Yona Ne Cisabi

MONA uyu mwaume uuli mu menshi. Ali mu bwafya ubukulu bushe te ifyo? Ici icisabi cilefwaya ukumumina! Bushe naumwishiba uyu umwaume? Ni Yona. Natulande pa calengele ukuti abe mu bwafya.

Yona ali ni kasesema wa kwa Yehova. Ilyo fye Elisha afwile, Yehova aebele Yona ati: ‘Kabiye ku musumba wa Ninibe. Abantu nabacilamo ukucita ifyabipa, e ico ndefwaya uyebasoka.’

Lelo Yona talefwaya ukuya. E ico aninine ubwato ubwaleya kumbi. Yehova tatemenwe ifyo Yona acitile. E ico alengele kwaba umwela uukalamba sana. Umwela walikulile sana ica kuti no bwato balimo bwatendeke ukwibila. Abali mu bwato balyumfwile umwenso sana, kabili bapepele kuli tulesa twabo ukuti tubafwe.

Lyena Yona abebele ati: ‘Ine mpepa Yehova, Lesa uwapangile umulu ne calo. Mbutwike fye pantu nshilefwaya ukucita ico Yehova anjebele.’ Lyena abo ali nabo mu bwato bamwipwishe ati: ‘Cinshi twalacita kuli iwe pa kuti icipuupu ca mwela cileke?’

Yona abebele ati: ‘Mpooseni pa mumana e lyo icipuupu ca mwela calaleka.’ Abaali mu bwato tabalefwaya ukucita ifyo, lelo ilyo icipuupu ca mwela cakulileko, balimupoosele pa mumana. Apo pene fye icimwela na mabimbi fyalilekele.

Ilyo fye Yona aibiile mu menshi, icisabi calimuminine. Lelo tafwile. Ali mu mala ya cisabi, inshiku shitatu, akasuba no ubushiku. Yona alyumfwile ububi pa kukanaumfwila Yehova pantu taile ku Ninibe. Bushe nawishiba ico acitile?

Yona apepele kuli Yehova ukuti amwafwe. E ico Yehova alengele icisabi ukumulukila pa mushili. Pa numa Yona aile ku Ninibe. Bushe ici taciletusambilisha ukuti calicindama ukucita fyonse ifyo Yehova atweba ukucita?