Ukumwenamo mu Malyashi ya Cintubwingi Ayapitulukwamo

¹ Ilyashi lya muno nshiku ilya Nte sha kwa Yehova lyalilondololwa mu kulungikwa mu mashiwi ya pa Amapinda 4:18 ayatila: “Inshila ya balungami yaba ngo lubuuto ulwabalika, ululeya no kubuuta kasuka akasuba kasaama.”

² Mu kumfwana ne ci, icilonganino ca Bwina Kristu citwalilila ukupokelela ifyebo fyalengamikwa pa fisambilisho fya Baibolo kabili ifyalingana ne nshita. (Mat. 24:45-47) Mu kupalishako kuti walumbululako ifya kumwenako ukukuma kuli ici ifyo wamona ukutula apo watendekele ukubishanya ne Nte sha kwa Yehova. Ukulongana kwa cilonganino, ukusanshako amalyashi ya cintubwingi, kulatwaafwa ukwendela pamo no lubuuto lwa cine ululeingilishiwako.

³ Amaautulaini Yapitulukwamo: Pali nomba line, Sosaite naipituluka mu maautulaini ya malyashi ya cintubwingi ayengi. Ifyebo fipya fyalilundwamo muli yene, kabili ifishinka fyacindama fyalilondololwa mu kumfwika. Nga ca kuti icilonganino cili no kumwenamo mu kukumanina muli ifi fyebo fyapitulukwamo, bamunyina bapeela amalyashi ya cintubwingi balingile ukubomfya fye amaautulaini ya nomba line nga nshi.

⁴ Pa kuti winganonkelamo sana mu malyashi ya cintubwingi, tontonkanya pa lwa mitwe ya malyashi yali no kupeelwa. Ilyo taulaya ku Ukulongana kwa Cintubwingi, esha ukwibukisha ifyebo fya nomba line ukufuma ku fya kuloshako fya teokrasi pali uyo mutwe we lyashi. Lyene, ilintu ulekutika, enekela ifi fishinka ukulandwapo. Peela ukusakamana ku nshila shipya ishili shonse isha kupeelelamo ici cine ku nshita ya ku ntanshi. Ici cikakulenga ukumwenamo nga nshi mu malyashi ya cintubwingi ayapitulukwamo.

⁵ Amalyashi ya Cintubwingi Yalingile Ukufunda E lyo no Kukunta Bakakutika: Lintu Yesu alelanda, alefika pa mitima ya bakakutika bakwe. Pa kusondwelela kwa Lyashi lya pa Lupili ilya kwa Yesu, ilyashi lya pa cintubwingi ilyalumbukisha ilyabala alipeelwapo, nga fintu Mateo 7:28 acita lipoti ukuti: “Amabumba yapapile imisambilishishe yakwe.”

⁶ Ukusunga ica kumwenako ca kwa Yesu mu muntontonkanya, amabumba ya baeluda balingile ukubomfya ukushilimuka pa kusuminisha bakalanda bapya aba pa cintubwingi, ukupeela bamunyina fye beka ababa ni bakasambilisha basuma, abali no kukakatila mu kupalamisha kuli autulaini wa Sosaite, kabili abengasungilila ukusakamana kwe bumba. Bamunyina abapeelwa ishuko lya kupeela amalyashi ya cintubwingi balingile ukutwalilila ukutukuta ukuwamya ukulamuka kwabo ukwa kulanda, ukupokelela ukufunda ukuli konse ne mitubululo ifipeelwa na baeluda.

⁷ Nga fintu casobelwe pali Esaya 65:13, 14, ulubanda lwa ku mupashi ulwa bantu ba kwa Lesa lutwalilila ukumonekesha. Imitantikile ya malyashi ya cintubwingi yaba ni imo iya nshile shingi isho ‘tusambilishiwamo kuli Yehova.’—Esa. 54:13.