Kuti Mwacita Shani pa Kusala Ifingalenga Mukabe ne Nsansa ku Ntanshi?

KUTI mwacita shani pa kuti mube ne nsansa mu bumi? Cimo ico mwingacita kutontonkanya sana pa fyo ifyo mupingulapo ukucita fingakuma ubumi bwenu ku ntanshi.

Ca cine ukutila kuti camukosela ukupingula ifintu ifingamulenga ukuba ne nsansa mu bumi bwenu bonse. Mulandu nshi? Pantu abengi bafwaya ukuti ifyo balefwaya ficitike ilyo line fye. Ku ca kumwenako, nalimo mwalishiba ukutila ukucita ifyo Baibolo ilanda kuti kwalenga ulupwa lwenu ukuba ulwaikatana. (Abena Efese 5:22–6:4) Lelo pa kuti ici cicitike, mufwile lyonse ukulakwata inshita ya kuba pamo no lupwa lwenu, ukukanalapoosa sana inshita ku ncito no kucefyako ukwangala. Nga filya fine caba, mufwile ukusalapo pa kucita ifingamuletela insansa pa nshita fye iinono nelyo ifingamuletela insansa na ku nshita ya ku ntanshi. Kuti mwacita shani pa kuti musale bwino? Ifintu fine ifyakonkapo kuti fyamwafwa.

 1 Muletontonkanya pa Fikafuma mu fyo Mulepingulapo Ukucita

Ilyo mulefwaya ukupingula pa fintu, tontonkanyeni bwino bwino pa fikafumamo. Baibolo itufunda ukuti: “Uwasalapuka nga amona ububi alabelama.” (Amapinda 22:3) Nga mwatontonkanya bwino bwino pa fyabipa ifingafumamo, kuti calenga mwakana ukucita ifingamuletelela. Lelo nga mwatontonkanya pa busuma bwingafuma mu kucita ifingalenga mwaba ne nsansa na ku ntanshi, mukafwaisha ukucita ifyo fine.

Yipusheni ukuti: ‘Finshi fikafuma muli ifi napingulapo ukucita ilyo pakapita umwaka umo, nelyo fye imyaka 10 nelyo 20? Bushe fikakuma shani ubumi bwandi? Bushe fikakuma shani balupwa lwandi na bantu natemwa?’ Ne cacindama sana ico mufwile ukuipusha ca kuti: ‘Bushe ifyo mpingwilepo ukucita fikasekesha Lesa? Bushe fikakuma shani bucibusa bwandi na ena?’ Apo Baibolo yafuma kuli Lesa, kuti yamwafwa ukwishiba ifyo Lesa atemwa no kwishiba ifingamuletelela ifyo nalimo mushingeluka.—Amapinda 14:12; 2 Timote 3:16.

 2 Mufwile Ukuipingwila mwe Bene

Abantu abengi tabafwaya ukuipingwila abene ifya kucita, bafwaya fye ukulakonkelela bambi. Lelo ukucita icintu cimo pa mulandu fye wa kuti e fyo abengi bapingwilepo ukucita takwakamulenge ukuba ne nsansa. Mufwile ukuipingwila mwe bene. Ku ca kumwenako, umfweni ifyo cali kuli Natalie.a Alondolwele ukuti: “Nalefwaya ukukwata icupo icisuma. Lelo nalishibe ukuti ifyo nalefwaya te kuti ficitike pantu imibele yandi tayaweme. Ku koleji nali, abanandi bonse bali abacenjela. Lelo lyonse fye ifyo balesala ukucita tafyaleba bwino. Bale-enda na balumendo na bakashana abapusanapusana. Na ine wine nale-enda na balumendo abapusanapusana. Iyi misango yalengele ukuti ndecula sana no mutima.”

Natalie atendeke ukusambilila Baibolo ne Nte sha kwa Yehova. Atile: “Ilyo natendeke ukusambilila Baibolo, naishilemona ukuti ba Nte baliba ne fyupo ifisuma e lyo imisepela nayo yaliba ne nsansa. Nangu ca kuti calinkosele ukwaluka, panono panono nalitendeke ukwaluka.” Finshi fyafuminemo? Natalie atile: “Ukufuma fye na kale, nalefwaya ukuupwa ku mwaume uo natemenwe sana. Mu kuya kwa nshita, naupilwe ku mwaume uwasumine fimo fine ne fyo nasuminamo. Nalishiba ukuti Lesa alimpeela ulupwa ulusuma sana ulwacila ne fyo naletontonkanya.”

 3 Muletontonkanya pa fyo Fikamukuma ku Ntanshi

Pa kuti tamuletontonkanya fye pa fikacitika mu myaka iinono, mulingile ukulatontonkanya na pa fya ku ntanshi ne fyo mwingacita pa kuti ifyo mulefwaya fikacitike. (Amapinda 21:5) Mwilatontonkanya fye pa myaka 70 nelyo 80 iyo abantu bekala pa calo. Lelo mule-elenganya ukuti muleipakisha ubumi bwa muyayaya mu calo cipya ico Baibolo ilandapo.

Baibolo ilondolola ukuti pa mulandu ne cilubula ca kwa Kristu Yesu, Lesa alipekanya ukuti abantunse bakekale umuyayaya. (Mateo 20:28; Abena Roma 6:23) Lesa alaya ukuti nomba line ali no kufikilisha ukufwaya kwakwe ukwa pa kutendeka ukwa kuti abantu bakekale umuyayaya pano isonde. Abatemwa Lesa bakakwata ishuko lya kuipakisha ubumi bwa muyayaya mwi sonde ilisuma. (Amalumbo 37:11; Ukusokolola 21:3-5) Na imwe bene kuti mwaisaikala muli ici calo nga ca kutila muletontonkanya pa fya ku ntanshi ilyo mulepingula pa fintu.

 4 Bombesheni pa Kuti Ifyo Mufwaya Fikacitike

Kuti mwacita shani pa kuti mukeseikala muli ici calo ico Lesa atulaya? Mulingile ukutendekelapo no kwishiba Lesa. (Yohane 17:3) Ukwishiba bwino Baibolo kukalenga mukacetekele ukuti ifyo Lesa alaya fikacitika. Ici cikalenga mukalefwaisha ukwalula ubumi bwenu pa kuti Lesa amutemwe.

Natulande pa fyo cali kuli ba Michael. Balondolwele ukuti: “Natendeke ukunwesha ubwalwa no kubomfya imiti ikola ilyo nali ne myaka 12. Nali mwi bumba lya bacintomfwa kabili naletontonkanya ukuti nali no kufwa ilyo nshilafisha ne myaka 30. Pa miku iingi nalefwaya ukuipaya pantu nshali ne nsansa. Nalishibe ukutila kuti naba no bumi ubusuma, nomba nshaishibe ifya kucita.” Ilyo ba Michael bali ku sekondari, umulumendo bali nankwe mwi bumba lya bacintomfwa atendeke ukusambilila Baibolo ne Nte sha kwa Yehova. Ba Michael nabo balisumine ukulasambilila Baibolo.

Ifyo basambilile muli Baibolo fyalyalwile ifyo baletontonkanya pa nshita ya ku ntanshi. Batile: “Nasambilile ukuti ku ntanshi isonde likaba paradaise, no kuti abantu bakalaikala umutende ukwabula ica kusakamana. Natendeke ukutontonkanya ukuti na ine wine kuti naisaikala muli ici calo. E ico napingwilepo ukuba cibusa wa kwa Yehova. Lelo limo nalefilwa ukucita ifyo Lesa afwaya. Na lintu natampile ukusambilila Baibolo, limo nalekolwa kabili inshita imo nalicitilepo no bupulumushi.”

Bushe ba Michael bacitile shani pa kuti baleke imisango yabo iyabipa? Batile: “Abalensambilisha Baibolo balenkoselesha ukulabelenga Baibolo cila bushiku no kulasangwa na bantu abalefwaya ukulasekesha Lesa. Naishileiluka ukuti abo naleangala nabo balenenga ukulacita ifyabipa. Nangu ca kuti bali kwati ni balupwa lwandi, nalilekele ukwangala nabo kabili nalifumine na mwi bumba lya bacintomfwa.”

Ba Michael bapingwilepo ukucita ifintu ifyabafwile ukufikilisha ipange lyabo ilikalamba ilya kulakonka amafunde ya kwa Lesa. Ifi fine e fyo na imwe mwingacita. Lembeni ifyo mulefwaya ukubombelapo ku ntanshi, e lyo ne fyo mwalacitapo pa kuti mukafikilishe amapange yenu. Ebeniko abanenu abo mwacetekela ifyo mulepanga ukucita no kubeba ukuti balemwafwa pa kuti mukafishepo amapange yenu.

Mwilashingashinga ukusambilila pali Lesa no kulacita ifyo afwaya. Tendekeniko ino ine nshita ukulacita ifikalenga ukuti mutemwe sana Lesa ne Cebo cakwe Baibolo. Baibolo ilondolola umuntu uukonka amafunde ya kwa Lesa ukuti: “Conse ico acita cikatunguluka.”—Amalumbo 1:1-3.

[Futunoti]