AMASUKO KU MEPUSHO YA MU BAIBOLO
Bushe nani ateka cino calo?
Lesa nga e uteka, bushe mu calo nga mwaliba ukucula kwa musango uyu?
Abantu abengi batontonkanya ukuti Lesa e uteka cino calo. Nga ca kuti Lesa e uteka icalo, bushe mu calo nga mwaliba ukucula kwa musango uyu? (Amalango 32:4, 5) Baibolo itila, uutungulula cino calo mubifi.—Belengeni 1 Yohane 5:19.
Bushe uyu mubifi atendeke shani ukutungulula abantu? Ilyo Lesa apangile abantu, malaika umo alipondweke kabili atunkile abantu ba kubalilapo ukupondokela Lesa. (Ukutendeka 3:1-6) Aba abantu ba kubalilapo basalilepo ukumfwila Satana kabili e fyo Satana atampile ukubatungulula. Lesa wa Maka Yonse e walinga fye ukuteka abantu, lelo afwaya ukuti abene e baitemenwa ukusalapo ukuti alebateka. (Amalango 6:6; 30:16, 19) Ku ca bulanda, Satana alilufya abengi muno nshiku ica kuti basalapo ukulatungululwa na ena nga filya Adamu na Efa bacitile.—Belengeni Ukusokolola 12:9.
Nani akafumyapo amafya ya bantunse?
Bushe Lesa akaleka Satana ukutwalilila ukuteka abantunse? Awe! Lesa akabomfya Yesu ukufumyapo ifyabipa fyonse ifyo Satana aleta pano calo.—Belengeni 1 Yohane 3:8.
Lesa akapeela Yesu amaka yakonaula Satana. (Abena Roma 16:20) Lyena, Lesa e ukalateka abantunse kabili pano calo pakaba umutende ne nsansa nga filya fine alefwaya abantu ukulaikala ilyo abapangile.—Belengeni Ukusokolola 21:3-5.