Yosefe Bamupata Kuli Bamunyina

MONA ifyo umwaice pa cikope alemoneka uwa bulanda kabili uwapelelwa. Uyu umwaice ni Yosefe. Bamunyina e lyo bamushitisha fye ku baume ulemona pa cikope abali pa lwendo lwa kuya ku Egupti uko aileba umusha. Cinshi calengele bamunyina ukumushitisha? Balimupatile pantu wishi alimutemenwe sana.

Shibo alimubilile ilaya ilitali kabili ilisuma. Ilyo bamunyina 10 bamwene ifyo Yakobo atemenwe Yosefe, batendeke ukumfwa ububi kabili balimupatile. Lelo kwali na cimbi icalengele ukuti bamupate.

Yosefe alilotele ifiloto fibili. Mu filoto fyakwe fyonse, bamunyina balemukontamina. Ilyo Yosefe aebele bamunyina ifyo alotele, bamunyina balimupatile sana.

Bushiku bumo ilyo bamunyina Yosefe baile mu kucema impaanga sha kwa shibo, Yakobo atumine Yosefe ukuyamona ifyo bali. Ilyo bamumwene aleisa, bamo pali bamunyina batile: ‘Natumwipaye!’ Lelo Rubene, umukalamba pali bonse atile: ‘Twicita ifyo!’ E ico baikete Yosefe no kumupoosa mu cilindi. Lyena baikele panshi no kutendeka ukulanshanya ifyo bali no kumucita.

Ilyo bali bacili na bekala, bamwene abena Ishmaele balepita. Yuda atile kuli bamunyina: ‘Natumushitishe ku bena Ishmaele.’ E ico, balimushitishe pa sha silfere 20. Ifyo bacitile fyalibipile sana kabili fyalangile fye ukuti balipatile sana munyinabo!

Finshi bamunyina Yosefe baali no kweba shibo? Baipeye imbushi no kubuula ilaya lya kwa Yosefe ilisuma no kushingako umulopa uwingi. Pa numa basendele ilaya no kutwalila shibo, Yakobo no kumweba ati: ‘Twacisanga ili ilaya. Lolekesheni no kumona nga lilaya lya kwa Yosefe.’

Ilyo Yakobo amwene ilaya alilishibe. Atile, ‘Iciswango ca mu mpanga cifwile nacipaya Yosefe.’ Ifi fine e fyo bamunyina Yosefe balefwaya ukuti cibe. Balefwaya shibo amone kwati Yosefe nabamwipaya ku cinama. Yakobo ali no bulanda sana kabili aliloseshe inshiku ishingi. Lelo Yosefe tafwile. Natumone ifyamucitikile uko bamutwele.