Icipandwa 44

Ukusokolola na Iwe

 1. (a) Kwebekesha nshi kwabwekeshiwapo uko malaika apeela Yohane ukulosha ku malayo ya kupapusha yonse ya mu Ukusokolola? (b) Ni ani uyu asosa ati, “ndeisa bwangu,” kabili ni lilali uku ‘kwisa kubako’?

PA KUBELENGA ubulondoloshi bwabamo kucankwa ubwa Yerusalemu Mupya, limbi kuti waseshiwa ku kwipusha auti: ‘Bushe icintu cimo ica kupapusha kwa musango yo kuti caisa mu kubako mu cituntulu?’ Yohane ayasuka ubo bwipusho pa kushimika amashiwi ya kwa malaika ayakonkapo ati: “E lyo malaika atile kuli ine, Ifyebo ifi fya cishinka kabili fya cine; kabili [Yehova Lesa wa numbwilo shapuutwamo isha, “NW”] bakasesema natuma malaika wakwe ku kulanga abasha bakwe ifili no kupona bwangu. Kabili, mona, ndeisa bwangu; [wa nsansa, “NW”] uubake fyebo fya kusesema kwa mwi [buku] ili.” (Ukusokolola 22:6, 7) Amalayo ya kusungusha yonse aya Ukusokolola yakafikilishiwa mu cituntulu! Ukulandila mwi shina lya kwa Yesu, malaika abilishe ukuti Yesu aleisa mu kwangufyanya, “bwangu.” Ici cilingile ukuba ukwisa kwa kwa Yesu “ngo mupupu” ku konaula abalwani ba kwa Yehova no kuletamo akalume kawamisha aka nsansa aka Ukusokolola. (Ukusokolola 16:15, 16) Tufwile, kanshi, ukulinganya imyeo yesu ku mashiwi ye “[buku] ili,” Ukusokolola, pa kubilishiwa aba nsansa pali ilya nshita.

 2. (a) Ni shani Yohane ankula ku kufumba kwa kusokolola, kabili cinshi malaika amweba? (b) Cinshi tusambilila ukufuma ku mashiwi ya kwa malaika aya kuti, “Awe ico te co” na ya, “Pepa Lesa”?

² Pa numa ya kufumba kwa musango yo ukwa ukusokolola, cili icaumfwiko kuti Yohane ayumfwile uwapeshiwa amano ati: “Ni ne Yohane ne wamwene no kuumfwa ifi fyonse; kabili ilyo naumfwile no kuumfwa nawile ku kupepa ku makasa ya kwa malaika uwalelanga ifi fyonse kuli ine. Lelo atile kuli ine, Awe ico te co. Ine ndi musha mubiyo, kabili umunabo wa bamunonko bakasesema kabili wa babake fyebo fya mwi [buku] ili. Pepa Lesa.” (Ukusokolola 22:8, 9; linganyako Ukusokolola 19:10.) Uku kusoka kwalumbulwa libili ukwa kukanapepa bamalaika kwali ukwalingana ne nshita mu kasuba ka kwa Yohane, lintu bamo mu kushininkisha basupile ukupepa kwa musango yo nelyo batungile ukusokolwelwa kwaibela ukufuma kuli bamalaika. (1 Abena Korinti 13:1; Abena Galatia 1:8; Abena Kolose 2:18) Ilelo, cisanikila icishinka ca kuti tulingile ukupepa Lesa eka fye. (Mateo 4:10) Tatufwile kubosha ukupepa kwasanguluka no kupepa uuli onse nelyo icili conse cimbi.—Esaya 42:5, 8.

3, 4. Cinshi malaika atwalilila ukweba Yohane, kabili ni shani abashalapo basubwa baumfwila amashiwi yakwe?

³ Yohane atwalililo kuti: “E lyo atile kuli ine, Wikakatika fyebo fya kusesema kwa mwi [buku] ili, pantu inshita ili mupepi: Umuulungani, leka olungane na nomba; no musali, leka abe uwa busali na nomba; no mulungami, leka abe uucito bulungami na nomba; no wa mushilo, leka abe uwa mushilo na nomba.”—Ukusokolola 22:10, 11.

⁴ Abashalapo basubwa ilelo balyumfwila amashiwi ya kwa malaika. Tabakakatika mashiwi ya busesemo. Pamo nge fyo, uwabalilepo ukufuma uwa Zion’s Watch Tower and Herald of Christ’s Presence (July 1879) acitile ukulandapo pa fikomo fyafula ifya Ukusokolola. Nga fintu twamwene mu cipandwa cesu cakwiswila, Watch Tower Society pa myaka iingi yalisabankanya ifitabo fimbi ifya kusanikila pa Ukusokolola. Nomba na kabili tuleleto kusakamana kwa batemwa icine bonse ku masesemo ya maka aya Ukusokolola no kufikilishiwa kwa yako.

 5. (a) Ni shani nga bantu balefwayo kusuulako ukusoka no kufunda kwa mu Ukusokolola? (b) Cinshi cifwile ukuba ukwankulako kwa bafuuka na balungama?

⁵ Nga ca kuti abantu balefwayo kusuulo kusoka no kufunda kupeelwa mu Ukusokolola, cisuma, nabacite ifyo! “Umuulungani, leka olungane na nomba.” Nga ca kuti cili kusoobolapo kwabo, abo baifumfunya mu fiko fya ino nkulo ya mulekelesha kuti bafwila muli ifyo fiko. Mu kwipipa, amapingushi ya kwa Yehova yakaputunkanishiwa ukufika ku kupwililila, ukutampila pa konaulwa kwa Babiloni Mukalamba. Lekeni abantu bafuuka bampamfiwe ukumfwila amashiwi ya busesemo ayatila: “Fwayeni Yehova . . . Fwayeni ubulungami, fwayeni ubufuuke; napamo kuti mwabelama mu bushiku bwa bukali bwa kwa Yehova.” (Sefania 2:3) Ukukuma kuli abo kale kale baipeela kuli Yehova, “no mulungami, leka abe uucito bulungami na nomba; no wa mushilo, leka abe uwa mushilo na nomba.” Aba mano balishibo kuti takwaba kumwenamo kwa kashita kanono ukufuma ku lubembu ukwingalinganishiwa ku mapaalo yabelelela ayakapakishiwa kuli abo basupila ubulungami no mushilo. Baibolo itila: “Muyeshe mwe bene, mumone nga muli mu kutetekela; muilinge mwe bene.” (2 Abena Korinti 13:5) Ukushimpwa pa nshila usoobolapo no kwikala nayo, ukapokelela icilambu cobe.—Ilumbo 19:9-11; 58:10, 11.

 6. Cinshi Yehova asosa lintu alanda kuli ba kabelenga ba Ukusokolola umuku wa kupelekeshako mu busesemo?

⁶ Yehova, Imfumu ya ciyayaya, nomba alanda kuli bakabelenga ba Ukusokolola umuntu wa kulekeleshako mu busesemo, ukusoso kuti: “Mona, ndeisa bwangu, ne cilambu ndi na co, ica kulambulo muntu onse umwabele milimo yakwe. Ni ne Alifa kabili Omega, Uwa ntanshi kabili Uwa kulekelesha, icitendekelo kabili impela. [Ba nsansa, “NW”] abasamba amalaya yabo, ukuti basuminishiwe ku [miti ya, “NW”] Mweo, na ku kwingila pa mpongolo mu Musumba. Ku nse kwabe mbwa ne ndoshi, na ba bulalelale, na ba misoka, na bapepo tulubi, na onse uwatemwo bufi no kubucita.”—Ukusokolola 22:12-15.

 7. (a) Ni kuli cinshi uko Yehova ‘aleisa bwangu’? (b) Mulandu nshi bashibutotelo ba Kristendomu bashakakwatile kwakanamo muli Yerusalemu Mupya?

⁷ Kabili, Yehova Lesa akomaila pali bumulopwe bwakwe ubwa ciyayaya ne cishinka ca kuti fintu apekenye intanshi mu kupelako akafipwilikisha. ‘Aleisa bwangu’ ku kuputunkanya ubupingushi kabili akalambula abo bamufwaya mu kupamfiwa. (AbaHebere 11:6) Ifipimo fyakwe e fipingula uuli no kulambulwa no uuli no kukaanwa. Bashibutotelo ba Kristendomu babomba ukupala “imbwa shicibulu,” ukukanayangwa ku bubi buntu Yehova pano alondolola. (Esaya 56:10-12; mona kabili Amalango 23:18, utulembo twa pe samba, twa New World Translation Reference Bible.) Mu kushininkisha, ‘balitemwa no kutwalilile’ fifundisho fya bufi ne fisambilisho fyapampamikwa kabili basuula umupwilapo ukufunda kwa kwa Yesu ukwa ku filonganino cinelubali. E co, tabakwata kwakanamo muli Yerusalemu Mupya.

 8. (a) Ni bani beka fye abaya “ku [miti ya, NW] Mweo,” kabili cinshi ici cipilibula? (b) Ni shani ibumba likalamba “basamba amalaya yabo,” kabili ni shani fintu babaka ukwiminina kwasanguluka?

⁸ Ni beka fye abo Bena Kristu basubwa “abasamba amalaya yabo” mu kuti babe abasanguluka mu menso ya kwa Yehova e bakwate shuko ukulya “ku [miti ya, NW] Mweo.” Uko e kuti, bapokelela insambu no kwebelwa kwa ku mweo wa bumunshifwa mu cifulo cabo ca ku mulu. (Linganyako Ukutendeka 3:22-24; Ukusokolola 2:7; 3:4, 5.) Pa numa ya mfwa yabo nga bantunse, banonka ukwingila muli Yerusalemu Mupya ukupitila mu kubuushiwa. Bamalaika 12 babasuminisha ukwingila, lintu balesungila ku nse bonse ababelesho bufi no kukanasanguluka nangu bengaitunga ukukwate subilo lya ku mulu. Ibumba likalamba pe sonde nalyo lyasamba “amalaya yabo no kuyabuutusha mu mulopa wa Mwana wa mpaanga” kabili bakabila ukubakilila ukwiminina kwabo kwasanguluka. Ici kuti bacita pa kusengauka ububi ubo Yehova asokako pano, pamo pene na pa kusakamanisha ukukonkomesha kwa kwa Yesu mu bukombe bwakwe cinelubali ku filonganino.—Ukusokolola 7:14; ifipandwa 2 na 3.

 9. Mashiwi nshi Yesu alanda, kabili ni kuli bani ubukombe bwakwe no bukulu bwa Ukusokolola fyalungikwa ukucilisha?

⁹ Pa numa ya kwa Yehova, Yesu alanda. Alungika amashiwi yakwe aya kukoselesha ku ba mitima yalungama ababelenga Ukusokolola, ukusoso kuti: “Ine Yesu ntumine malaika wandi no bunte ubu kuli imwe ubwa kufisha ku [filonganino, “NW”]. Ine ndi Mushila kabili Ubufyashi bwa kwa Davidi, Ulutanda ulubalika ulwa lucelo.” (Ukusokolola 22:16) Ee, aya mashiwi mu kutendekelako ya “ku [filonganino, NW].” Ubu buli bukombe, intanshi ya fyonse, bwa cilonganino ca Bena Kristu basubwa pe sonde. Icili conse mu Ukusokolola calungikwa mu kutendekelako ku Bena Kristu basubwa, abakapyana Yerusalemu Mupya. Ukupitila muli cilya cilonganino, ibumba likalamba nalyo lyakwate shuko lya kumfwikisha ici cine ca busesemo icaumo mutengo.—Yohane 17:18-21.

10. Mulandu nshi Yesu aitilwa (a) “Umushila kabili Ubufyashi bwa kwa Davidi”? (b) “ulutanda ulubalika ulwa lucelo”?

¹⁰ Yesu Kristu asekeshiwe ukupeela Ukusokolola kuli Yohane kabili ukupitila muli wene ku cilonganino. Yesu ponse pabili e “Mushila kabili Ubufyashi bwa kwa Davidi.” Atuntwike ukufuma kuli Davidi ku mubili kabili muli fyo awaminwe ukube Mfumu ya Bufumu bwa kwa Yehova. Na kabili akaba “Wishi wa nshita pe” uwa kwa Davidi, na muli fyo “Umushila” wa kwa Davidi. (Esaya 9:6; 11:1, 10) Wene e Mfumu ibelelela, iishifwa mu mutande wa kwa Davidi, ukufikilisha icipingo ca kwa Yehova na Davidi, kabili “Ulutanda ulubalika ulwa lucelo” ulwasobelwe mu kasuba ka kwa Mose. (Impendwa 24:17; Ilumbo 89:34-37) Wene “lutanda lwa lucelo” ulo lubalika, ukulenga ubushiku ukuca. (2 Petro 1:19) Ukubeleleka konse ukwa mulwani mukalamba Babiloni Mukalamba takwali na maka ya kucilikila uku kubalika kwabamo ubukata.

Sosa Auti: “Iseni!”

11. Bwite nshi bwaisuka ubo Yohane nomba atambika, kabili ni bani limbi bengankulako?

¹¹ Nomba ni nshita ya kwa Yohane umwine ukulanda. Ukufuma ku mutima waisulamo ukutasha pali fyonse ifyo amwene no kuumfwa, apunda ati: “Umupashi na Nabwinga batila, Iseni: no uleumfwa asose, ati, Iseni: no uleumfwe cilaka ese, uulefwaya abuulepo ica bupe amenshi ya Mweo.” (Ukusokolola 22:17) Ukumwenamo kwa mwi lambo lya cilubula ilya kwa Yesu takwapeleshiwe fye kuli ba 144,000, pantu pano pali ubwite ubwaisuka. Umupashi wa kwa Yehova uutuninkisha ubomba ukupitila mwi bumba lya kwa nabwinga, ica kuti ubukombe butwalilila ukubilishiwa no kuumfwika konse ukuti: ‘Buulapo ica bupe amenshi ya mweo.’ (Mona kabili Esaya 55:1; 59:21.) Uuli onse uuleumfwa icilaka ca bulungami aleitwa “ese” no kupokelela ifyafula fya kwa Yehova. (Mateo 5:3, 6) Fintu baba abashuka bonse abenekelwa ukube bumba lya pe sonde abankula kuli ubu bwite bwe bumba lya buYohane ilyasubwa!

12. Ni shani ibumba likalamba lyankula ku bwite bwa pa Ukusokolola 22:17?

¹² Ukutula mu kubangilila kwa ba 1930, impendwa yalekula iye bumba likalamba ‘lilomfwa’—ukupelako ukusakamana ku bwite. Ukupala abasha banabo basubwa, balifika ku kwiminina kwasanguluka pa ntanshi ya kwa Yehova. Bafuluke nshita ilyo Yerusalemu Mupya akeka ukufuma ku mulu ukupisha amapaalo ku mutundu wa muntu. Pa kuba nabomfwa ubukombe bwa kubimbula ubwa Ukusokolola, ibumba likalamba talisosa fye ukuti “Iseni” lelo ukucila balonganika bambi ku kuteyanya kwa kwa Yehova, ukusambilisha abanabo ukubilisha abati: “No uulemfwe cilaka ese.” E co impendwa ye bumba likalamba iletwalilila ukukula, nge fyo ukucila pali 3,000,000 aba bene mu fyalo ukucila 200 ukushinguluke sonde balakana na be bumba lya nabwinga abacepa na pali 9,000 mu kutanununa ubwite bwa kubuulapo ‘ica bupe amenshi ya mweo.’

13. Kusoka nshi uko Yesu apeela?

¹³ Ukukonkapo, ni Yesu e walanda na kabili, ukusoso kuti: “Ndesoko muntu onse uuleumfwe fyebo fya kusesema kwe [buku] ili, ndeti, Ngo muntu alundapo pali ifyo, Lesa akalundapo pali wene [ifinkunka] ifyalembwa mwi [buku] ili; kabili ngo muntu afumyapo ifyebo fya mwi [buku] lya kusesema uku, Lesa akafumye cakaniko cakwe ica pa [miti ya, “NW”] Mweo, ne ca mu musumba wa mushilo, ifilembelwe mwi [buku] ili.”—Ukusokolola 22:18, 19.

14. Ni shani ibumba lya buYohane limona ‘ubusesemo’ bwa Ukusokolola?

¹⁴ Abo abe bumba lya buYohane balingile ukuleto kusakamana ku ‘busesemo’ bwa Ukusokolola. Tabalingile kubufisa nelyo ukulunda kuli bwene. Ubukombe bwa buko bulingile ukushimikilwa apabuuta, “pa mulu wa mitenge.” (Mateo 10:27) Ukusokolola kuntu kwapuutwamo kuli Lesa. Ni ani wingesha ukwalula ishiwi lya cintu Lesa umwine asosele no kupeela ukupitila muli umo uyo nomba ali Imfumu ileteka, Yesu Kristu? Mu kushininkisha, umuntu wa musango yo kuti awaminwo kulufya mu kufwailisha kwa mweo no kucula ifinkunka ifyo filingile ukwisa pali Babiloni Mukalamba na pa calo conse.

15. Bukulu nshi bwa mashiwi ya kwa Yesu aya kushimika “ifi fintu ubunte” na ya kuti “Ndeisa bwangu”?

¹⁵ Yesu nomba alundapo ishiwi lya kupelako ilya kukoselesha ati: “Uuleshimika ifi fintu ubunte atila, Cine cine ndeisa bwangu.” (Ukusokolola 22:20a) Yesu ni “inte ya cishinka kabili iya cine.” (Ukusokolola 3:14) Nga acitilo bunte ku fimonwa fya mu Ukusokolola, filingile ukuba ifya cine. Bonse babili wene na Yehova Lesa umwine mu kubwekeshabwekeshapo bebekesha icishinka ca kuti baleisa “bwangu,” nelyo mu kwangufyanya, Yesu pano ukusosa ico umuku walenga isano. (Ukusokolola 2:16; 3:11; 22:7, 12, 20) “Ukwisa” ni ku kucito bupingushi pali cilende mukalamba, pa “shamfumu” sha bupolitiki na bambi abakaanya “ubufumu . . . bwa kwa Shikulwifwe [Yehova] no bwa kwa Kristu wakwe.”—Ukusokolola 11:15; 16:14, 16; 17:1, 12-14.

16. Ukwishiba ukuti Yehova Lesa na Yesu baleisa bwangu, mibombele nshi yapingulwapo ufwile ukubuula?

¹⁶ Ukwishiba kobe kwa kuti Yehova Lesa na Yesu baleisa bwangu kulingile ukukukoselesha ukusunga “mu kupalamisha mu muntontonkanya ukubapo kwa bushiku bwa kwa Yehova.” (2 Petro 3:12, NW) Ukukolopana kumoneka ukuli konse ukwa micitile ya fintu fya calo ca kwa Satana kwa kukopeka. Ukutunguluka ukuli konse uko kumoneka ukwa kuti umulu wa bakateka ba calo pe samba lya kwa Satana limbi wigacita kwa mulupita. Ifi fintu filepita. (Ukusokolola 21:1) Ukubelelela kweka fye kuli no kusangwa muli Yehova, mu Bufumu bwakwe pe samba lya kwa Yesu Kristu, na mu calo cakwe cipya calaiwa. Wilufya cilola ca ico!—1 Yohane 2:15-17.

17. Ni shani ukutesekesha kobe ukwa bumushilo bwa kwa Yehova kwingakwambukila?

¹⁷ Shi, lyene, nausuminishe fintu usambilile ukufuma mwi sambililo lyobe ilya Ukusokolola ukusonga ubumi bobe mu kushika. Bushe ukulengela kobe mu kubapo kwa kwa Yehova ukwa mu mulu takwakwebekeshe ubukata bwabembela na bumushilo bwa kwa Kabumba wesu? (Ukusokolola 4:1–5:14) Ifyo cabe shuko ukubombela Lesa wa musango yo! Shi ukutesekesha kobe ukwa bumushilo bwakwe na kukuseseshe ku kubuula mu kukatama ukufunda kwa kwa Yesu ku filonganino cinelubali no kusengauka ifintu pamo nga ukutemwe fimoneka, ukupepe filubi, bucisenene, bucifulefule, ukupanga ifya kaniko fya busangu nelyo icili conse cimbi ico cingalenga umulimo obe ukukanapokelelwa kuli Yehova. (Ukusokolola 2:1–3:22) Amashiwi ya mutumwa Petro kwi bumba lya buYohane yalabomba mu cishinte na kwi bumba likalamba ayatila: “Filya uwamwitile abo washila, e fyo na imwe mube abashila mu mibele yenu yonse.”—1 Petro 1:15, 16.

18. Ni muli cinshi wingabuula ulubali lwakumanina apo wingapesha, kabili mulandu nshi uyu mulimo upamfishe ilelo?

¹⁸ Mu kulundapo, shi nauseshiwe ku kupimpa kwabuukululwa ilyo ulebilisho “mwaka wa luse lwa kwa Yehova, no bushiku bwa cilandushi ca kwa Lesa wesu.” (Esaya 35:4; 61:2) Nampo nga uli wa mukumi unono nelyo uwe bumba likalamba, shi naukwate ukwakanamo kwakumanina ukufika apo wingapesha mu kusabankanya ukupongololwa kwa nweno cinelubali sha cipyu ca kwa Yehova, ukweba ifya mapingushi ya kwa Lesa pa calo ca kwa Satana. Pa nshita imo ine, peelako ishiwi lyobe ku kubilisha kwabamo buseko ukwa mbila nsuma ya muyayaya iyakuma ku Bufumu bwa kwa Yehova ubwaimikwa na Kristu wakwe. (Ukusokolola 11:15; 14:6, 7) Ba kuli uyu mulimo mu kupamfiwa. Kabili shi ukumwensekesha kwa kuti tuli mu bushiku bwa kwa Shikulu nakuseshe abengi abo bashilati balebombela Yehova ukuilunda mu mulimo wa kubilisha imbila nsuma. Shi aba nabo bene nabalunduluke ukulola ku kupeele myeo yabo kuli Lesa mu kuba ne cilolwa ca lubatisho. Ibukisha, “inshita yasontwa ili mupepi”!—Ukusokolola 1:3, NW.

19. Mashiwi nshi ya kwisalila aya mutumwa mukoloci Yohane, kabili ni shani wankula kuli yene?

¹⁹ Muli fyo, pamo na Yohane, mu kukaba tulepepa atuti: “Amene: iseni, mwe Shikulu Yesu.” Kabili Yohane, umutumwa wa cikoloci, alundapo ati: “Ukusenamina kwa kwa Shikulu Yesu Kristu kube na [ba mushilo, “NW”].” (Ukusokolola 22:20b, 21) Shi na kube na imwe bonse mwe balebelenga ulu lupapulo. Shi namukwate icitetekelo ca kuti akalume ka Ukusokolola nakapalama, ica kuti na imwe bene kuti mwailunda muli “Amene” wafumaluka!

[Icikope pe bula 314]

“Ku nse kwabe mbwa . . . ”

[Icikope pe bula 315]

‘Ba nsansa . . . abanonka ukwingila mu musumba pa mpongolo sha uko’