Umwaice Uwa-afwile Umwaume Wa Maka

BUSHE nawishiba ifyo aka kakashana kalelanda? Uyu umwaice ale-eba umwanakashi pali Elisha, kasesema wa kwa Yehova na pa fisuma ifingi ifyo Yehova aleafwa uyu kasesema ukucita. Uyu umwanakashi taishiba Yehova pantu te mwina Israele. Natumone kanshi icalengele uyu umwaice ukuba mu ng’anda ya uyu umwanakashi.

Uyu umwanakashi mwina Asiria. Umulume wakwe ni Naamani, umukalamba wa bashilika ba bena Asiria. Abena Asiria baikete uyu umwaice no kumutwala ku mukashi wa kwa Naamani pa kuti alemubombela.

Naamani alilwele ifibashi. Ubu ubulwele bubi sana. Bulalenga umubili ukuliwa. Uyu umwaice pa cikope ale-eba muka Naamani ati: ‘Shikulu nga aya ku Israele kuli kasesema wa kwa Yehova, kuti cawama pantu kuti amuposha ifibashi.’ Uyu umwanakashi aile-eba umulume wakwe ifyo umwaice alandile.

Naamani alefwaisha sana ukupola, e ico aliile ku Israele. Ilyo afikile, aile ku ng’anda ya kwa Elisha. Elisha aebele umubomfi wakwe ukweba Naamani ukuyasamba mu Mumana wa Yordani imiku 7. Naamani alifulilwe ilyo aumfwile ifi. Atile: ‘Imimana yaba ku mwesu isuma sana ukucila imimana iyaba mu Israele!’ Pa numa ya kulanda ifi, Naamani alifuminepo.

Lelo umo pa babomfi bakwe amwebele ati: ‘Shikulu, Elisha nga acimweba ukucita icintu icikalamba nga tamwacikaana. Nomba cinshi mwakaanina ukusamba?’ Naamani alyumfwile ifyo umubomfi wakwe alandile kabili aliile no kwibila mu mu Mumana wa Yordani imiku 7. Ilyo apwishishe ukusamba, inkanda yakwe yalipolele no kuba iisuma!

Naamani alitemenwe sana. Abwelele kuli Elisha no kumweba ati: ‘Nomba naishiba ukuti Lesa wa bena Israele, e Lesa wa cine eka pano calo ponse. Kanshi poka ubupe ubu nakupeela.’ Lelo Elisha ayaswike ati: ‘Awe nshapoke ubu ubupe.’ Elisha alishibe ukuti tacali bwino ukupoka ubupe pantu ni Yehova waposeshe Naamani. Lelo Gehasi, umubomfi wa kwa Elisha alefwaya ukusenda ubupe.

Mona ifyo acitile. Ilyo Naamani aile, Gehasi alimukonkele ulubilo. Ilyo amusangile amwebele ati: ‘Elisha antuma ati umupeeleko ifya bupe fimo pa kuti apeele abeshile mu kutandala.’ Ubu bwali bufi. Lelo Naamani taishibe ukuti Gehasi alebepa fye, e ico alimupeelepo ifipe fimo.

Ilyo Gehasi abwelelemo, Elisha alishibe ifyo acitile pantu Yehova alilengele aishiba. Elisha aebele Gehasi ati: ‘Apo wacita icintu icabipa, ifibashi Naamani alwele fyalaisa pali iwe.’ Kabili apo pene fye, Naamani alilwele ifibashi!

Finshi twingasambilila kuli ili lyashi? Ica kubalilapo, tufwile ukulalanda pali Yehova nga fintu kalya akakashana kacitile. Nga tulelanda pali Yehova, tukala-afwa abantu. Cimbi ico twasambililako ca kuti, tatufwile ukuba ne cilumba nga filya Naamani ali pa kubala, lelo tulingile ukumfwila ababomfi ba kwa Lesa. E lyo tatufwile ukulabepa nga Gehasi. Bushe wamona ukuti fingi twingasambilila nga tulebelenga Baibolo?