Trakiti Waibela uwa Imbila ya Bufumu ku Bantu Bonse

¹ Ukutendeka April 24, twatampile ukwananya ku cintubwingi trakiti wa Imbila ya Bufumu uyo wabimbula ubuseko bwa bantu bayangwako mpaanga yonse! Ubukombe bwa iko tabuli fye ubwa pa nshita yalinga lelo na kabili buli ubwe pamfya. Bakasabankanya mu cilonganino icili conse nabalangisha ukwafwilisha kwa mutima onse, ukufwayo kufisha ubu bukombe ku makana ya bantu. Bushe iwe uletinamina ukwakanamo kwakumanina?

² Icipo ca trakiti wa Imbila ya Bufumu calituminwe ku cilonganino cimo na cimo, ukupayanishisha mupepi na 30 kuli kasabankanya umo umo na 100 kuli painiya umo umo. Ni yanga washalike? Nga ca kuti tawacita ukulingana na fintu walesubila, bushe walilangulukapo inshila sha kucitilamo ifyafula pa ntanshi ukwananya takulapwa pa May 14? Ni shani pa lwa kulembeshako nga painiya wa kwafwilisha? Bushe kuti washukila ukulasangwa ku kukumana kwa mulimo ukwalundwako mu kati ka mulungu, pamo nga uko ukwa bunte bwa mu cungulo?

³ Baeluda mu kusakamanisha bakalapituluka mu kumona ukufimbwa kwa cifulo ca kubombelamo. Nga ca kuti tacakacitike ku cilonganino capeelwa icifulo ukubombela mu mbali shimo, baeluda balingile ukumfwana ne filonganino fya mu bwina mupalamano ku kulombo kwaafwa kwabo. Nga twabombesha no mutima onse, pamo pene no kubombela pamo nge filonganino, kuti twapwishishisha uyu mulimo.

⁴ Mu kupalishako kuti pambi walikumanya ubuseko bwalundwako muli uyu mulimo pa mulandu wa kuti abengi bali na maka ya kwakanamo, ukusanshako bakasabankanya bapya na bacaice. Tulesubila mukatwalilila no yu mupashi wa buseko umo wine, ukukoselesha bonse ukubwelelamo ku kutandalila abayankwileko bwino. Twacincishiwe ukusunga icalembwa cisuma ica ku ŋanda ne ŋanda, ukulemba abo balangishe ubuseko. Ulubali lwa kulekelesha ulwa May kuti lwaba ni nshita isuma iya kupeelo kusakamana ku kucite fipempu fya kubwelelamo mu kuba no buyo bwa kutendeka amasambililo ayapya.

⁵ Cinshi cintu twingasosa lintu twabwelelako? Kuti pambi wacisanga ica kufumamo cimo ukusoso kuti: “Nakalimo muleibukisha ifyebo namushilile pali nomba line; ndesubila mwalikwete ishuko lya kubelenga fyene no kutontonkanyapo. Ubukombe bwalimo bwaliletako ukulanshanya ukwingi mu bwikashi bwesu, apantu bulelanda pa milandu yakatama iyo umutundu wa muntu onse ulolenkene na yo.” Loshako ku mashiwi yamo aya kubimbule tontonkanyo pe bula lyalenga bubili, lyene ipusho kuti: “Cinshi muletontonkanya cintu tulingile ukucita pa kushininkisho kuti twaipekanishisha ku cintu inshita ya ku ntanshi ikaleta?” Leka asuke. Nga ca kuti ubuseko bwalangwa, lanshanyeni ifishinka fimbi pa mabula 2-4 aya trakiti wa Imbila ya Bufumu, kabili tambika isambililo lya Baibolo nelyo ukulembesha kwa Ulupungu lwa kwa Kalinda.

⁶ Nga ca kuti ulebombela mu cifulo ca cilonganino cimbi, shininkisho kutwala amashina ya bali bonse abalesekelela abo wasanga pa kuti ifipempu fya kubwelelamo fingacitwa kuli bakasabankanya ba ico cilonganino. Mu kupalako, nga ca kuti wapeelwa ifipempu ifya kuti uyeko, shininkisho kuti wabwelelako mu kwangufyanya.

⁷ Ukwananya kwaibela ukwa uyu trakiti wa Imbila ya Bufumu kwaliletako ukucincimuka kabili kwalikunta ifwe bonse ukuluminisha ukubombesha kwesu mu mulimo wa kushimikilo Bufumu. Kuti twaba abacetekelo kuti ukutunguluka kukaba ukukalamba, ukulenga abantu ukuli konse ukwingilishako ukwishiba kwabo pa lwe shina likalamba ilya kwa Yehova ne mifwaile. (Esa. 12:4, 5) Nga twacite fyafulilako, e lyo no buseko bukakulilako.—Ilu. 126:3.