Yakobo Aya Ku Harani

BUSHE aba baume Yakobo alelanda nabo naubeshiba? Pa numa ya kwenda inshiku ishingi, Yakobo abasangile pa cishima balecema impaanga. Abepwishe ati: ‘Mufumine kwi?’

Ba-aswike ati, ‘Tufumine ku Harani.’

Lyena Yakobo aipwishe ati, ‘Bushe mwalimwishiba Labani?’

Batile, ‘Twalimwishiba, na kuba umwana wakwe Rakele, uyo aleisa ne mpaanga sha kwa wishi.’ Bushe naumumona Rakele pa cikope?

Ilyo Yakobo amwene Rakele aleisa ne mpaanga, akunkulwishe icilibwe ukufuma pa cishima pa kuti impaanga sha kwa Labani nalume shinwe ameshi. Lyena, Yakobo atomwene Rakele no kuilondolola. Rakele alitemenwe sana kabili aile ku ng’anda no kuyaeba wishi Labani.

Labani alitemenwe sana ukuti Yakobo aisa mu kwikala nankwe. Ilyo Yakobo amwebele ukuti alefwaya ukuupa Rakele, Labani alitemenwe sana. Lelo aebele Yakobo ukuti pa kuupa Rakele afwile ukumubombela mwi bala pa myaka 7. Apo Yakobo alitemenwe sana Rakele, alibombeele Labani imyaka 7. Bushe nawishiba icacitike ilyo inshita ya kuti bopane yafikile?

Mu nshita ya kumupeela Rakele, Labani amupeele Leya uwali umukalamba ukuti e o abe umukashi wakwe. Ilyo Yakobo abombele imyaka na imbi 7, e lyo Labani amupeele na Rakele ukuti abe umukashi wakwe. Pali ilya nshita, Lesa alisuminishe abaume ukuupa impali. Lelo nga fintu Baibolo ilanda, pali nomba umwaume afwile ukuupa fye umwanakashi umo.