Ukupyanwa kwa Batumwa

Ubulondoloshi: Icifundisho ca kuti abatumwa 12 balikwata impyani uko ubulashi bwapishiwa ku kusontwa kwa bulesa. Mwi Calici lya ciRoma Katolika, bashikofu pamo nge bumba basoselwako ukube mpyani sha batumwa, na papa atungwa ukuba impyani ya kwa Petro. Calikatililwako ukuti bapapa ba ciRoma besako mu kwangufyanya pa numa, ya kubuula icifulo no kubomba incito ya kwa Petro, ku untu casoswa ukuti Kristu apeele ubulashi bwa kubalilapo pe Calici lyonse. Te cisambilisho ca Baibolo.

Bushe Petro aali “cilibwe” apo icalici lyakuulilwe?

Mat. 16:18, JB: “Nomba nasosa kuli iwe, ukuti: Ni we Petro na pa libwe ili nkakuulapo Icalici lyandi. Ne mpongolo sha ku mbo tashakalyanshe.” (Mona ku mashiwi yashingulwikeko [ifiko. 13, 20] ukuti ukulanshanya kushimpilwe pa kwishibikwa kwa kwa Yesu.)

Ni ani untu abatumwa Petro na Paulo baumfwikishe ukuba “icilibwe,” “ilibwe lya pa cifutu”?

Imil. 4:8-11, JB: “Petro, aiswilemo no Mupashi wa Mushilo, abebele, ukuti, ‘Mwe bakateka ba bantu, na bakalamba! . . . ni mwi shina lya kwa Yesu Kristu umwina Nasarete, uo imwe mwatanike, uo Lesa abuushishe ukufuma ku bafwa, e mo uyu muntu aimininako umutuntulu, pa menso yenu, ilelo. Uyu e libwe ilyakanwa kuli imwe bakakuula, lelo lyaisabe ilibwe likalamba [“ilibwe lya pa cifutu,” NAB].’”

1 Pet. 2:4-8, JB: “Ipalamikeni mwe bene kuli wene [Shikulu Yesu Kristu] pa kuti na imwe . . . mwingaba amabwe ya mweo ukupange ŋanda ya bumupashi. Nga fintu ilembo lisosa: Moneni nimbika mu Sione ilibwe lya pa cifutu ilyaumo mutengo ilyo nasala no muntu uwabika ukucetekela kwakwe pali lyene takalengwe nsoni. Ukupilibula ukuti kuli imwe mwe batetekela, lyalyumo mutengo; lelo ku bashatetekela, ilibwe ilyakaanwa kuli bakakuula lyaba ilibwe likalamba, ilibwe lya kuipununako, icilibwe ca kulenga abantu ukuwa.”

Efes. 2:20, JB: “Muli lubali lwa bukuule bwa ca kukuulapo ca batumwa na bakasesema, na Kristu Yesu umwine ilibwe lya pa cifutu ilikalamba.”

Cinshi cali icisumino ca kwa Augustine (uwalemonwa ngo mutakatifu kwi Calici lya ciKatolika)?

“Muli cino ciputulwa ca nshita imo ine ica bushimapepo bwandi, na kabili nalembele icitabo, ca kulwisha kalata wa kwa Donatus . . . Mu mukululo wa ici citabo, nasosele pa lwa Mutumwa Petro: ‘Pali wene pamo nge cilibwe pakuulilwe Icalici.’ . . . Lelo naishibo kuti libili libili pa nshita yakonkelepo, nalondolwele cintu Shikulu asosele ukuti: ‘Ni we Petro, kabili pa cilibwe ici nkakuulapo Icalici lyandi,’ ico cabe caumfwika pamo nge cakuulwa pali Wene Petro ailumbulwileko ukuti: ‘Ni we Kristu, Umwana wa kwa Lesa wa mweo,’ kabili e co Petro, pa numa aitile ici cilibwe, caiminineko umuntu we Calici ilyakuulwa pa cilibwe ici, kabili alipokelela ‘imfungulo sha bufumu bwa mu mulu.’ Pantu, ‘Ni we Petro’ kabili te ‘Ni we cilibwe’ e casoselwe kuli wene. Lelo ‘icilibwe aali ni Kristu,’ mu kulumbulula ku o nga fintu Icalici lyonse nalyo lilumbulula, Simone aitilwe Petro.”—The Fathers of the Church—Saint Augustine, the Retractations (Washington, D.C.; 1968), ilyapilibwilwe na Mary I. Bogan, Book I, ibu. 90.

Bushe abatumwa bambi bamwene Petro ngo wali uwa kubalilapo pa kati kabo?

Luka 22:24-26, JB: “Kabinge pabuukile ifikansa pa kati kabo [abatumwa], ifya kuti: nga nani uufwile ukubo mukalamba wabo, lelo asosele kuli bene ukuti, ‘Mu basenshi ishamfumu shiteka pali bene, na abo baumyo lupaka pali bene bapeelwe lumbo lya Bakaafwa. Tacifwile ukube fyo kuli imwe.’” (Nga ca kuti Petro aali “icilibwe,” bushe nga kwaliko ukutwishika nga ni ani uwa bene “uufwile ukubo mukalamba”?)

Apo Yesu Kristu, umutwe wa cilonganino, acili umumi, bushe alakabila impyani?

Heb. 7:23-25, JB: “E lyo kwali impendwa ikalamba iya bashimapepo [muli Israele]; pantu imfwa yalebalesho kwikalilila; nomba uyu [Yesu Kristu], ico wa kubelelela pe, tengalufya bushimapepo bwakwe. Lyene, kanshi, amaka yakwe aya kupususha yaliba ayashininkishiwa, apantu ekalilila pe ku kupapatila bonse abesa kuli Lesa ukupitila muli wene.”

Rom. 6:9, JB: “Twalishiba no kuti; Kristu, apo ashukuka ku bafwa te ti afwe na kabili.”

Efes. 5:23, JB: “Kristu e mutwe we Calici.”

Cinshi cali “imfungulo” shasekeshiwe kuli Petro?

Mat. 16:19, JB: “Nkakupa ne mfungulo sha bufumu bwa mu mulu. Conse ico ukakaka panwe sonde na mu mulu cakakwa; na conse ico ukakakula panwe sonde, ninshi na mu mulu cakakulwa.”

Mu Ukusokolola, Yesu alosesheko ku lufungulo lwa cimpashanya ukubomfiwa no mwine wine ukwiswilako amapaalo na mashuko ya mu nshita ku mutundu wa muntu

Ukus. 3:7, 8, JB: “Pano pali ubukombe bwa wa mushilo kabili uwa cishinka uwakwata ulufungulo lwa kwa Davidi, ica kuti ilyo aisulako, takuli uwingesalako, kabili ilyo aisalako, takuli uwingesula: . . . Ninjisula pa ntanshi yenu umwinshi uo umuntu nangu umo tali na maka ya kuwisala.”

Petro abomfeshe “imfungulo” shasekeshiwe kuli wene ku kwiswila (abaYuda, abena Samaria, Abena fyalo) amashuko ya kupokelela umupashi wa kwa Lesa mu kuba ne cilolwa ca kwingila kwabo mu Bufumu bwa mu mulu

Imil. 2:14-39, JB: “Petro alimine na be kumi na umo no kubeba mwi shiwi likalamba ati: ‘Mwe bena Yudea, na imwe bonse abekala mu Yerusalemu . . . Lesa acita uyu Yesu untu imwe mwatanike ponse pabili Shikulu kabili Kristu.’ Pa kuumfwe ici, calibapitile ku mitima no kusosa kuli Petro na batumwa, ‘bamunyinefwe, kuti twacita shani?’ ‘Mulingile ukulapila’, e fyaaswike Petro ‘kabili onse uwa imwe alingile ukubatishiwa mwi shina lya kwa Yesu Kristu ku kulekelelwe membu, kabili mukapokelela ubupe ubwa Mupashi wa Mushilo. Icilayo icacitilwe ni ci kuli imwe na bana benu, na kuli abo bonse aba kutali, kuli abo bonse abo Shikulu Lesa wesu aketa ku mwine wine.’”

Imil. 8:14-17, JB: “Ilintu abatumwa mu Yerusalemu baumfwile ukuti Samaria napokelela icebo ca kwa Lesa, batumineko Petro na Yohane kuli bene, kabili baile kulya, no kupepela abena Samaria ukupokelela Umupashi wa Mushilo, pantu wali taulaisa pa uuli onse uwa bene: babatishiwe fye mwi shina lya kwa Shikulu Yesu. Lyene babikile iminwe pali bene, kabili bapokelele Umupashi wa Mushilo.” (Imilimo 8 Icikomo 20 cilangilila ukuti Petro aali e umo uwalebuula ubutungulushi pali aka kashita.)

Imil. 10:24-48, JB: “Bafikile ku Kaisarea ubushiku bwakonkelepo, kabili Korneli [umwina fyalo ushasembululwa] alebapembelela. . . . Petro alandile kuli bene . . . Ilintu Petro acili alelanda Umupashi wa Mushilo waishile pali bonse abalekutika.”

Bushe umulu walilolele pali Petro ukucita ukupingulapo kabili lyene ukukonka ubutungulushi bwakwe?

Imil. 2:4, 14, JB: “Bonse baiswilemo no Mupashi wa Mushilo, no kutendeka ukulandila mu ndimi isheni nga fintu umupashi wabapeele ica bupe ca kulanda. . . . Lyene [pa numa lintu Kristu, umutwe wa cilonganino, abakumbilemo no mupashi wa mushilo] Petro aiminine na batumwa ikumi na umo ukubeba.” (Mona Imilimo 2 icikomo 33.)

Imil. 10:19, 20, JB: “Umupashi waebele [Petro], ‘Abaume bamo nabesa kukumona iwe. Angufyanya, kabili wishingashinga pa lwa kubwelelamo na bo [ku ŋanda ya Mwina Fyalo Korneli]; caali ni ine uwabebele ukwisa.’”

Linganyako Mateo 18:18, 19.

Bushe Petro e kapingula ukukuma ku o cawaminwa ukwingila mu Bufumu?

2 Tim 4:1, JB: “Kristu Yesu . . . akaba kapingula wa ba mweo na bafwa.”

2 Tim. 4:8, JB: “Icisheleko nomba kuyapoke cilambu ca bulungami icimpembelela, ico Shikulu [Yesu Kristu], kapingula wa bulungami, akampeela mu bushiku bulya’ kabili te kuli ine neka lelo kuli bonse abafuluko Kumoneka kwakwe.”

Bushe Petro aali mu Roma?

Roma yaloshiwako mu fikomo pabula ifya Malembo ya Mushilo; tapali nangu limo ilya aya ilisosa ukuti Petro aali kulya. Petro wa Kubalilapo 5:13 alangilila ukuti aali mu Babiloni. Bushe ici caali kuloshako kwa nkama kuli Roma? Ukuba kwakwe mu Babiloni kwali ukwakukonkanya mu kuba no kupeelwa kwakwe ukwa lubali ukushimikila ku baYuda (nga fintu calangililwa pa Abena Galatia 2:9), apantu kwaliko ubwingi bwafula ubwa baYuda mu Babiloni. Encyclopaedia Judaica (Jerusalem, 1971, Vol. 15, umuku. 755), lintu ilanda pa kuletwako kwa Talmud ya ciBabiloni, ilosha ku “masukulu yakalamba aya pa mulu aya Babiloni” aya buYuda mu kati ka Mwanda Waishibikwa.

Bushe umutande wabulo kuputuka uwa mpyani walikonkwa ukufuma kuli Petro ukufika kuli bapapa ba kasuba ka muno nshiku?

Shimapepo wa ciKatolika John McKenzie, lintu aali profesa wa fya bulesa pa Notre Dame, alembele ukuti: “Ubushinino bwa lyashi lya kale tabwabako ku munyololo onse uwa bupyani bwa bulashi bwe calici.”—The Roman Catholic Church (New York, 1969), ibu. 4.

New Catholic Encyclopedia asumino kuti: “ . . . ukubulisha kwa fyalembwa kusha ifingi ifishaumfwikwa pa lwa kulunduluka kwa mu kubangilila ukwa batumwa. . . .”—(1967), Vol. I, ibu. 696.

Ukutunga kwa kusontwa na bulesa takupilibula icili conse nga ca kuti abo abakucita tabali aba cumfwila kuli Lesa na Kristu

Mat. 7:21-23, JB: “Te kuli abo abanjeba ati, ‘Shikulu, Shikulu,’ e bakengila mu bufumu bwa mu mulu, lelo ku muntu uucita ukufwaya kwa kwa Tata uuli mu mulu. Ilintu ubushiku bukesa abengi bakasosa kuli ine, ‘Shikulu, Shikulu’ bushe tatwasesemene mwi shina lyenu, ukufumya ifiwa mwi shina lyesu, ukucita ifisungusho ifingi mwi shina lyenu?’ Lyene nkabeba pa cinso cabo ati: Nshamwishiba, fumeni kuli ine, mwe ncitatubi!”

Mona na kabili Yeremia 7:9-15.

Bushe abatungwa ubupyani ku batumwa balikatilila ku fisambilisho ne fibelesho ifya kwa Yesu na batumwa bakwe?

A Catholic Dictionary ilanda ukuti: “Icalici lya ciKatolika lya Butumwa, pantu icifundisho caba citetekelo ico limo casokolwelwe ku Batumwa, icitetekelo cintu licingilila no kulondolola, ukwabula ukulunda kuli cene nelyo ukufumyako.” (London, 1957, W. E. Addis na T. Arnold, ibu. 176) Bushe ifishinka filasuminisha?

Ukwishibikwa kwa kwa Lesa

“Bulesa Butatu lyaba e shina ilyaletwako ukwishibisha icifundisho ca pa kati ica butotelo bwa bwina Kristu.”—The Catholic Encyclopedia (1912), Vol. XV, ibu. 47.

“Takwaba nangu lishiwi Bulesa Butatu, nelyo icifundisho nge fyo, cimoneka mu Cipingo Cipya . . . icifundisho calundulwilwe panono panono ukucila pa myanda ya myaka iingi kabili ukupula mu kukansana ukwingi.”—The New Encyclopædia Britannica (1976), Micropædia, Vol. X, ibu. 126.

“Kwalibako ukwishibikwa pa lubali lwa bakalengulula na basambilila ifya bulesa aba Baibolo, ukusanshako impendwa itwalilila ukukula iya baRoma Katolika, ukwa kuti umo tafwile ukulanda ulwa Bulesa Butatu mu Cipingo Cipya ukwabula ukuteulula kukalamba. Kwalibako na kabili ukwishibikwa kwapalana nga nshi pa lubali lwa bakalemba ba malyashi ya kale aba cifundisho na basambilila ifya bulesa abakonkeshamo ukuti ilintu umo alanda ulwa Bulesa Butatu ubushateululwa, ninshi umo nasela ukufuma ku nshita ya ntulo ya buKristu, tutile ukwisa ku ciputulwa ca muli fine ica kulekeleshako ica mwanda wa myaka uwalenga 4.”—New Catholic Encyclopedia (1967), Vol. XIV, ibu. 295.

Ubushimbe bwa bashimapepo

Papa Paul VI, muli kalata yakwe iya bupapa Sacerdotalis Caelibatus (Ubushimbe bwa Bashimapepo, 1967), apampamike ubushimbe pamo nge cifwaikwa kuli bashimapepo, lelo asumine ukuti “Icipingo Cipya icasunga icisambilisho ca kwa Kristu ne ca Batumwa . . . tacipinda apabuuta ubushimbe ubwa baminisita bashila . . . Yesu umwine tacipangile ukuba nge cifwaikwa mu kusobolapo Kwakwe ukwa be Kumi na Babili, nelyo Abatumwa kuli abo abatangilile ubwikashi bwa mwanda wa myaka uwa kubalilapo.”—The Papal Encyclicals 1958-1981 (Falls Church, Va.; 1981), ibu. 204.

1 Kor. 9:5, NAB: “Bushe tatwakwata nsambu ya kuupa umwanakashi watetekela ukupala abatumwa bambi abashala na bamunyina ba kwa Shikulu na Kefa?” (“Kefa” lishina lya ciAramaic ilyapeelwe kuli Petro; mona Yohane 1:42. Mona na kabili Marko 1:29-31, uko ukuloshako kwacitwa kuli nafyala wa kwa Simone, nelyo Petro.)

1 Tim. 3:2, Dy: “E co, kanshi, shikofu afwile ukuba . . . umulume wa mukashi umo [“uwaupa fye umuku umo,” NAB].”

Pa ntanshi ya mwanda wa myaka uwa bwina Kristu, buBuddha bwafwaile bashimapepo ba buko ne filundwa fya butotelo ukuba abashimbe. (History of Sacerdotal Celibacy in the Christian Church, London, 1932, ukulembwa kwalenga bune, ukwapitulukwamo, Henry C. Lea, ibu. 6) Nangu fye mu kubangilila, amakambisho yasumbukisha aya bushimapepo bwa ciBabiloni yalifwaikwe ku kubelesha ubushimbe, ukulingana na The Two Babylons na A. Hislop.—(New York, 1943), ibu. 219.

1 Tim. 4:1-3, JB: “Umupashi wasosa mu kukosa ukuti mu nshita sha kulekelesha bamo bakafuma ku citetekelo no kusoobolapo ukuumfwa ku mipashi ya kulufya ne fifundisho fya fibanda . . . bakasosa ukuti icupo calibindwa.”

Ukupaatuka ukufuma ku calo

Papa Paul VI, ilintu alelanda kuli United Nations mu 1965, asosele ukuti: “Abantu ba pe sonde balukile kuli United Nations pamo nge subilo lya kupelako ilya kwikatana no mutende; Tuli abapama ukutambika pano, pamo no Kwesu ukupeela kwabo ukwa mucinshi ne subilo.”—The Pope’s Visit (New York, 1965), Time-Life Special Report, ibu. 26.

Yoh. 15:19, JB: “[Yesu Kristu asosele kuti:] Nga ca kuti mwali aba ku calo, nge calo calimutemwa nga ba ciko; lelo pantu tamuli ba ku calo, pantu ukusala kwandi kwamufumishe ku calo, e co icalo camupatila.”

Yako. 4:4, JB: “Bushe tamwaishiba ukuti ukucita icalo cibusa wenu kucita Lesa umulwani wenu?”

Ukwalukila ku fyanso fya nkondo

Kalemba wa lyashi lya kale uwa ciKatolika E. I. Watkin alembo kuti: “Ica kukalipa nga fintu ukusumina kulingile ukuba, te kuti mu buseko bwa kukoselesha kwa bufi nelyo ukubulwo bufumacumi ukwa bucishinka te kuti tukaane nelyo ukusuula icishinka ca lyashi lya kale ica kuti Bashikofu mu kutwalilila balyafwilisha inkondo shonse ishalwikwa na kamfulumende wa calo cabo. Nshaishiba mu cishinka akashita kamo umo buhairaki bwa luko bwasenuka inkondo iili yonse pamo nge iishili yalungama . . . Te mulandu ne cili imfundo ya bulashi, mu cibelesho ‘icalo candi lyonse calilungama’ caliba ipinda lyakonkwa mu nshita ya nkondo na Bashikofu ba ciKatolika.”—Morals and Missiles (London, 1959), ukulembwa na Charles S. Thompson, amabu. 57, 58.

Mat. 26: 52, JB: “Lyene Yesu asosele ukuti, Bwekeshamo ulupanga lobe umo lwikala, bonse ababuulo lupanga bakafwa ku lupanga.”

1 Yoh. 3:10-12, JB: “Muli iyi nshita tulekanya abana ba kwa Lesa ukufuma ku bana ba kwa ciwa: uuli onse . . . uushatemwa munyina tali mwana wa kwa Lesa. . . . Tulingile ukutemwana; te kupala Kaini, uwali uwa Mubifi no kwipaya munyina.”

Mu lubuuto lwa fili pa mulu, bushe abo abaitunga ukuba impyani sha batumwa mu cituntulu balisambilisha no kubelesha cintu Yesu na batumwa bakwe bacitile?