Abrahamu Aali Cibusa Wa Kwa Lesa

ICIFULO cimo uko abantu baile mu kwikala ilyo Ilyeshi lyapwile caleitwa ati, Uri. Caishileba umusumba uwacindama umwali amayanda ayasuma. Lelo abaikele mulya balepepa tulesa twa bufi. E fyo balecita na lintu baleikala ku Babele. Abantu ba mu Uri na mu Babele tabali nga Noa no mwana wakwe Shemu, abalebombela Yehova lyonse.

Ilyo papitile imyaka 350 apo ilyeshi lyabeleleko, Noa, kapepa wa kwa Lesa alifwile. Pa numa ya myaka ibili, uyu mwaume ulemona pa cikope alifyelwe. Lesa alimutemenwe sana. Ishina lyakwe ali ni Abrahamu. Aleikala mu musumba wa Uri no lupwa lwakwe.

Bushiku bumo Yehova aebele Abrahamu ukuti: ‘Fuma mu Uri na muli balupwa lobe no kuya ku calo ico nkakulanga.’ Bushe Abrahamu alikonkele ifyo Lesa amwebele no kusha ifintu fyonse ifisuma mu Uri? Ee. Na kuba icalengele Abrahamu aleitwa ati cibusa wa kwa Lesa, ni co aleumfwila Lesa lyonse.

Ilyo Abrahamu no mukashi wakwe Sara baile ku Uri, kwali na balupwa lwa kwa Abrahamu abaile nabo. Tera, wishi wa kwa Abrahamu e lyo na Lote, umwana wa kwa munyina balikonkele. Bonse basukile bafika pa cifulo caleitwa ati Harani, apo Tera afwilile. Bali ukutali sana no musumba wa Uri.

Pa numa, Abrahamu no lupwa lwakwe bafumine mu Harani no kuya ku calo ca Kanaani. Ilyo bali kulya, Yehova amwebele ati: ‘Ici e calo nkapeela ku bana bobe.’ Abrahamu aikele mu Kanaani, mu matenti.

Lesa alipaalile Abrahamu kabili Abrahamu aishilekwata impaanga ishingi ne nama shimbi e lyo na babomfi abengi nga nshi. Lelo Abrahamu na Sara tabakwete abana.

Ilyo Abrahamu ali ne myaka 99, Yehova amwebele ati: ‘Ndekulaya ukuti ukaba wishi wa nko ishingi.’ Bushe ici cali no kucitika shani apo Abrahamu na Sara bali abakalamba sana ica kuti te kuti bakwate umwana?