo Abena Kristu bafwile ukukwata.

Ilyo naishileba umukashana, natendeke ukutwishika sana ifyo Inte sha kwa Yehova balesambilisha. Pa kubala nshapooseleko sana amano kuli ifi naletwishika, lelo icitetekelo candi catampile ukunaka panono panono. Abafyashi bandi balyeseshe apapelele amaka yabo ukungafwa pa kuti ntwalilile ukuba mu nshila iisuma, lelo nshalefwaya. Natendeke ukwangala na banandi bacintomfwa kabili abafyashi bandi tabaishibe. Abanandi balikwete ubuntungwa bwa kucita ico balefwaya kabili na ine e fyo nalefwaya. Twaleya sana ku maparte, ukucita ubulalelale, ukubomfya imiti ikola, no kunwa sana ubwalwa. Pa kubala, naleumfwa bwino ukuba na aba bantu abalemoneka kwati baleipakisha ubumi.

Lelo ukulanda fye icishinka, nshali ne nsansa nangu panono. Ukwangala na aba banandi takwanengele ukuba ne nsansa; tapali nangu umo uwalesakamana pa fili fyonse. Nomba ine icalensakamika ca kuti nalefwaya ukwishiba umulandu mu calo mwabela ulufyengo ifi. Mu kuya kwa nshita, natendeke ukuba sana no bulanda.

IFYO BAIBOLO YA-ALWILE UBUMI BWANDI: Bushiku bumo, ilyo nali ne myaka 17, ubulanda bwandi bwalicililemo. Ilyo bamayo bamwene ifi, banjebele ukuti ntendeke ukusambilila Baibolo na kabili. Bankoseleshe ukuceceta ifyo Baibolo isambilisha pa kuti nsalepo ne mwine, nampo nga kulakonka ifyo yalanda nelyo iyo. Ifyo twalanshenye na bamayo ukufuma pa nshi ya mutima fyalengele ukuti njaluke mu fyo naletontonkanya. Nalisumine ukutendeka ukusambilila Baibolo na bakalamba bandi ba Caroline na bena mwabo ba Akif. Ba Akif tabakushiwe na bafyashi ba Nte, kanshi baishileba Inte ya kwa Yehova ilyo bakulile. Pa mulandu wa nkulilo yabo, calinyangukile ukulanda nabo ifyali ku mutima.

Nalishibe ukuti pa mulandu ne mibele yandi nshalingile ukuba Nte. Pa kubala, nalemona kwati ifyo nalecita tafyalekuma uuli onse. Lelo ilyo nalesambilila Baibolo, nalilwike ukuti imibele yandi yalekalifya Yehova. (Amalumbo 78:40, 41; Amapinda 27:11) Na kabili naishileishiba ukuti yalekuma na bantu bambi.

Ilyo natwalilile ukuceceta ifyaba muli Baibolo, nalisangile ubushininkisho ubwalelanga ukuti Baibolo Cebo ca kwa Lesa. Ku ca kumwenako, nalisambilile pa kusesema kwaba mu Baibolo ukwafikilishiwa mu kulungatika nga filya fine fye kwalembelwe. Ukwishiba ifya musango yu kwalengele ndeke ukutwishika ifyo naletwishika.

Ilyo papitile nalimo umwaka umo ukutula apo natendekele ukusambilila Baibolo, ine na bafyashi bandi twaile mu kutandalila ndume yandi uwalebombela pa maofeshi ya Nte sha kwa Yehova mu Germany. Ilyo namwene ifyo ndume yandi ali ne nsansa, nalikumbilwe nga nshi. Ukutula fye na kale, na ine nalefwaya ukuba sana ne nsansa! Kabili nalitemenwe ne fyo ba Nte bambi abalebombela pali yalya maofeshi bali. Balipusene sana na banandi abo naleangala nabo, abashali abafumacumi kabili abatemenwe fye ukwangala. Tapakokwele, nalipepele kuli Yehova ukufuma pa nshi ya mutima, namulaile ukuti nakulamubombela mpaka ne mfwa. Ilyo nali ne myaka 19, nalibatishiwe ukulanga ukuti nali-ipeele kuli Yehova.

IFYO NANONKELAMO: Ino nshita naliba ne nsansa. Ndatemwa nga nshi ukusambilisha bambi ifyaba mu Baibolo, ukubafwa ukwishiba Yehova ne fyo akacita ku ntanshi. Balupwa lwandi nabo baliba ne nsansa pantu nomba nshibasakamika.

Nalishiba ukuti nalilufyenye, nomba ndesha na maka yandi ukukanalatontonkanya fye pa fyo nalufyenye. Lelo ntontonkanya fye pa fyo Yehova ambelela uluse na pa fyo antemwa. Nalishininkisha no mutima wandi onse ukuti amashiwi yaba pa Amapinda 10:22 ya cine, ayatila: “Ipaalo lya kwa Yehova lilacindamika, kabili talundako ukucululuka.”

[Amashiwi pe bula 12]

“Twaleya sana ku maparte, ukucita ubulalelale, ukubomfya imiti ikola, no kunwa sana ubwalwa”

[Amashiwi pe bula 13]

“Nalishiba ukuti nalilufyenye, nomba ndesha na maka yandi ukukanalatontonkanya fye pa fyo nalufyenye”