Ukulumbulula

Ubulondoloshi: Ukubilisha nelyo ukusumina, atemwa pa cintubwingi nelyo pa mbali, (1) ukwa cintu umuntu asumina nelyo (2) ukwa membu shakwe.

Bushe ukusefya kwa kuwikisha, ukusanshako ukulubulwila mu kutwi (ukulumbula kwa pa lwakwe mu kutwi kwa kwa shimapepo), nga fintu kusambilishiwa ne Calici lya ciKatolika kwa mu Malembo?

Inshila iyo shimapepo alandilwako

Amashiwi ya cishilano, ayacili yalebomfiwa, ni aya: “Mpaaleni, mwe Tata, pantu nimembuka nincite sambi. Papite [nshita ikalamba] ukutula pa Kulumbulula kwandi ukwalekelesheko.”—magazine wa U.S. Catholic, October 1982, ibu. 6.

Mat. 23:1, 9, JB: “Yesu asosele ukuti, . . . ‘Tamufwile ukwita uuli onse pe sonde shinwe, apantu mwakwata Shinwe umo fye, kabili aba mu mulu.’”

Imembu ishingelelwa

“Icalici lyasambilisha lyonse ukuti ulubembu ululi lonse, te mulandu na fintu luli ulwabipisha, kuti lwaelelwa.”—The Catholic Encyclopedia (iyakwata nihil obstat and the imprimatur [ukusuminishiwa kwa bulashi bwa ciKatolika]), R. C. Broderick (Nashville, Tenn.; 1976), ibu. 554.

Heb. 10:26, JB: “Nga ca kuti, pa numa tube natupeelwa ukwishiba kwa cine, twacite membu ishili shonse ku mufulo, lyene takuli na kabili ilambo ilili lyonse pa lwa shene.”

Marko 3:29, JB: “Lekeni uuli onse apontele Umupashi wa Mushilo kabili takabale akwata ukwelelwa: ali no mulandu wa lubembu lwa pe.”

Ifyo icilapilo cili no kulangwa

Ilingi line shimapepo uumfwa ukulumbulula eba uulelumbulula ukusosa impendwa yaimikwa iya “baShifwe” na “baLumbeni Maria.”

Mat. 6:7, JB: “Mu mapepo yenu mwilalongofyanya [uko e kuti, ukulanda mu nshila yabulwamo ubupilibulo iya kubwekeshabwekeshapo] nge ficita abasenshi, pantu batontonkanya ukuti pa kubomfya amashiwi ayengi bakailenga abene ukumfwikwa.”

Mat. 6:9-12, JB: “Mulepepa ifi: ‘Shifwe wa mu mulu, . . . mutwelele imisha.’” (Takwaba ukuli konse mu Baibolo uko twakambishiwa ukupepa kuli Maria nelyo ukupitila muli wene. Mona Abena Filipi 4:6, na kabili amabula 233, 234, pe samba lya “Maria.”)

Rom. 12:9, Uwa ciKatolika uwa Cibemba: “Icitemwiko cibe icacishinka; mulepato bubi, mulekonkelelo busuma.”

Bushe Yesu tapeele abatumwa bakwe insambu ya kwelela imembu?

Yoh. 20:21-23, JB: “‘Ifyo Tata antumine, e fyo ndemutuma.’ Pa numa ya kusosa ifi apuutile umupu pali bene no kusoso kuti: ‘Pokeleleni Umupashi wa Mushilo. Pantu abo imembu shabo mwaelela, ninshi shaelelwa; kuli abo imembu shabo mwaikasha, ninshi shaikashiwa.’”

Ni shani fintu abatumwa baumfwikishe no kubomfye ci? Takwaba icalembwa mu Baibolo ica ncitilo imo umo umutumwa akutike ku kulumbulula kwa pa mbali kabili lyene ukubilisha ukufumishiwa kwa lubembu. Nangu cibe fyo, ififwaikwa fya kwelelwa kuli Lesa fyalimikwa muli Baibolo. Abatumwa, pe samba lya butungulushi bwa mupashi wa mushilo, baali na maka ya kumona nampo nga bantu umo umo balekumanisha ififwaikwa fya musango yo kabili pali ici cishinte baali no kubilisha ukuti Lesa nabelela nelyo tabelele. Ku fya kumwenako, mona Imilimo 5:1-11, na kabili 1 Abena Korinti 5:1-5 na 2 Abena Korinti 2:6-8.

Mona na kabili umutwe ukalamba “Ukupyanwa kwa Batumwa.”

Imimwene ya basambi ukukuma ku ntulo ya kulumbwila mu matwi yalipusana

The Catholic Encyclopedia, kuli R. C. Broderick, ilondololo kuti: “Ukutula pa mwanda wa myaka uwalenga ine ukulumbwila mu matwi kwaliba inshila yapokelelwa.”—Ibu. 58.

New Catholic Encyclopedia isoso kuti: “Bakalemba ba malyashi ya kale abengi aba nshita imo ine, bonse aba ciKatolika na baProtesitanti, balonsha intulo ya cilapilo ca pa mbali ngo kusalapula kwa lyonse ku macalici ya mu Ireland, Wales, na Britain, umo Insakalamenta, ukusanshako Icilapilo, fyalepeelwa ilingi line ku mukalamba wa ciyanda ca bashimbe ba butotelo na bashimapepo bakwe abekala mu mayanda ya butotelo. Mu kuba ne cibelesho ca mu mayanda ya butotelo ica kulapila no kutungulula kwa cintubwingi no kwa pa mbali ukwa ku mupashi pamo nge ca kumwenako, ukulumbulula kwabwekeshiwapo no kulumbula kwa kuipeelesha fimoneka ukuletwako ku bantuuntu fye. . . . Nangu cibe fyo, tacali ukufikila umwanda wa myaka uwalenga 11 e lyo imembu sha mu bumfisolo shaleelelwa pa nshita ya kulumbulula kabili pa ntanshi ya kufikilishiwa kwa kulapila.”—(1967), Vol. XI, ibu. 75.

Kalemba wa malyashi ya kale A. H. Sayce ashimiko kuti: “Ifyalembwa fya kusefya filanga ukuti konse kubili ukulumbulula kwa pa cintubwingi no kwa pa mbali kwalibeleshiwe mu Babilonia. Mu cituntulu, ukulumbulula kwa pa mbali kumoneka ukuba inshila yacilapo kukokola kabili iyacilapo kuba iya lyonse.”—The Religions of Ancient Egypt and Babylonia (Edinburgh, 1902), ibu. 497.

Finshi fyaba ifisumino fya Nte sha kwa Yehova ukukuma ku kulumbulula?

Ukulumbulula icitetekelo ca umo ku kubilisha kwa pa cintubwingi

Rom. 10:9, 10: “Nga walumbula ku kanwa kobe, auti, Kristu e Shikulu, kabili watetekela mu mutima obe, auti, Lesa amubuushishe ku bafwa; pantu ku mutima umuntu atetekela no kulungamikwa, kabili ku kanwa alumbula no kupusuka.”

Mat. 10:32, 33: “Onse uunumbula bwino ku menso ya bantu, na ine nkamulumbula ku menso ya kwa Tata wa mu mulu; lelo onse uukankana pa cinso ca bantu, na ine nkamukaana pa cinso ca kwa Tata wa mu mulu.”

Lintu umuntu abembukila Lesa

Mat. 6:6-12: “Ilyo ulepepa, ingila mu muputule obe uwa mu kati ka ŋanda, isalako ne ciibi cobe, no kupepa kuli Wiso uuli mu bumfisolo . . . Shifwe wa mulu, ishina lyenu libelwe akatiina. . . . Tulekeleleni imisha yesu, ifyo na ifwe twalekelela abatuulile imisha.”

Amalu. 32:5: “Namulengele [mwe Lesa] ukwishibo lubembu lwandi, na mampuulu yandi nshafimbilepo. Natile, ndetumbulo bupulumushi bwandi kuli Yehova, e lyo na imwe mwalekelele amampuulu ya lubembu lwandi.”

1 Yoh. 2:1: “Ngo muntu abembuka, natukwato Bukota kuli Shifwe, Yesu Kristu umulungami.”

Lintu umuntu abifya ku muntu munankwe nelyo abifiwa

Mat. 5:23, 24: “E ico nga watwale ca bupe cobe pa ciipailo, no kwibukisha palya ukuti munonko ali na kantu kuli iwe, leke ca bupe cobe ku cinso ca ciipailo, kabili uye, ubale uwikishanye no mubiyo, e lyo wise no kutuule ca bupe cobe.”

Mat. 18:15: “Nga munonko abembukila iwe, kabiye, kamushinine pa kati ka iwe na wene mweka.”

Luka 17:3: “Munonko nga abifya, mwebaule; e lyo nga alapila, mulekelele.”

Efes. 4:32: “Mubelane icongwe, mube aba mitima ya nkumbu, ababelelano luse, ifyo na Lesa amubelele uluse muli Kristu.”

Lintu umuntu aibimba mu ncitilo yabipisha kabili alefwaya ukwaafwa kwa ku mupashi

Yako. 5:14-16: “Bushe umuntu wa muli imwe nalwala [lwa ku mupashi]? Ete abakalamba ba lukuta bese, na bo bapepe pali wene, no kumusubila amafuta mwi shina lya kwa [Yehova]; ne pepo lya citetekelo likapususho mulwele, na [Yehova] akamubuusha; kabili imembu isho acita shikalekelelwa kuli wene. E co yasanineni imembu shenu no kupepelana, ukuti muposhiwe.”

Amapi. 28:13: “Uufimba pa fya bupulumushi fyakwe takashuke; lelo uufitumbula no kufileka akacitwe nkumbu.”

Ni shani nga ca kuti abantu abacite membu tabalefwaya ukwaafwiwa?

Gal. 6:1: “Mwe ba bwananyina, umuntu nga asangilishiwa mu bubi bumo, imwe mwe ba bumupashi, mupuputuleni uwabe fi ne mitima iyanakilila; uleilolekesha we mwine, epali nobe waeshiwa.”

1 Tim. 5:20: “[Ababelesho lubembu] ulebebawila pa menso ya bonse, [uko e kuti, abo pa lwabo beshibe ulwa mulandu] ukuti na bashala babe no mwenso.”

1 Kor. 5:11-13: “Mwiyampana na muntu uwitwo wa bwananyina, nga abo wa bulalelale, napamo uwa lunkumbwa, napamo uupepo tulubi, napamo uutukana, napamo uukolwo bwalwa, napamo umupupu. Mwiyampana no wabe fi, nangu kulya nankwe. . . . Fumyeni muli imwe bene imbifi iyo.”