Amashiwi ya Kuti Inshiku sha Kulekelesha Yalola Mwi?

NGA mwamona icishibilo pe windo lye tuuka apo balembele ukuti: “Inshiku sha kulekelesha,” kwena kuti mwaishiba umulolele aya mashiwi. Kuti yalola mu kuti balaleka ukushitisha ifintu ifyanaka umutengo ifyo balebilisha ukuti abantu bese bashiteko, e lyo limbi kuti yalola mu kuti, ituuka lili mupepi no kwisalwa. Lelo ni shani nga ca kuti umo alanda ukuti, “Tuli mu nshiku sha kulekelesha”? Bushe ninshi calola mwi?

Insoselo sha kuti “inshiku sha kulekelesha” e lyo na “inshita sha mpela,” kaale sana shatampa ukulandwapo. (2 Timote 3:1; Daniele 12:4) Imyaka ukucila pali 2,500 iyapitapo, kasesema Daniele alimwene icimonwa ca fyalo fyakwatisha amaka ne fyo ifi fyalo fyali no kulalwishanya mpaka fye na mu “nshita ya ku mpela.” Bamwebele ukuti ifi ifimonwa fyali no kwishibikwa bwino mu nshita ya ku mpela. (Daniele 8:17, 19; 11:35, 40; 12:9) Daniele na kabili alembele ukuti: “Mu nshiku sha shamfumu ishi Lesa wa mu muulu akemyo bufumu ubushakonaulwe umuyayaya, no bufumu bwa buko tabwakashiilwe ku bantu bambi; bukashonaula no kupesha aya mabufumu yonse, kabili bukeminina umuyayaya.”—Daniele 2:44.

Yesu Kristu alilandilepo pa “mpela” ilyo aleasuka icipusho pa lwa ‘cishibilo ca kubapo kwakwe ne ca mpela ya bwikashi.’ (Mateo 24:3-42) Cimoneka ukuti bonse babili Daniele na Yesu balelanda pa cintu cimo icikalamba, ne co cintu, kwaluka kwa fintu ukukalamba ukwali no kukuma abantu pali ilya nshita e lyo na bantu ba muno nshiku mwine. Daniele alilembele ukuti amakamfulumende ya pa calo yonse yali no kupwa, e lyo Yesu na o alandile pa “mpela ya bwikashi.”

Bushe mulingile ukubikako amano ku kufwaya ukwishiba umwalola inshiku sha kulekelesha? Ee, mulingile ukubikako amano. Abantu bonse fye balingile ukubikako amano, pantu ili lyashi lyalibakuma. Lelo nangu cibe fyo, bambi tababikako amano. Baibolo yasobele ukuti: “Mu nshiku sha kulekelesha kukaba bakapumya no kupumya kwabo, abenda umwabela ifya lunkumbwa fyabo fine no kusosa abati: ‘Kuli kwi ukubapo kwakwe ukwalaiwa? Pantu, ukufuma pa bushiku ifikolwe fyesu fyaponene mu tulo twa mfwa, ifintu fyonse filetwalilila filya fine fye fyali ukufuma pa kutendeka kwa bubumbo.’” (2 Petro 3:3, 4) Abantu bamo shino nshiku batila, ili lyashi lya mutatakuya fye, e lyo kabili batila abantu pa calo bakatwalilila fye ifi fine, bakulati fye aba bafumapo paisa bambi.

Bushe kwaliba ubushininkisho bwa kuti cine cine tuli mu nshiku isho Baibolo iita ukuti inshiku sha kulekelesha? Lekeni tumone mu cipande calakonkapo.